ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಕೇಳಿದ ಕಡೆಗೆ ಬರಲು ಹಿಂಜರಿಯುವ ಆಟೋ ಚಾಲಕರ ನಡುವೆ, ಮೂರು ಚಕ್ರದ ವಾಹನದಲ್ಲೇ ಬೆಂಗಳೂರಿನಿಂದ ಲಡಾಖ್‌ವರೆಗೆ ಭರ್ಜರಿ 8,900 ಕಿಲೋಮೀಟರ್ ಪ್ರಯಾಣಿಸಿ ಸಾಧನೆ ಮೆರೆದಿದ್ದಾರೆ ಮೈಸೂರು ಮೂಲದ, ಬೆಂಗಳೂರಿನ ಸರ್ಜಾಪುರ ನಿವಾಸಿ ಬಾಲಕೃಷ್ಣ ಮೋಹನ್ (35).
ಕೇವಲ 8 ರಿಂದ 10 ದಿನಗಳಲ್ಲಿ ಈ ಕಠಿಣ ಹಾಗೂ ಸುದೀರ್ಘ ಹಾದಿಯನ್ನು ಕ್ರಮಿಸುವ ಮೂಲಕ ಈ ಸಾಹಸ ಗೈದ ಮೊದಲ ಕನ್ನಡಿಗ ಎಂಬ ಅಪರೂಪದ ಹೆಗ್ಗಳಿಕೆಗೆ ಬಾಲಕೃಷ್ಣ ಪಾತ್ರರಾಗಿದ್ದಾರೆ.
ಸಾಹಸಮಯ ಪಯಣ ಆರಂಭವಾಗಿದ್ದು ಹೇಗೆ?
ಆಗಸ್ಟ್ 1 ರಂದು ಬೆಂಗಳೂರಿನ ವಿಧಾನಸೌಧದ ಮುಂಭಾಗದಿಂದ ಪ್ರಯಾಣ ಆರಂಭಿಸಿದ ಬಾಲಕೃಷ್ಣ, ಹೈದರಾಬಾದ್, ನಾಗಪುರ, ಆಗ್ರಾ, ದೆಹಲಿ, ಅಮೃತಸರ ಹಾಗೂ ಜಮ್ಮು ಮಾರ್ಗವಾಗಿ ಸಾಗಿ 8 ನೇ ದಿನಕ್ಕೆ ಶ್ರೀನಗರ ತಲುಪಿದರು. ಅಲ್ಲಿಂದ ಮುಂದುವರಿದು ಒಟ್ಟು 10 ದಿನಗಳ ಅವಧಿಯಲ್ಲಿ ಯಶಸ್ವಿಯಾಗಿ ಲಡಾಖ್ ತಲುಪಿದರು. ಯೂಟ್ಯೂಬರ್ ‘69 ವಂಡರ್‌ಲಸ್ಟ್’ (ನಿಖಿಲ್) ಅವರ ಸಾಹಸ ವಿಡಿಯೋಗಳಿಂದ ಪ್ರೇರಿತರಾದ ಇವರು, ಆಟೋ ಚಾಲಕನಾಗಿಯಷ್ಟೇ ಉಳಿಯದೆ ಹೊಸತೇನನ್ನಾದರೂ ಸಾಧಿಸುವ ಛಲದಿಂದ ಈ ಸಾಹಸಕ್ಕೆ ಕೈಹಾಕಿದರು. ಪ್ರಯಾಣಕ್ಕಾಗಿ ತಮ್ಮ ಹಳೆಯ ಆಟೋ ಬದಲಿಗೆ 8 ತಿಂಗಳಷ್ಟೇ ಹಳೆಯದಾದ ಆಟೋ ಖರೀದಿಸಿ, ಯೆಲ್ಲೋ ಬೋರ್ಡ್ ಅನ್ನು ವೈಟ್ ಬೋರ್ಡ್‌ಗೆ ಪರಿವರ್ತಿಸಿಕೊಂಡಿದ್ದರು.
ಸವಾಲುಗಳನ್ನು ಮೆಟ್ಟಿ ನಿಂತು ಸಾಧನೆ:
ಯಾವುದೇ ಸ್ಪಾನ್ಸರ್‌ಶಿಪ್ ಇಲ್ಲದೆ, ಸ್ವಂತ ಹಣ ಹಾಗೂ ಸಾಲ ಮಾಡಿ ಸುಮಾರು 1.8 ರಿಂದ 2 ಲಕ್ಷ ರೂಪಾಯಿ ವೆಚ್ಚದಲ್ಲಿ ಬಾಲಕೃಷ್ಣ ಈ ಸಾಹಸ ಪೂರ್ಣಗೊಳಿಸಿದ್ದಾರೆ.
ಸಾಹಸದ ಶಿಖರ: ಲಡಾಖ್ ತಲುಪಿದ ಬಳಿಕ ಖರ್ದುಂಗ್ ಲಾ, ಫೋಟು ಲಾ ಸೇರಿದಂತೆ ಪ್ರಮುಖ ಪರ್ವತ ಮಾರ್ಗಗಳನ್ನು ಕ್ರಮಿಸಿ, ಸಮುದ್ರ ಮಟ್ಟದಿಂದ ಬರೋಬ್ಬರಿ 19,024 ಅಡಿ ಎತ್ತರದಲ್ಲಿರುವ ಜಗತ್ತಿನ ಅತ್ಯಂತ ಎತ್ತರದ ಮೋಟಾರು ರಸ್ತೆ 'ಉಮ್ಲಿಂಗ್ ಲಾ ಪಾಸ್' ತಲುಪಿ ತ್ರಿವರ್ಣ ಧ್ವಜ ಹಾರಿಸಿದರು.
ಎದುರಾದ ಅಡೆತಡೆಗಳು: ದಾರಿಯುದ್ದಕ್ಕೂ ಭಾರಿ ಮಳೆ, ಭೂಕುಸಿತದ ಕಾರಣ ದೆಹಲಿಯಲ್ಲಿ ಎರಡು ದಿನ ಕಾಯಬೇಕಾಯಿತು. ಜಮ್ಮುವಿನಿಂದ ಮುಂದೆ ಸಿಎನ್‌ಜಿ ಸಿಗದ ಕಾರಣ ಪೆಟ್ರೋಲ್‌ನಲ್ಲೇ ಆಟೋ ಓಡಿಸಬೇಕಾಯಿತು. ವೆಚ್ಚ ಕಡಿಮೆ ಮಾಡಲು ಟೆಂಟ್, ಸ್ಲೀಪಿಂಗ್ ಬ್ಯಾಗ್ ಹಾಗೂ ಡಾರ್ಮಿಟರಿಗಳನ್ನು ಬಳಸಿಕೊಂಡರು.
ಆಗಸ್ಟ್ 24 ರಂದು ಹಿಮಾಚಲ ಪ್ರದೇಶ ಹಾಗೂ ಅಟಲ್ ಟನಲ್ ಮಾರ್ಗವಾಗಿ ಮರಳಿ ಬೆಂಗಳೂರಿನತ್ತ ಪ್ರಯಾಣ ಬೆಳೆಸಿರುವ ಬಾಲಕೃಷ್ಣ ಅವರ ಈ ಸಾಹಸಕ್ಕೆ ಸಾರ್ವಜನಿಕರು ಹಾಗೂ ಮಾಧ್ಯಮಗಳಿಂದ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ. "ಮುಂದಿನ ದಿನಗಳಲ್ಲಿ ಉತ್ತಮ ಪ್ರಾಯೋಜಕತ್ವ ದೊರೆತರೆ ಕನ್ಯಾಕುಮಾರಿಯವರೆಗೂ ಆಟೋ ಪ್ರಯಾಣ ಬೆಳೆಸುವ ಆಸೆಯಿದೆ" ಎಂದು ಬಾಲಕೃಷ್ಣ ಹರ್ಷ ವ್ಯಕ್ತಪಡಿಸಿದ್ದಾರೆ.
