ಚಂದ್ರವಳ್ಳಿ ನ್ಯೂಸ್, ಚಿತ್ರದುರ್ಗ:
ಬಯಲುಸೀಮೆಯ ಜನರ ದಶಕಗಳ ಕನಸಾದ *‘ಭದ್ರಾ ಮೇಲ್ದಂಡೆ ಯೋಜನೆ‘*ಗೆ ಕಾಯಕಲ್ಪ ನೀಡಲು ಸಿರಿಗೆರೆ ತರಳಬಾಳು ಬೃಹನ್ಮಠದ ಜಗದ್ಗುರುಗಳಾದ ಡಾ. ಶ್ರೀ ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳವರು ಸೊಂಟ ಕಟ್ಟಿ ನಿಂತಿದ್ದಾರೆ.
ಈ ಮಹತ್ವಾಕಾಂಕ್ಷಿ ಯೋಜನೆಯ ಶೀಘ್ರ ಜಾರಿಗಾಗಿ ಶ್ರೀಗಳು ತಮ್ಮ ಮಠದ ಯುಗಾದಿ ಹಬ್ಬದ ಆಚರಣೆಯನ್ನು ಬದಿಗೊತ್ತಿ, ಮೂರು ದಿನ ಮುಂಚಿತವಾಗಿಯೇ ದೆಹಲಿಗೆ ಪ್ರಯಾಣ ಬೆಳೆಸುವ ಮೂಲಕ ರೈತಪರ ಕಾಳಜಿ ಮೆರೆದಿದ್ದಾರೆ ಎಂದು ರೈತ ಪರ ಸಂಘಟನೆಗಳು ಮೆಚ್ಚುಗೆ ಸೂಚಿಸಿವೆ.
ಹಿನ್ನೆಲೆ: ಫೆಬ್ರವರಿ 27ರ ಮಹತ್ವದ ಸಭೆ-
ಕಳೆದ ಫೆಬ್ರವರಿ 27ರಂದು ಸಿರಿಗೆರೆ ಮಠದಲ್ಲಿ ಸಂಸದರು, ಶಾಸಕರು ಮತ್ತು ಉನ್ನತ ಅಧಿಕಾರಿಗಳ ಉಪಸ್ಥಿತಿಯಲ್ಲಿ ನಡೆದ ಸಭೆಯು ಈ ಆಂದೋಲನಕ್ಕೆ ಹೊಸ ವೇಗ ನೀಡಿದೆ. ಈ ಸಭೆಯಲ್ಲಿ ತಾಂತ್ರಿಕ ಅಂಶಗಳನ್ನು ಚರ್ಚಿಸಲಾಗಿದ್ದು, ಯೋಜನೆಯನ್ನು *‘ರಾಷ್ಟ್ರೀಯ ಯೋಜನೆ‘*ಗೆ ಬದಲಾಗಿ ಕೇಂದ್ರದ ‘ಕೃಷಿ ಸಿಂಚಾಯಿ ಯೋಜನೆ‘ ಅಡಿಯಲ್ಲಿ ಸೇರಿಸಲು ನಿರ್ಧರಿಸಲಾಗಿದೆ.
ಯೋಜನೆಯ ಆರ್ಥಿಕ ಸ್ವರೂಪ:
ಒಟ್ಟು ಅಗತ್ಯ ಅನುದಾನ: ₹10,000 ಕೋಟಿ.
ಕೇಂದ್ರದ ಪಾಲು (60%): ₹6,000 ಕೋಟಿ.
ರಾಜ್ಯದ ಪಾಲು (40%): ₹4,000 ಕೋಟಿ.
ದೆಹಲಿ ಸಭೆಯ ಕಾರ್ಯಸೂಚಿ-
ಮಾರ್ಚ್ 20ರಂದು ಮಧ್ಯಾಹ್ನ 3 ಗಂಟೆಗೆ ದೆಹಲಿಯಲ್ಲಿ ತಾಂತ್ರಿಕ ನೀರಾವರಿ ಸಲಹಾ ಸಮಿತಿಯ ಮಹತ್ವದ ಸಭೆ ನಡೆಯಲಿದೆ. ಇದಕ್ಕೂ ಮುನ್ನ ಶ್ರೀಗಳು ಕೇಂದ್ರ ಸಚಿವರು ಮತ್ತು ಅಧಿಕಾರಿಗಳನ್ನು ಭೇಟಿ ಮಾಡಿ, ಬಯಲುಸೀಮೆಯ ಬರಗಾಲದ ಭೀಕರತೆಯನ್ನು ಮನವರಿಕೆ ಮಾಡಿಕೊಡಲಿದ್ದಾರೆ. ಭದ್ರಾ ಮೇಲ್ದಂಡೆ ಯೋಜನೆಯನ್ನು ಕೃಷಿ ಸಿಂಚಾಯಿ ಯೋಜನೆಯಲ್ಲಿ ಸೇರ್ಪಡೆಗೊಳಿಸುವುದು ಶ್ರೀಗಳ ಪ್ರಮುಖ ಗುರಿಯಾಗಿದೆ.
ಕೇವಲ ನೀರಾವರಿಗಷ್ಟೇ ಸೀಮಿತವಲ್ಲದ ಹೋರಾಟ-ನೀರಾವರಿ ಯೋಜನೆಗಳ ಜೊತೆಗೆ ಶ್ರೀಗಳು ರೈತ ಮತ್ತು ಕಾರ್ಮಿಕ ವರ್ಗದ ಇತರ ಸಮಸ್ಯೆಗಳಿಗೂ ಧ್ವನಿಯಾಗಲಿದ್ದಾರೆ:
ಫಸಲ್ ಬಿಮಾ ಯೋಜನೆ: ರೈತರಿಗೆ ಹೊರೆಯಾಗುತ್ತಿರುವ ಪ್ರಸ್ತುತ ಬೆಳೆ ವಿಮೆ ಯೋಜನೆಯ ನ್ಯೂನತೆಗಳ ಬಗ್ಗೆ ಕೇಂದ್ರ ಕೃಷಿ ಸಚಿವರೊಂದಿಗೆ ಚರ್ಚೆ.
ವಿಐಎಸ್ಎಲ್ ಪುನರುಜ್ಜೀವನ: ಭದ್ರಾವತಿಯ ವಿಐಎಸ್ಎಲ್ ಕಾರ್ಖಾನೆಯನ್ನು ಉಳಿಸಲು ಉಕ್ಕು, ಗಣಿ ಮತ್ತು ಹಣಕಾಸು ಸಚಿವರ ಭೇಟಿ.
”ಅನೇಕ ಏತ ನೀರಾವರಿ ಯೋಜನೆಗಳನ್ನು ಯಶಸ್ವಿಯಾಗಿ ಜಾರಿಗೊಳಿಸಿ ‘ಆಧುನಿಕ ಭಗೀರಥ‘ ಎಂದೇ ಖ್ಯಾತರಾಗಿರುವ ಸಿರಿಗೆರೆ ಶ್ರೀಗಳು ಈಗ ಭದ್ರಾ ಮೇಲ್ದಂಡೆ ಯೋಜನೆಯ ಜವಾಬ್ದಾರಿ ಹೊತ್ತುಕೊಂಡಿರುವುದು ರೈತರಲ್ಲಿ ಹೊಸ ಭರವಸೆ ಮೂಡಿಸಿದೆ.”
ಹೆಚ್.ಆರ್. ಬಸವರಾಜಪ್ಪ, ರಾಜ್ಯಾಧ್ಯಕ್ಷರು, ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ಹಸಿರುಸೇನೆ.
ಬರಡು ಭೂಮಿಗೆ ಜೀವಜಲ ತರಲು ಹಗಲಿರುಳು ಶ್ರಮಿಸುತ್ತಿರುವ ಪೂಜ್ಯ ಶ್ರೀಗಳ ಈ ರೈತಪರ ಕಾಳಜಿಗೆ ರಾಜ್ಯದ ಸಮಸ್ತ ರೈತಕುಲ ಅಭಿನಂದನೆಗಳನ್ನು ಸಲ್ಲಿಸುತ್ತಿದೆ.
ಹೆಚ್.ಆರ್.ತಿಮ್ಮಯ್ಯ, ರೈತ ಹೋರಾಟಗಾರರು, ಹಿರಿಯೂರು.
