ಚಂದ್ರವಳ್ಳಿ ನ್ಯೂಸ್, ಶ್ರವಣಗೆರೆ:
ರೈತರ ಹೊಲಗಳಲ್ಲಿ ಪರಾಗಸ್ಪರ್ಶ ಕ್ರಿಯೆಯನ್ನು ಹೆಚ್ಚಿಸಿ ಬೆಳೆ ಇಳುವರಿಯನ್ನು ದ್ವಿಗುಣಗೊಳಿಸುವ ಉದ್ದೇಶದಿಂದ, ಕೆಳದಿ ಶಿವಪ್ಪ ನಾಯಕ ಕೃಷಿ ಮತ್ತು ತೋಟಗಾರಿಕೆ ವಿಜ್ಞಾನಗಳ ವಿಶ್ವವಿದ್ಯಾಲಯ, ಶಿವಮೊಗ್ಗದ ಅಡಿಯಲ್ಲಿ ಬರುವ ಹಿರಿಯೂರಿನ ತೋಟಗಾರಿಕೆ ಮಹಾವಿದ್ಯಾಲಯದ 4ನೇ ವರ್ಷದ ವಿದ್ಯಾರ್ಥಿಗಳ ವತಿಯಿಂದ 'ಗ್ರಾಮೀಣ ತೋಟಗಾರಿಕೆ ಕಾರ್ಯಾನುಭವ ಕಾರ್ಯಕ್ರಮ' 2026-27ರ ಅಂಗವಾಗಿ ಶ್ರವಣಗೆರೆ ಗ್ರಾಮದಲ್ಲಿ ಜೇನು ಪೆಟ್ಟಿಗೆ ಅಳವಡಿಕೆ ಕುರಿತು ವಿಶೇಷ ವಿಧಾನ ಪ್ರಾತ್ಯಕ್ಷಿಕೆ ಕಾರ್ಯಕ್ರಮವನ್ನು ಯಶಸ್ವಿಯಾಗಿ ಹಮ್ಮಿಕೊಳ್ಳಲಾಯಿತು.
ಗ್ರಾಮದ ರೈತರ ಹೊಲದಲ್ಲಿ ಆಯೋಜಿಸಲಾಗಿದ್ದ ಈ ಕಾರ್ಯಕ್ರಮದಲ್ಲಿ ವಲಯ ಕೃಷಿ ಮತ್ತು ತೋಟಗಾರಿಕಾ ಸಂಶೋಧನಾ ಕೇಂದ್ರದ ಕೀಟಶಾಸ್ತ್ರ ವಿಭಾಗದ ವಿಜ್ಞಾನಿ ಹನುಮಂತರಾಯ ಎಲ್. ಅವರು ವಿಶೇಷ ಆಹ್ವಾನಿತರಾಗಿ ಭಾಗವಹಿಸಿ ರೈತರಿಗೆ ಜೇನು ಕೃಷಿಯ ಬಗ್ಗೆ ಪ್ರಾಯೋಗಿಕ ಮಾಹಿತಿ ನೀಡಿದರು.
ಜೇನು ಪೆಟ್ಟಿಗೆ ಅಳವಡಿಕೆ ಮತ್ತು ನಿರ್ವಹಣೆ: ಜೇನು ಪೆಟ್ಟಿಗೆಯನ್ನು ಹೊಲದ ಬದುವಿನಲ್ಲಿ ಅಥವಾ ಸೂಕ್ತ ನೆರಳಿನ ಪ್ರದೇಶದಲ್ಲಿ ಹೇಗೆ ಅಳವಡಿಸಬೇಕು ಮತ್ತು ದೈನಂದಿನ ನಿರ್ವಹಣೆ ಹೇಗೆ ಕೈಗೊಳ್ಳಬೇಕು ಎಂಬುದನ್ನು ಪ್ರಾತ್ಯಕ್ಷಿಕೆ ಮೂಲಕ ರೈತರಿಗೆ ತೋರಿಸಿಕೊಡಲಾಯಿತು.
ಪರಾಗಸ್ಪರ್ಶದ ಮಹತ್ವ ಮತ್ತು ಇಳುವರಿ ವೃದ್ಧಿ: ಶೇಕಡ 80ರಷ್ಟು ಬೆಳೆಗಳು ಪರಾಗಸ್ಪರ್ಶಕ್ಕಾಗಿ ಜೇನುನೊಣಗಳನ್ನೇ ಅವಲಂಬಿಸಿವೆ. ಸೂರ್ಯಕಾಂತಿ, ಸಾಸಿವೆ, ತೊಗರಿ, ಹತ್ತಿ ಹಾಗೂ ವಿವಿಧ ತರಕಾರಿ ಬೆಳೆಗಳಲ್ಲಿ ಜೇನುನೊಣಗಳ ಉಪಸ್ಥಿತಿಯಿಂದ ಶೇಕಡ 30 ರಿಂದ 40ರಷ್ಟು ಹೆಚ್ಚುವರಿ ಇಳುವರಿ ಪಡೆಯಬಹುದು ಎಂದು ವಿಜ್ಞಾನಿಗಳು ವಿವರಿಸಿದರು.
ಹೆಚ್ಚುವರಿ ಆದಾಯದ ಮೂಲ: ಜೇನು ಕೃಷಿಯು ಕೇವಲ ಬೆಳೆಯ ಇಳುವರಿಯನ್ನು ಹೆಚ್ಚಿಸುವುದಲ್ಲದೆ, ರೈತರಿಗೆ ಬದಲಿ ಆದಾಯದ ಮೂಲವಾಗಿದೆ. ವೈಜ್ಞಾನಿಕವಾಗಿ ನಿರ್ವಹಣೆ ಮಾಡಿದರೆ ಒಂದು ಪೆಟ್ಟಿಗೆಯಿಂದ ವರ್ಷಕ್ಕೆ 8 ರಿಂದ 10 ಕೆಜಿ ಶುದ್ಧ ಜೇನುತುಪ್ಪವನ್ನು ಪಡೆಯಬಹುದು ಎಂದು ತಿಳಿಸಲಾಯಿತು.
ಈ ಕಾರ್ಯಕ್ರಮದಲ್ಲಿ ತೋಟಗಾರಿಕೆ ಮಹಾವಿದ್ಯಾಲಯ ಹಿರಿಯೂರಿನ ಪ್ರಾಧ್ಯಾಪಕರಾದ ಡಾ. ಚಂದ್ರಶೇಖರ್ ಹಾಗೂ ಡಾ. ವಾಸುದೇವ್ ಅವರು ಮಾರ್ಗದರ್ಶನ ನೀಡಿದರು. ಅಂತಿಮ ವರ್ಷದ ಆರ್‌ಎಚ್‌ಡಬ್ಲ್ಯೂಇಪಿ ವಿದ್ಯಾರ್ಥಿಗಳಾದ ಸಿದ್ದರಾಜು ಐ.ಎಂ, ಸಂಗಮೇಶ್ ವಿ.ಝಡ್, ಪ್ರಶಾಂತ್, ಸಾಯಿ ಸುಜಲ್ ರಕ್ಷಿತ್, ಸಾಯಿರಾಮ್, ರಾಜೇಂದ್ರ ಎಂ.ಬಿ. ಹಾಗೂ ಗ್ರಾಮದ ಹೈದಿನೈದು ರೈತರು ಮತ್ತು ಗ್ರಾಮಸ್ಥರು ಉತ್ಸಾಹದಿಂದ ಭಾಗವಹಿಸಿ ಜೇನು ಕೃಷಿಯ ಬಗ್ಗೆ ಹೆಚ್ಚಿನ ಆಸಕ್ತಿ ವ್ಯಕ್ತಪಡಿಸಿದರು.
