ಬೆಳೆಗಳ ಕನಿಷ್ಠ ಬೆಂಬಲ ಬೆಲೆ ಹೆಚ್ಚಳ: ಕೇಂದ್ರ ಸರ್ಕಾರದಿಂದ ರೈತಸ್ನೇಹಿ ತೀರ್ಮಾನ 

ಚಂದ್ರವಳ್ಳಿ ನ್ಯೂಸ್, ನವದೆಹಲಿ:
ಭಾರತದ ರೈತರ ಕಲ್ಯಾಣ ಹಾಗೂ ರಬಿ ಹಂಗಾಮಿನ ದೃಷ್ಟಿಯಿಂದ ಕೇಂದ್ರ ಸರ್ಕಾರ ಮಹತ್ವದ ನಿರ್ಧಾರ ಕೈಗೊಂಡಿದ್ದು, 2027-28ರ ಮಾರುಕಟ್ಟೆ ಹಂಗಾಮಿಗೆ ಸಂಬಂಧಿಸಿದಂತೆ ಎಲ್ಲಾ ಆರು ರಬಿ ಬೆಳೆಗಳಿಗೆ ಕನಿಷ್ಠ ಬೆಂಬಲ ಬೆಲೆಯನ್ನು (MSP) ಹೆಚ್ಚಿಸಿ ಅನುಮೋದನೆ ನೀಡಿದೆ ಎಂದು ಕೇಂದ್ರ ಸಚಿವ ಹೆಚ್. ಡಿ. ಕುಮಾರಸ್ವಾಮಿ ತಿಳಿಸಿದ್ದಾರೆ. 

Also read

​ ಇಮ್ರಾನ್-ಆಶಾ ಆತ್ಮಹತ್ಯೆ, ಸಾಮಾಜಿಕ ಜಾಲತಾಣದಲ್ಲಿ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ: 11 ಇನ್‌ಸ್ಟಾಗ್ರಾಮ್ ಖಾತೆ ಬಳಕೆದಾರರ ವಿರುದ್ಧ FIR

​ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಕೇಂದ್ರ ಸಚಿವ ಸಂಪುಟ ಸಭೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಅನುಮೋದಿತ ನೂತನ ದರಗಳ ಪ್ರಕಾರ, ಕುಸುಬೆ ಬೆಳೆಗೆ ಕ್ವಿಂಟಾಲ್‌ಗೆ ₹675 ಹೆಚ್ಚಳದೊಂದಿಗೆ ₹7,215, ಸಾಸಿವೆಗೆ ₹413 ಹೆಚ್ಚಳದೊಂದಿಗೆ ₹6,613, ಮಸೂರ ಬೇಳೆಗೆ ₹390 ಹೆಚ್ಚಳದೊಂದಿಗೆ ₹7,390, ಬಾರ್ಲಿಗೆ ₹136 ಹೆಚ್ಚಳದೊಂದಿಗೆ ₹2,286, ಕಡಲೆಗೆ ₹83 ಹೆಚ್ಚಳದೊಂದಿಗೆ ₹5,958 ಹಾಗೂ ಗೋಧಿಗೆ ₹25 ಹೆಚ್ಚಳದೊಂದಿಗೆ ₹2,610 ನಿಗದಿಪಡಿಸಲಾಗಿದೆ. 

​ಈ ಕುರಿತು ವಿವರಣೆ ನೀಡಿರುವ ಸಚಿವರು, ಪರಿಷ್ಕೃತ MSP ದರಗಳು ದೇಶಾದ್ಯಂತ ಸರಾಸರಿ ಉತ್ಪಾದನಾ ವೆಚ್ಚದ ಮೇಲೆ ಶೇ. 50 ರಿಂದ ಶೇ. 106 ರಷ್ಟು ಲಾಭಾಂಶವನ್ನು ರೈತರಿಗೆ ಒದಗಿಸಲಿವೆ ಎಂದಿದ್ದಾರೆ. 

​ಕಳೆದ ದಶಕದ ಸಾಧನೆಗಳನ್ನು ಉಲ್ಲೇಖಿಸಿ, 2004-05 ರಿಂದ 2013-14ರ ಅವಧಿಯಲ್ಲಿ 2,302 ಲಕ್ಷ ಮೆಟ್ರಿಕ್ ಟನ್ ಇದ್ದ ರಬಿ ಬೆಳೆಗಳ ಖರೀದಿ ಪ್ರಮಾಣವು, 2014-15 ರಿಂದ 2025-26ರ ಅವಧಿಯಲ್ಲಿ 3,921 ಲಕ್ಷ ಮೆಟ್ರಿಕ್ ಟನ್‌ಗೆ ಏರಿಕೆಯಾಗಿದೆ. ಇದೇ ಅವಧಿಯಲ್ಲಿ ರೈತರಿಗೆ ಪಾವತಿಸಲಾದ ಬೆಂಬಲ ಬೆಲೆಯ ಮೊತ್ತವು ₹2.65 ಲಕ್ಷ ಕೋಟಿಯಿಂದ ₹8.36 ಲಕ್ಷ ಕೋಟಿಗೆ ಭಾರಿ ಪ್ರಮಾಣದಲ್ಲಿ ಹೆಚ್ಚಳ ಕಂಡಿದೆ. 

Also read

ಹಿರಿಯೂರು ತಾಲೂಕಿನ ಮೇಟಿಕುರ್ಕೆಯಲ್ಲಿ ಇಂದು ‘ಸಮಾನತೆಗಾಗಿ ಸಹಭೋಜನ’ ಕಾರ್ಯಕ್ರಮ

​ಕೇಂದ್ರ ಸರ್ಕಾರದ ಈ ದೃಢವಾದ ಕ್ರಮಗಳು ರೈತರಿಗೆ ಉತ್ತಮ ಆದಾಯ ತಂದುಕೊಡುವುದರ ಜೊತೆಗೆ, ದ್ವಿದಳ ಧಾನ್ಯಗಳು ಮತ್ತು ಎಣ್ಣೆಕಾಳುಗಳ ಬೆಳೆ ವೈವಿಧ್ಯೀಕರಣಕ್ಕೆ ಹೆಚ್ಚಿನ ಉತ್ತೇಜನ ನೀಡಲಿವೆ ಎಂದು ಹೆಚ್.ಡಿ. ಕುಮಾರಸ್ವಾಮಿ ಅಭಿಪ್ರಾಯಪಟ್ಟಿದ್ದಾರೆ.