ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಅಮೆರಿಕದ ಫಿಲಡೆಲ್ಫಿಯಾದಲ್ಲಿ ಆಯೋಜಿಸಲಾಗಿರುವ 'ಅಕ್ಕ (AKKA) ರಜತ ಮಹೋತ್ಸವದ ವಿಶ್ವ ಕನ್ನಡ ಸಮ್ಮೇಳನ'ವನ್ನು ಉದ್ದೇಶಿಸಿ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಬೆಂಗಳೂರಿನಿಂದ ವಿಡಿಯೋ ಕಾನ್ಫರೆನ್ಸ್ ಮೂಲಕ ಭಾಷಣ ಮಾಡಿದರು. ಕನ್ನಡ, ಕರ್ನಾಟಕ ಹಾಗೂ ರಾಜ್ಯದ ಭವಿಷ್ಯದ ಅಭಿವೃದ್ಧಿಯ ಕುರಿತು ಸಿಎಂ ತಮ್ಮ ದೃಷ್ಟಿಕೋನವನ್ನು ಹಂಚಿಕೊಂಡರು.
ಕನ್ನಡ ಎಂದರೆ ಜೀವನ ವಿಧಾನ: ಕನ್ನಡಿಗ ಎಂದರೆ ಕೇವಲ ಭಾಷೆಯಲ್ಲ, ಅದೊಂದು ಸಂಸ್ಕೃತಿ, ಜೀವನ ವಿಧಾನ ಮತ್ತು ಮೌಲ್ಯಗಳ ಪರಂಪರೆ. ನಮ್ಮಲ್ಲಿ ಮಲೆನಾಡು, ಕರಾವಳಿ, ಕಲ್ಯಾಣ, ಕಿತ್ತೂರು ಹಾಗೂ ಹಳೆ ಮೈಸೂರು ಭಾಗದ ವೈವಿಧ್ಯಮಯ ಸಂಸ್ಕೃತಿಯ ಜೊತೆಗೆ ವಚನಕಾರರು, ದಾಸರು ಮತ್ತು ಕುವೆಂಪು ಅವರ ವಿಶ್ವಮಾನವ ಸಂದೇಶದ ಸಾರವಿದೆ.
2037ರ ಜಾಗತಿಕ ಕರ್ನಾಟಕದ ಕನಸು: ಕರ್ನಾಟಕವನ್ನು ಭಾರತದಲ್ಲಿ ಮಾತ್ರವಲ್ಲದೆ, ಜಗತ್ತೇ ಮೆಚ್ಚುವ ಅವಕಾಶಗಳ ಕೇಂದ್ರವಾಗಿ ರೂಪಿಸುವ ಕನಸಿದೆ.
2037ರ ವೇಳೆಗೆ ರಾಜ್ಯವನ್ನು ಜಾಗತಿಕ ಮಟ್ಟದಲ್ಲಿ ಅತ್ಯುನ್ನತ ಎತ್ತರಕ್ಕೆ ಕೊಂಡೊಯ್ಯುವ ನಿಟ್ಟಿನಲ್ಲಿ ಆಡಳಿತದಲ್ಲಿ ಅಗತ್ಯ ಬದಲಾವಣೆ ಹಾಗೂ ಯುವಕರ ಭವಿಷ್ಯ ಭದ್ರಪಡಿಸುವ ಕೆಲಸಗಳು ನಡೆಯುತ್ತಿವೆ.
100 ದಿನಗಳ ಪಯಣ: ಇನ್ನೇನು ಸೆಪ್ಟೆಂಬರ್ 10ಕ್ಕೆ ಸರ್ಕಾರ ಅಧಿಕಾರಕ್ಕೆ ಬಂದು 100 ದಿನಗಳು ಪೂರ್ಣಗೊಳ್ಳುತ್ತಿದ್ದು, ಈ ಅಲ್ಪ ಅವಧಿಯಲ್ಲೇ ಹೊಸ ಕಾರ್ಯಕ್ರಮ ಹಾಗೂ ಆಡಳಿತಾತ್ಮಕ ಬದಲಾವಣೆಗಳ ಮೂಲಕ ಹೊಸ ದಿಕ್ಸೂಚಿ ನೀಡಲಾಗಿದೆ.
ಅಕ್ಕ ಸಂಸ್ಥೆಗೆ ಅಭಿನಂದನೆ: 25 ವರ್ಷಗಳನ್ನು ಪೂರೈಸಿರುವ 'ಅಕ್ಕ' ಸಂಸ್ಥೆಯು ಅಮೆರಿಕದಲ್ಲಿ ಕನ್ನಡದ ಸಂಸ್ಕೃತಿಯನ್ನು ಮುಂದಿನ ಪೀಳಿಗೆಗೆ ತಲುಪಿಸುವಲ್ಲಿ ಮಹತ್ವದ ಪಾತ್ರ ವಹಿಸಿದೆ ಎಂದು ಶ್ಲಾಘಿಸಿದ ಸಿಎಂ, "ಎಲ್ಲಾದರೂ ಇರಿ, ಎಂತಾದರೂ ಇರಿ, ಎಂದೆಂದಿಗೂ ಕನ್ನಡಿಗರಾಗಿರಿ" ಎಂದು ಕರೆ ನೀಡಿದರು.
