ಚಿತ್ರದುರ್ಗದಲ್ಲಿ ಬಿಎಸ್​ವೈ ಹಳೆಯ 'ಅಂಬಾಸಿಡರ್' ಕಾರಿನ ದರ್ಶನ: ಸೆಲ್ಫೀ ತೆಗೆದುಕೊಂಡು ಸಂಭ್ರಮಿಸಿದ ಅಭಿಮಾನಿಗಳು!

ಚಂದ್ರವಳ್ಳಿ ನ್ಯೂಸ್, ಚಿತ್ರದುರ್ಗ:
ಕೋಟೆ ನಾಡು ಚಿತ್ರದುರ್ಗದಲ್ಲಿ ಮೇ- 09 ರಂದು ಶನಿವಾರ ಹಮ್ಮಿಕೊಂಡಿರುವ 'ಬಿಎಸ್​ವೈ ಅಭಿಮಾನೋತ್ಸವ' ಕಾರ್ಯಕ್ರಮಕ್ಕೆ ಕ್ಷಣಗಣನೆ ಆರಂಭವಾಗಿದೆ. ಈ ಸಂಭ್ರಮದ ಅಂಗವಾಗಿ ಮಾಜಿ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಅವರು ಈ ಹಿಂದೆ ಪಕ್ಷದ ಸಂಘಟನೆಗಾಗಿ ಬಳಸುತ್ತಿದ್ದ ಐತಿಹಾಸಿಕ ಅಂಬಾಸಿಡರ್ ಕಾರನ್ನು ಸಾರ್ವಜನಿಕ ಪ್ರದರ್ಶನಕ್ಕೆ ಇಡಲಾಗಿದ್ದು, ಇದು ಜನರ ಆಕರ್ಷಣೆಯ ಕೇಂದ್ರಬಿಂದುವಾಗಿದೆ.

ಕಾರಿನೊಂದಿಗೆ ಸೆಲ್ಫೀ ಸಂಭ್ರಮ-
ನಗರಕ್ಕೆ ಆಗಮಿಸಿರುವ ಈ ಹಳೆಯ ಕಾರನ್ನು ಕಂಡ ಬಿಜೆಪಿ ಮುಖಂಡರು ಮತ್ತು ಯಡಿಯೂರಪ್ಪನವರ ಅಭಿಮಾನಿಗಳು ಹಳೆಯ ನೆನಪುಗಳನ್ನು ಮೆಲುಕು ಹಾಕಿದರು. ಕಾರಿನ ಮುಂದೆ ನಿಂತು ಸೆಲ್ಫೀ ಕ್ಲಿಕ್ಕಿಸಿಕೊಳ್ಳುವ ಮೂಲಕ ತಮ್ಮ ನೆಚ್ಚಿನ ನಾಯಕನ ಹೋರಾಟದ ದಿನಗಳನ್ನು ಸ್ಮರಿಸಿದರು.

ಇದೇ ಸಂದರ್ಭದಲ್ಲಿ ಬಿ.ವೈ. ವಿಜಯೇಂದ್ರ, ತಂದೆ ಯಡಿಯೂರಪ್ಪನವರು ಬಳಸುತ್ತಿದ್ದ ಈ ಕಾರಿನ ಬಗ್ಗೆ ಭಾವುಕರಾಗಿ ಮಾತನಾಡಿ, ಕೆಲವು ಪ್ರಮುಖ ವಿಚಾರಗಳನ್ನು ಹಂಚಿಕೊಂಡರು. 

ಸಂಘಟನೆಯ ಸಂಕೇತ: "ಯಡಿಯೂರಪ್ಪನವರನ್ನು ಜನ ಹೇಗೆ ಗುರುತಿಸುತ್ತಾರೋ, ಅಷ್ಟೇ ಪ್ರೀತಿಯಿಂದ ಈ ಕಾರನ್ನೂ ಗುರುತಿಸುತ್ತಾರೆ. ಬಿಜೆಪಿಯನ್ನು ಕೇವಲ ನಗರ ಪ್ರದೇಶಗಳಿಗೆ ಸೀಮಿತಗೊಳಿಸದೆ, ಹಳ್ಳಿ ಹಳ್ಳಿಗೂ ಕೊಂಡೊಯ್ಯುವಲ್ಲಿ ಈ ಕಾರು ಪ್ರಮುಖ ಪಾತ್ರ ವಹಿಸಿದೆ."

ಹೋರಾಟದ ಹಾದಿ: "ಅಂದು ಪಕ್ಷದ ಅನೇಕ ಹಿರಿಯ ನಾಯಕರು ಇದೇ ಕಾರಿನಲ್ಲಿ ರಾಜ್ಯಾದ್ಯಂತ ಪ್ರವಾಸ ಮಾಡಿ ಸಂಘಟನೆ ಮಾಡಿದ್ದರು. ಈ ಕಾರು ಕರ್ನಾಟಕ ಬಿಜೆಪಿಯ ಬೆಳವಣಿಗೆಯ ಸಾಕ್ಷಿಯಾಗಿದೆ," ಎಂದು ಅವರು ತಿಳಿಸಿದರು.

ಇಂದು ಅಭಿಮಾನೋತ್ಸವ ಅದ್ಧೂರಿ ತಯಾರಿ-
ಬಿಎಸ್​ವೈ ಅವರ ಸುದೀರ್ಘ ರಾಜಕೀಯ ಪಯಣ ಮತ್ತು ರಾಜ್ಯಕ್ಕೆ ಅವರು ನೀಡಿದ ಕೊಡುಗೆಯನ್ನು ಸ್ಮರಿಸಲು ಶನಿವಾರ ಚಿತ್ರದುರ್ಗದಲ್ಲಿ ಬೃಹತ್ ಸಮಾವೇಶ ನಡೆಯಲಿದೆ. ರಾಜ್ಯದ ವಿವಿಧ ಮೂಲೆಗಳಿಂದ ಲಕ್ಷಾಂತರ ಅಭಿಮಾನಿಗಳು ಈ ಕಾರ್ಯಕ್ರಮಕ್ಕೆ ಸಾಕ್ಷಿಯಾಗಲಿದ್ದಾರೆ. ಈ ಪ್ರದರ್ಶನಕ್ಕಿಟ್ಟಿರುವ ಅಂಬಾಸಿಡರ್ ಕಾರು ಸಮಾವೇಶಕ್ಕೆ ಒಂದು ವಿಶೇಷ ಕಳೆಯನ್ನು ತಂದಿದೆ.