ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ರಾಜ್ಯದಲ್ಲಿನ ಬರ ಪರಿಸ್ಥಿತಿ ಮತ್ತು ಬೆಳೆ ಹಾನಿ ಅಧ್ಯಯನಕ್ಕಾಗಿ ಕೇಂದ್ರ ಅಂತರ್‌ಸಚಿವಾಲಯದ ಉನ್ನತ ಮಟ್ಟದ ತಂಡವು ಅಕ್ಟೋಬರ್ 3 ರಿಂದ ಅಕ್ಟೋಬರ್ 7, 2026 ರವರೆಗೆ ಕರ್ನಾಟಕದ ವಿವಿಧ ಜಿಲ್ಲೆಗಳಲ್ಲಿ ಪ್ರವಾಸ ಕೈಗೊಳ್ಳಲಿದೆ.
ಕೇಂದ್ರ ಕೃಷಿ ಮತ್ತು ರೈತರ ಕಲ್ಯಾಣ ಸಚಿವಾಲಯದ ಜಂಟಿ ಕಾರ್ಯದರ್ಶಿ ಅಜಿತ್ ಕುಮಾರ್ ಸಾಹು ಅವರ ನೇತೃತ್ವದಲ್ಲಿ 10 ಸದಸ್ಯರ ಅಧಿಕಾರಿಗಳ ನಿಯೋಗವು ರಾಜ್ಯಕ್ಕೆ ಆಗಮಿಸಿದೆ. ಹೆಚಿನ ಪ್ರದೇಶಗಳಲ್ಲಿ ಪರಿಶೀಲನೆ ನಡೆಸಲು ಅನುಕೂಲವಾಗುವಂತೆ ಈ ತಂಡವನ್ನು 3 ಉಪ-ತಂಡಗಳಾಗಿ ವಿಂಗಡಿಸಲಾಗಿದೆ.
ಪ್ರವಾಸದ ಪ್ರಮುಖ ವಿವರಗಳು:
ಅಕ್ಟೋಬರ್ 3: ಕೇಂದ್ರ ತಂಡವು ಬೆಂಗಳೂರಿಗೆ ಆಗಮಿಸಿ, ಮುಖ್ಯಮಂತ್ರಿಗಳು, ಉಪ ಮುಖ್ಯಮಂತ್ರಿಗಳು ಹಾಗೂ ಸರ್ಕಾರದ ಹಿರಿಯ ಅಧಿಕಾರಿಗಳೊಂದಿಗೆ ಪ್ರಾಥಮಿಕ ಸಭೆ ನಡೆಸಲಿದೆ. ತದನಂತರ ನಿಗದಿತ ಜಿಲ್ಲೆಗಳಿಗೆ ಪಯಣಿಸಲಿದೆ.
ಅಕ್ಟೋಬರ್ 4 ರಿಂದ 6: ವಿವಿಧ ಜಿಲ್ಲೆಗಳಲ್ಲಿ ಸ್ಥಳೀಯ ಜಿಲ್ಲಾಧಿಕಾರಿಗಳು ಸಿದ್ಧಪಡಿಸಿದ ಯೋಜನೆಯಂತೆ ಭೇಟಿ ನೀಡಿ ಕ್ಷೇತ್ರ ಮಟ್ಟದ ಪರಿಶೀಲನೆ ನಡೆಸಲಿವೆ.
ಅಕ್ಟೋಬರ್ 7: ಬೆಂಗಳೂರಿನಲ್ಲಿ ಸಮಾರೋಪ ಸಭೆ ಮುಗಿಸಿ ಕೇಂದ್ರ ತಂಡವು ದೆಹಲಿಗೆ ಹಿಂತಿರುಗಲಿದೆ.
ಉಪ-ತಂಡಗಳು ಹಾಗೂ ಭೇಟಿ ನೀಡುವ ಜಿಲ್ಲೆಗಳ ವಿವರ:
1ನೇ ತಂಡದ ನೇತೃತ್ವ ವಹಿಸಿರುವ ಅಜಿತ್ ಕುಮಾರ್ ಸಾಹು ಅವರು ತುಮಕೂರು, ಚಿತ್ರದುರ್ಗ, ದಾವಣಗೆರೆ ಮತ್ತು ವಿಜಯನಗರ ಜಿಲ್ಲೆಗಳಿಗೆ ಭೇಟಿ ನೀಡಿ ಪರಿಶೀಲನೆ ಮಾಡಲಿದ್ದಾರೆ.
ಇವರಿಗೆ ಇತರೆ ಸದಸ್ಯರಾದ ಲೆಫ್ಟಿನೆಂಟ್ ಕರ್ನಲ್ ಅಮರಿಂದರ್ ಸಿಂಗ್ (ನೀತಿ ಆಯೋಗ), ಡಾ. ಜೆ. ಹರ್ಷ (ಜಲಶಕ್ತಿ ಸಚಿವಾಲಯ) ಇವರು ಸಾಥ್ ನೀಡಲಿದ್ದಾರೆ.
2ನೇ ತಂಡದ ನೇತೃತ್ವ ವಹಿಸಿರುವ ಪಶುಸಂಗೋಪನೆ ಮತ್ತು ಕ್ಷೀರ ಅಭಿವೃದ್ಧಿ ಇಲಾಖೆ ಉಪ ಆಯುಕ್ತರಾದ ಡಾ. ಸುದಾಮ್ ಬಾಗ್ ಇವರು ಹಾಸನ, ಮೈಸೂರು, ಚಾಮರಾಜನಗರ ಮತ್ತು ಮಂಡ್ಯ, ಕೆ.ಆರ್.ಎಸ್ ಭೇಟಿ ಸೇರಿದಂತೆ ಇತರೆ ಕಡೆ ಪ್ರವಾಸ ಮಾಡಲಿದ್ದಾರೆ. ಇವರಿಗೆ ಇತರ ಸದಸ್ಯರಾದ ಆಶಿಶ್ ಪಾಂಡೆ, ಪ್ರದೀಪ್ ಕುಮಾರ್ ಮತ್ತು ಕರಣ್ ಚೌಧರಿ ಸಾಥ್ ನೀಡಲಿದ್ದಾರೆ.
3ನೇ ತಂಡದ ನೇತೃತ್ವ ವಹಿಸಿರುವ ಪಟ್ನಾದ ನೆಲ್ಲು ಅಭಿವೃದ್ಧಿ ಇಲಾಖೆ ನಿರ್ದೇಶಕ ಡಾ. ಮನ್ ಸಿಂಗ್ ಇವರು ಯಾದಗಿರಿ, ರಾಯಚೂರು, ಬಾಗಲಕೋಟೆ ಮತ್ತು ಕೊಪ್ಪಳ ಜಿಲ್ಲೆಗಳಲ್ಲಿ ಪ್ರವಾಸ ಮಾಡಲಿದ್ದಾರೆ.
ಇವರಿಗೆ ಇತರ ಸದಸ್ಯರಾದ ಪಾರ್ಥ ಪಾಲ್ (ವ್ಯಯ ಇಲಾಖೆ) ಹಾಗೂ ರಾಕೇಶ್ ಕುಮಾರ್ (ಗ್ರಾಮೀಣಾಭಿವೃದ್ಧಿ ಇಲಾಖೆ) ಇವರು ಸಾಥ್ ನೀಡಲಿದ್ದಾರೆ.
ಪ್ರತಿಯೊಂದು ಜಿಲ್ಲೆಯ ಜಿಲ್ಲಾಧಿಕಾರಿಗಳು ಬರ ಪರಿಸ್ಥಿತಿಯ ಕುರಿತು ನಿಯೋಗಕ್ಕೆ ಮಾಹಿತಿ ನೀಡಿ, ಸ್ಥಳೀಯವಾಗಿ ನಿಮಿಷದಿಂದ ನಿಮಿಷದ ಪರಿಶೀಲನಾ ಪ್ರವಾಸ ಕಾರ್ಯಕ್ರಮವನ್ನು ನಿರ್ವಹಿಸಲಿದ್ದಾರೆ.
