ಚಂದ್ರವಳ್ಳಿ ನ್ಯೂಸ್, ಹಿರಿಯೂರು:
ಮಧ್ಯ ಕರ್ನಾಟಕದ ಜೀವನಾಡಿ, ಪ್ರಸಿದ್ಧ ವಿವಿ ಸಾಗರ (ವಾಣಿ ವಿಲಾಸ ಸಾಗರ) ಜಲಾಶಯಕ್ಕೆ ಎದುರಾಗಿರುವ ಸಾಲು ಸಾಲು ಸಂಕಷ್ಟಗಳನ್ನು ತಡೆಯಲು ಹಾಗೂ ಡ್ಯಾಂ ರಕ್ಷಣೆಗಾಗಿ ಹಿರಿಯೂರು ವಿಧಾನಸಭಾ ಕ್ಷೇತ್ರದ ಉಪಚುನಾವಣೆಯನ್ನು ಬಹಿಷ್ಕರಿಸಲು ನಿರ್ಧರಿಸಲಾಗಿದೆ ಎಂದು 'ವಿವಿಸಾಗರ ಹಾಗೂ ಭದ್ರಾ ಮೇಲ್ದಂಡೆ ಅಚ್ಚುಕಟ್ಟುದಾರ ರೈತರ ಹಿತರಕ್ಷಣ ಸಮಿತಿ' ಅಧ್ಯಕ್ಷ ಕಸವನಹಳ್ಳಿ ರಮೇಶ್ ತಿಳಿಸಿದ್ದಾರೆ.
ಆಗಸ್ಟ್ 1ರಂದು ಹಿರಿಯೂರಿನ ಪ್ರವಾಸಿ ಮಂದಿರದಲ್ಲಿ ಆಯೋಜಿಸಲಾಗಿದ್ದ ಸಮಿತಿಯ ಮಹತ್ವದ ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಅವರು, ವಿವಿ ಸಾಗರಕ್ಕೆ ಎಂಟು ದಿಕ್ಕುಗಳಿಂದಲೂ ಆತಂಕ ಎದುರಾಗಿದೆ ಎಂದು ಆತಂಕ ವ್ಯಕ್ತಪಡಿಸಿದರು.
ಸಭೆಯ ಪ್ರಮುಖ ಅಂಶಗಳು:
ನೀರಿನ ಹಂಚಿಕೆಯಲ್ಲಿ ತಾರತಮ್ಯ: ಜಲಾಶಯಕ್ಕೆ ಪ್ರಸ್ತುತ ಕೇವಲ 2 ಟಿಎಂಸಿ ನೀರು ಮಾತ್ರ ಹಂಚಿಕೆಯಾಗಿದ್ದರೂ, ವಾಸ್ತವದಲ್ಲಿ 10 ಟಿಎಂಸಿ ನೀರು ಬಳಕೆಯಾಗುತ್ತಿದೆ. ಆದ್ದರಿಂದ ವಿವಿ ಸಾಗರಕ್ಕೆ ಕಾಯಂ ಆಗಿ 10 ಟಿಎಂಸಿ ನೀರನ್ನು ಮೀಸಲಿಡಬೇಕು.
ಭದ್ರಾ ಯೋಜನೆಗೆ ವೇಗ ನೀಡಿ: ತುಂಗಾ ನದಿಯಿಂದ ಭದ್ರಾ ಜಲಾಶಯಕ್ಕೆ ನೀರು ಎತ್ತುವ ಕಾಮಗಾರಿ ಅತ್ಯಂತ ಮಂದಗತಿಯಲ್ಲಿ ನಡೆಯುತ್ತಿದ್ದು, ಇದನ್ನು ತಕ್ಷಣವೇ ಪೂರ್ಣಗೊಳಿಸಬೇಕು.
ಟಿ.ಬಿ. ಜಯಚಂದ್ರ ನಡೆಯ ವಿರುದ್ಧ ಆಕ್ರೋಶ: ತುಮಕೂರು ಜಿಲ್ಲೆ ಶಿರಾ ತಾಲೂಕಿನ ಕೈಗಾರಿಕೆಗಳಿಗೆ ವಿವಿ ಸಾಗರದಿಂದ ನೀರು ಹಂಚಿಕೆ ಮಾಡಲು ಶ್ರಮಿಸುತ್ತಿರುವ ಶಿರಾ ಶಾಸಕ ಟಿ.ಬಿ. ಜಯಚಂದ್ರ ಅವರ ನಡೆಯನ್ನು ಸಭೆಯಲ್ಲಿ ತೀವ್ರವಾಗಿ ಖಂಡಿಸಲಾಯಿತು. ಜಯಚಂದ್ರ ಅವರು ಈ ನೀರು ಒಯ್ಯುವ ಆದೇಶ ಮಾಡಿಸಿದರೆ, ಹಿರಿಯೂರು ಉಪಚುನಾವಣೆಯನ್ನು ಸಂಪೂರ್ಣವಾಗಿ ಬಹಿಷ್ಕರಿಸಲಾಗುವುದು ಎಂದು ಎಚ್ಚರಿಸಿದರು.
ಸೆಪ್ಟೆಂಬರ್ 8ಕ್ಕೆ ಸರ್ವಪಕ್ಷಗಳ ಬೃಹತ್ ಸಭೆ:
ವಿವಿ ಸಾಗರ ಉಳಿವಿಗಾಗಿ ತಾಲೂಕಿನ ಎಲ್ಲಾ ರಾಜಕೀಯ ಪಕ್ಷಗಳು, ಸಂಘ-ಸಂಸ್ಥೆಗಳು, ರೈತರು, ವರ್ತಕರು, ನಾಗರಿಕರು ಹಾಗೂ ವೃತ್ತಿಪರರನ್ನು ಒಗ್ಗೂಡಿಸಿ ಬೃಹತ್ ಹಕ್ಕೊತ್ತಾಯ ಮಂಡಿಸಲು ನಿರ್ಧರಿಸಲಾಗಿದೆ. ಈ ಹೋರಾಟಕ್ಕೆ ಜಿಲ್ಲೆಯ ಶಾಸಕರು, ಎಂಎಲ್ಸಿಗಳು, ಸಂಸದರು ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವರನ್ನು ಆಹ್ವಾನಿಸಲಾಗುವುದು.
ಇದರ ಪೂರ್ವಭಾವಿಯಾಗಿ ಬರುವ ಸೆಪ್ಟೆಂಬರ್ 8 (ಮಂಗಳವಾರ) ರಂದು ಬೆಳಿಗ್ಗೆ ಹಿರಿಯೂರಿನ ಪ್ರವಾಸಿ ಮಂದಿರದಲ್ಲಿ ತಾಲೂಕಿನ ಎಲ್ಲಾ ಪಕ್ಷ ಹಾಗೂ ಸಂಘಟನೆಗಳ ಪ್ರಮುಖರ ಸಭೆಯನ್ನು ಕರೆಯಲಾಗಿದೆ.
ಆಲೂರು ಸಿದ್ದರಾಮಣ್ಣ ಸ್ವಾಗತಿಸಿದ ಈ ಸಭೆಯಲ್ಲಿ ಕಾರ್ಯಾಧ್ಯಕ್ಷ ಎಚ್.ಆರ್. ತಿಮ್ಮಯ್ಯ, ಖಜಾಂಚಿ ಬಬ್ಬೂರು ಸುರೇಶ್ ಹಾಗೂ ಸಂಚಾಲಕ ಎಸ್.ಬಿ. ಶಿವಕುಮಾರ್ ಪ್ರಮುಖ ಸಲಹೆಗಳನ್ನು ನೀಡಿದರು.
ಸಭೆಯಲ್ಲಿ ಡಿಸಿಸಿ ಬ್ಯಾಂಕ್ ನಿರ್ದೇಶಕ ಮಂಜುನಾಥ್ ಮಾಳಿಗೆ, ಗ್ರಾ.ಪಂ. ಸದಸ್ಯೆ ಶಶಿಕಲಾ, ಪಿಟ್ಲಾಲಿ ಶ್ರೀನಿವಾಸ್, ನಿವೃತ್ತ ಬ್ಯಾಂಕ್ ಅಧಿಕಾರಿ ಎಂ.ಟಿ.ಬಿ. ನಾಯ್ಕ, ಮಮತಾ ಕೃಷ್ಣಮೂರ್ತಿ, ಜೆ.ಬಿ. ರಾಜು, ಆನಂದ ಶೆಟ್ರು, ನಾರಾಯಣ ಆಚಾರ್, ಆಲೂರು ಕಲಾವತಿ, ಗೀತಮ್ಮ ರಾಮಚಂದ್ರ ಕಸವನಹಳ್ಳಿ, ಮಲ್ಲಿಕಾರ್ಜುನಪ್ಪ ಸೇರಿದಂತೆ ಹಲವು ಮುಖಂಡರು ಭಾಗವಹಿಸಿದ್ದರು.
