ಚಂದ್ರವಳ್ಳಿ ನ್ಯೂಸ್ ನವದೆಹಲಿ: ಗ್ರಾಹಕರ ಹಿತದೃಷ್ಟಿಯಿಂದ ಕೇಂದ್ರ ಸರ್ಕಾರವು ಮಹತ್ವದ ನಿರ್ಧಾರವೊಂದನ್ನು ಕೈಗೊಂಡಿದ್ದು, ಸೋಪ್, ಶಾಂಪೂ, ಟೂತ್‌ಪೇಸ್ಟ್ ಸೇರಿದಂತೆ ಎಲ್ಲಾ ರೀತಿಯ ಸೌಂದರ್ಯವರ್ಧಕ ಹಾಗೂ ಬಾತ್ ರೂಮ್ ಬಳಕೆಯ ಉತ್ಪನ್ನಗಳ ಪ್ಯಾಕೇಜಿಂಗ್ ಮೇಲೂ 'ಸಸ್ಯಾಹಾರಿ' ಅಥವಾ 'ಮಾಂಸಾಹಾರಿ' ಮೂಲದ್ದೇ ಎಂಬುದನ್ನು ತಿಳಿಸುವ ಬಣ್ಣದ ಗುರುತುಗಳನ್ನು ಹಾಕುವುದು ಇನ್ನು ಮುಂದೆ ಕಡ್ಡಾಯವಾಗಿದೆ.
ಆಹಾರ ಪದಾರ್ಥಗಳ ಮೇಲಿರುವಂತೆಯೇ, ಇನ್ಮುಂದೆ ಈ ಉತ್ಪನ್ನಗಳ ಪ್ಯಾಕೇಜ್ ಮೇಲೂ ಕಡ್ಡಾಯವಾಗಿ ಹಸಿರು ಅಥವಾ ಕೆಂಪು/ಕಂದು ಬಣ್ಣದ ಚುಕ್ಕೆ ಇರಲಿದೆ.
ಹೊಸ ನಿಯಮಗಳ ಪ್ರಮುಖ ಮುಖ್ಯಾಂಶಗಳು:
ಸಸ್ಯಾಹಾರಿ (Veg) ಉತ್ಪನ್ನಗಳಿಗೆ: ಉತ್ಪನ್ನವು ಸಂಪೂರ್ಣ ಸಸ್ಯಾಹಾರಿ ಮೂಲದ್ದಾಗಿದ್ದರೆ ಪ್ಯಾಕೇಜ್ ಮೇಲೆ ಹಸಿರು ಚುಕ್ಕೆ (Green Dot) ಇರಲಿದೆ.
ಮಾಂಸಾಹಾರಿ (Non-Veg) ಉತ್ಪನ್ನಗಳಿಗೆ: ಉತ್ಪನ್ನದಲ್ಲಿ ಮಾಂಸಾಹಾರಿ ಅಥವಾ ಪ್ರಾಣಿಜನ್ಯ ಪದಾರ್ಥಗಳ ಬಳಕೆಯಾಗಿದ್ದರೆ ಕೆಂಪು ಅಥವಾ ಕಂದು ಬಣ್ಣದ ಚುಕ್ಕೆ (Red or Brown Dot) ಹಾಕುವುದು ಕಡ್ಡಾಯ.
ಗುರುತಿನ ಸ್ಥಳ: ಈ ಬಣ್ಣದ ಗುರುತನ್ನು ಪ್ಯಾಕೇಜ್‌ನ ಪ್ರಮುಖ ಪ್ರದರ್ಶನ ಫಲಕದ (Principal Display Panel) ಮೇಲ್ಭಾಗದಲ್ಲೇ ಗ್ರಾಹಕರಿಗೆ ಎದ್ದು ಕಾಣುವಂತೆ ಅಳವಡಿಸಬೇಕು.
ತಕ್ಷಣದಿಂದಲೇ ಜಾರಿಗೆ:
ಗ್ರಾಹಕ ವ್ಯವಹಾರಗಳ ಸಚಿವಾಲಯವು 'ಲೀಗಲ್ ಮೆಟ್ರಾಲಜಿ (ಪ್ಯಾಕೇಜ್ಡ್ ಕಮಾಡಿಟೀಸ್) ನಿಯಮಗಳು, 2011'ಕ್ಕೆ ತಿದ್ದುಪಡಿ ತರುವ ಮೂಲಕ ಈ ಹೊಸ ಬದಲಾವಣೆಯನ್ನು ತಂದಿದ್ದು, ಈ ಕುರಿತು ಅಧಿಸೂಚನೆ ಹೊರಡಿಸಿದೆ. ಈ ನಿಯಮಗಳು ತಕ್ಷಣದಿಂದಲೇ (ಸೋಮವಾರದಿಂದ) ಜಾರಿಗೆ ಬಂದಿವೆ.
ಈ ಹೊಸ ನಿಯಮದಿಂದಾಗಿ ಇನ್ಮುಂದೆ ಸಾರ್ವಜನಿಕರು ಸೋಪ್, ಶಾಂಪೂ ಅಥವಾ ಟೂತ್‌ಪೇಸ್ಟ್ ಖರೀದಿಸುವಾಗ ಪ್ಯಾಕೇಜ್ ಮೇಲಿರುವ ಬಣ್ಣದ ಗುರುತನ್ನು ನೋಡಿ, ತಮ್ಮ ನೆಚ್ಚಿನ ಹಾಗೂ ಸೂಕ್ತ ಉತ್ಪನ್ನಗಳನ್ನು ಸುಲಭವಾಗಿ ಆಯ್ಕೆ ಮಾಡಿಕೊಳ್ಳಲು ಸಾಧ್ಯವಾಗಲಿದೆ.
