ಚಂದ್ರವಳ್ಳಿ ನ್ಯೂಸ್, ಹುಬ್ಬಳ್ಳಿ:
ನೈಋತ್ಯ ರೈಲ್ವೆ ಪ್ರಧಾನ ಕಚೇರಿಯಲ್ಲಿ ವಿಚಕ್ಷಣಾ ಜಾಗೃತಿ ಸಪ್ತಾಹ-2024 ರ ಉದ್ಘಾಟನಾ ಕಾರ್ಯಕ್ರಮ ನಡೆಯಿತು. ನೈಋತ್ಯ ರೈಲ್ವೆಯ ಪ್ರಧಾನ ವ್ಯವಸ್ಥಾಪಕ ಅರವಿಂದ್ ಶ್ರೀವಾಸ್ತವ ಪ್ರಧಾನ ಕಚೇರಿಯ ಅಧಿಕಾರಿಗಳು ಮತ್ತು ಸಿಬ್ಬಂದಿಗೆ ಪ್ರತಿಜ್ಞೆ ಬೋಧಿಸಿದರು ಮತ್ತು ವಿಚಕ್ಷಣಾ ಜಾಗೃತಿ ವಿಷಯದ ಪೋಸ್ಟರ್ ಗಳನ್ನು ಅನಾವರಣಗೊಳಿಸಿದರು.
ನೈಋತ್ಯ ರೈಲ್ವೆಯ ಹಿರಿಯ ಉಪ ಪ್ರಧಾನ ವ್ಯವಸ್ಥಾಪಕ ಮತ್ತು ಮುಖ್ಯ ವಿಚಕ್ಷಣಾ ಅಧಿಕಾರಿ ಎ. ಅಣ್ಣಾದೊರೈ ಅವರು ನೈಋತ್ಯ ರೈಲ್ವೆಯಲ್ಲಿ ವಿಚಕ್ಷಣಾ ಜಾಗೃತಿ ಸಪ್ತಾಹ 2024 ರ ಭಾಗವಾಗಿ ಆಯೋಜಿಸಲಾದ ವಿವಿಧ ಚಟುವಟಿಕೆಗಳ ಅವಲೋಕನ ಮಾಡಿ ಸಾಮೂಹಿಕ ಜಾಗರೂಕತೆಯ ಮಹತ್ವ ಒತ್ತಿಹೇಳಿದರು, ನೈತಿಕ ಮಾನದಂಡಗಳನ್ನು ಕಾಪಾಡಿಕೊಳ್ಳುವಲ್ಲಿ ಪ್ರತಿಯೊಬ್ಬರ ಪಾತ್ರವಿದೆ ಎಂದರು.
ಆರ್ಥಿಕ ಬೆಳವಣಿಗೆ, ಸಾಮಾಜಿಕ ನ್ಯಾಯ ಮತ್ತು ಸಾರ್ವಜನಿಕ ನಂಬಿಕೆಯ ಮೇಲೆ ಭ್ರಷ್ಟಾಚಾರದ ಹಾನಿಕಾರಕ ಪರಿಣಾಮಗಳನ್ನು ಅವರು ಎತ್ತಿ ತೋರಿಸಿದರು. ದೈನಂದಿನ ಜೀವನದಲ್ಲಿ ಪ್ರಾಮಾಣಿಕತೆ ಮತ್ತು ಪಾರದರ್ಶಕತೆಯನ್ನು ಬೆಳೆಸುವಲ್ಲಿ ಉದ್ಯೋಗಿಗಳು, ಮಧ್ಯಸ್ಥಗಾರರು ಮತ್ತು ನಾಗರಿಕರ ಸಕ್ರಿಯ ಪಾಲ್ಗೊಳ್ಳುವಿಕೆಗೆ ಕರೆ ನೀಡಿದರು.
ಕಾರ್ಯಕ್ರಮದ ನಂತರ ಜನರಲ್ ಮ್ಯಾನೇಜರ್ ಮತ್ತು ಹಿರಿಯ ಅಧಿಕಾರಿಗಳು ರೈಲ್ವೆ ಸೌಧದ ಸಮಗ್ರತೆ ಉದ್ಯಾನದಲ್ಲಿರುವ ಸರ್ದಾರ್ ವಲ್ಲಭಭಾಯಿ ಪಟೇಲ್ ಅವರ ಪ್ರತಿಮೆಗೆ ಪುಷ್ಪ ನಮನ ಸಲ್ಲಿಸಿದರು. ನೈಋತ್ಯ ರೈಲ್ವೆಯ ಎಲ್ಲಾ ವಿಭಾಗಗಳು, ಘಟಕಗಳು ಮತ್ತು ಕಚೇರಿಗಳಲ್ಲಿ ವಿಚಕ್ಷಣಾ ಪ್ರತಿಜ್ಞೆಯನ್ನು ಸಹ ನಿರ್ವಹಿಸಲಾಯಿತು.
ರೈಲ್ವೆ ಸೌಧದಲ್ಲಿ “ಸೈಬರ್ ನೈರ್ಮಲ್ಯ ಮತ್ತು ಭದ್ರತೆ” ಕುರಿತು ವಿಚಾರ ಸಂಕಿರಣ ನಡೆಸಲಾಯಿತು. ಇದರಲ್ಲಿ ಸೈಬರ್ ಅಪರಾಧ ತನಿಖಾಧಿಕಾರಿ ಮತ್ತು ಸೈಬರ್ ವಿಧಿವಿಜ್ಞಾನ ತಜ್ಞ ಸಂದೀಪ್ ಪ್ರಕಾಶ್ ಚಂದ್ ಗಾಡಿಯಾ ಭಾಗವಹಿಸಿದ್ದರು.
ಅಧಿವೇಶನವು ಪ್ರಚಲಿತ ಸೈಬರ್ ಅಪರಾಧಗಳನ್ನು ಮತ್ತು ಸೈಬರ್ ವಂಚನೆ ಮತ್ತು ಸೈಬರ್ ಅಪರಾಧದಿಂದ ರಕ್ಷಿಸಲು ಉತ್ತಮ ಅಭ್ಯಾಸಗಳನ್ನು ಒದಗಿಸಿದರು ಎಂದು ಮುಖ್ಯ ಸಾರ್ವಜನಿಕ ಸಂಪರ್ಕ ಅಧಿಕಾರಿ ಡಾ. ಮಂಜುನಾಥ ಕನಮಡಿ ಮಾಹಿತಿ ನೀಡಿದ್ದಾರೆ.
