ತಿಂಗಳಿನಿಂದ ರಸ್ತೆಯಲ್ಲೇ ಹರಿಯುತ್ತಿದೆ ಒಳಚರಂಡಿ ನೀರು! ಎಚ್ಚೆತ್ತುಕೊಳ್ಳದ ನಗರಸಭೆ
ಚಂದ್ರವಳ್ಳಿ ನ್ಯೂಸ್, ಚಿತ್ರದುರ್ಗ:
ನಗರದ ಸೂರ್ಯಪುತ್ರ ಸರ್ಕಲ್ ಬಳಿ ಇರುವ ಐ.ಯು.ಡಿ.ಪಿ ಬಡಾವಣೆಯ 11ನೇ ಕ್ರಾಸ್ ರಸ್ತೆ ಬಳಿಯ ನಿವಾಸಿಗಳ ಬದುಕು ಈಗ ನರಕಸದೃಶವಾಗಿದೆ.
ಕಳೆದ ಒಂದು ತಿಂಗಳಿನಿಂದ ಇಲ್ಲಿನ ಒಳಚರಂಡಿ ವ್ಯವಸ್ಥೆಯು ಸಂಪೂರ್ಣವಾಗಿ ಹದಗೆಟ್ಟಿದ್ದು, ಮಲಿನ ನೀರು ರಸ್ತೆಯ ಮೇಲೆ ರಾಜಾರೋಷವಾಗಿ ಹರಿಯುತ್ತಿದೆ.
ಸಾರ್ವಜನಿಕರ ಆಕ್ರೋಶ:
ಒಳಚರಂಡಿ ಪೈಪ್ಲೈನ್ನಲ್ಲಿ ತಡೆ ಉಂಟಾಗಿರುವುದರಿಂದ ಕೊಳಚೆ ನೀರು ಹೊರಬರುತ್ತಿದ್ದು, ಸುತ್ತಮುತ್ತಲಿನ ಪರಿಸರವನ್ನೆಲ್ಲ ಹಾಳುಮಾಡುತ್ತಿದೆ. ಈ ಬಗ್ಗೆ ನಗರಸಭೆ ಅಥವಾ ಸಂಬಂಧಪಟ್ಟ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದರೂ ಸಹ, ಇದುವರೆಗೂ ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ಸ್ಥಳೀಯ ನಿವಾಸಿಗಳು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ರೋಗ ಭೀತಿಯಲ್ಲಿ ನಿವಾಸಿಗಳು:
ರಸ್ತೆಯ ತುಂಬೆಲ್ಲಾ ಗಲೀಜು ನೀರು ನಿಂತಿರುವುದರಿಂದ ವಿಪರೀತ ದುರ್ನಾತ ಹರಡಿದೆ. ಇದರಿಂದಾಗಿ ಈ ಭಾಗದ ಜನರು ಮನೆಯ ಕಿಟಕಿ-ಬಾಗಿಲುಗಳನ್ನು ತೆರೆಯಲು ಸಾಧ್ಯವಾಗದ ಸ್ಥಿತಿ ನಿರ್ಮಾಣವಾಗಿದೆ. ಅಷ್ಟೇ ಅಲ್ಲದೆ, ಸೊಳ್ಳೆಗಳ ಕಾಟ ಹೆಚ್ಚಾಗಿದ್ದು, ಸಾಂಕ್ರಾಮಿಕ ರೋಗಗಳು ಹರಡುವ ಭೀತಿ ಎದುರಾಗಿದೆ. ನಗರಸಭಾ ಅಧಿಕಾರಿಗಳ ನಿರ್ಲಕ್ಷ್ಯ ಎದ್ದು ಕಾಣುತ್ತಿದ್ದು ಕೂಡಲೇ ಈ ಅವ್ಯವಸ್ಥೆ ಸರಿ ಪಡಿಸಬೇಕೆಂದು ಸಾರ್ವಜನಿಕರ ಹಕ್ಕೊತ್ತಾಯವಾಗಿದೆ.
ಸವಾರರ ಹರಸಾಹಸ:
ದ್ವಿಚಕ್ರ ವಾಹನ ಸವಾರರು ಮತ್ತು ಪಾದಚಾರಿಗಳು ಈ ಗಲೀಜು ನೀರಿನಲ್ಲೇ ಸಂಚರಿಸಬೇಕಾದ ಅನಿವಾರ್ಯತೆ ಇದೆ. ಅನೇಕ ಬಾರಿ ವಾಹನಗಳು ಈ ನೀರಿನಲ್ಲಿ ಜಾರಿ ಬೀಳುವ ಪ್ರಸಂಗಗಳೂ ಸಂಭವಿಸುತ್ತಿವೆ.
ಹಕ್ಕೊತ್ತಾಯ:
“ನಾವು ತೆರಿಗೆ ಕಟ್ಟುತ್ತಿದ್ದರೂ ನಮಗೆ ಕನಿಷ್ಠ ಸ್ವಚ್ಛ ಪರಿಸರ ಸಿಗುತ್ತಿಲ್ಲ. ಅಧಿಕಾರಿಗಳು ಕೂಡಲೇ ಸ್ಥಳಕ್ಕೆ ಭೇಟಿ ನೀಡಿ ಈ ಒಳಚರಂಡಿ ಸಮಸ್ಯೆಯನ್ನು ಶಾಶ್ವತವಾಗಿ ಬಗೆಹರಿಸಬೇಕು” ಎಂದು ನಿವಾಸಿಗಳಾದ ಎನ್. ಚಂದ್ರಾರೆಡ್ಡಿ, ಶಿವಣ್ಣ, ಕರೀಂ, ಎಂ.ಜಿ ರವಿ, ರವಿಶಂಕರ್, ಗುಂಡಣ್ಣ, ರೋಹಿತ್ ಹಾಗೂ ಬಡಾವಣೆಯ ಇತರ ನಿವಾಸಿಗಳು ಒತ್ತಾಯಿಸಿದ್ದಾರೆ.
