ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ರಾಜ್ಯದಲ್ಲಿ ಹೆಚ್ಚುತ್ತಿರುವ ಜನಸಂಖ್ಯೆ, ನಗರೀಕರಣ ಹಾಗೂ ಅಪರಾಧ ಪ್ರಕರಣಗಳ ಸ್ವರೂಪ ಬದಲಾಗುತ್ತಿರುವ ಹಿನ್ನೆಲೆಯಲ್ಲಿ, ಪೊಲೀಸ್‌ಠಾಣೆಗಳ ಕಾರ್ಯ ವ್ಯಾಪ್ತಿಯನ್ನು ಮರುಹಂಚಿಕೆ ಮಾಡುವ ಸಂಬಂಧ ವಿವರವಾದ ಪ್ರಸ್ತಾವನೆಯನ್ನು ಶೀಘ್ರವಾಗಿ ಸಲ್ಲಿಸುವಂತೆ ರಾಜ್ಯ ಪೊಲೀಸ್‌ಮಹಾನಿರ್ದೇಶಕ (ಡಿಜಿಪಿ) ಡಾ. ಎಂ.ಎ. ಸಲೀಂ ಅವರು ಹಿರಿಯ ಪೊಲೀಸ್‌ಅಧಿಕಾರಿಗಳಿಗೆ ಕಟ್ಟುನಿಟ್ಟಿನ ಆದೇಶ ಹೊರಡಿಸಿದ್ದಾರೆ.
ಈ ಕುರಿತು ನಗರದ ಎಲ್ಲ ಪೊಲೀಸ್‌ಆಯುಕ್ತರು ಹಾಗೂ ಎಲ್ಲ ವಲಯದ ಪೊಲೀಸ್‌ಮಹಾನಿರೀಕ್ಷಕರು ಹಾಗೂ ಉಪ ಪೊಲೀಸ್‌ಮಹಾನಿರೀಕ್ಷಕರಿಗೆ ಅಧಿಕೃತ ಸೂಚನೆಗಳನ್ನು ನೀಡಲಾಗಿದೆ.
ಪ್ರಸ್ತುತ ಠಾಣೆಗಳ ವಿವರ: ರಾಜ್ಯದಲ್ಲಿ ಪ್ರಸ್ತುತ ವಿಶೇಷ ಪೊಲೀಸ್‌ಠಾಣೆಗಳನ್ನು ಹೊರತುಪಡಿಸಿ, ವಿವಿಧ ಜಿಲ್ಲಾ ಹಾಗೂ ನಗರ ಪೊಲೀಸ್ ಘಟಕಗಳ ವ್ಯಾಪ್ತಿಯಲ್ಲಿ ಒಟ್ಟು 854 ಕಾನೂನು ಮತ್ತು ಸುವ್ಯವಸ್ಥೆ ಹಾಗೂ 118 ಸಂಚಾರ ಪೊಲೀಸ್‌ಠಾಣೆಗಳು ಕಾರ್ಯನಿರ್ವಹಿಸುತ್ತಿವೆ.
ಮರುಹಂಚಿಕೆಗೆ ಕಾರಣಗಳು: ಕಾಲಾನಂತರದಲ್ಲಿ ಜನಸಂಖ್ಯೆಯ ಸಾಂದ್ರತೆ ಹೆಚ್ಚಾಗಿರುವುದು, ಹೊಸ ವಾಣಿಜ್ಯ ಮತ್ತು ಜನವಸತಿ ಪ್ರದೇಶಗಳು ಅಭಿವೃದ್ಧಿ ಹೊಂದಿರುವುದು ಹಾಗೂ ಅಪರಾಧ ಹಾಗೂ ಸಂಚಾರ ದಟ್ಟಣೆಯ ಸ್ವರೂಪದಲ್ಲಿ ಬದಲಾವಣೆಗಳಾಗಿರುವುದು.
ಕಾರ್ಯದೊತ್ತಡದ ಅಸಮತೋಲನ: ಈ ಬದಲಾವಣೆಗಳಿಂದಾಗಿ ಕೆಲವು ನಿರ್ದಿಷ್ಟ ಪೊಲೀಸ್‌ಠಾಣೆಗಳ ಮೇಲೆ ಕೆಲಸದೊತ್ತಡ ವಿಪರೀತವಾಗಿ ಹೆಚ್ಚಿದ್ದು, ಇನ್ನು ಕೆಲವು ಠಾಣೆಗಳಲ್ಲಿ ಕಡಿಮೆ ಇರುವುದು ಕಂಡುಬಂದಿದೆ.
ದಕ್ಷತೆ ಹೆಚ್ಚಿಸಲು ಹೊಸ ಹೆಜ್ಜೆ: ಪೊಲೀಸ್ ಇಲಾಖೆಯ ಕಾರ್ಯನಿರ್ವಹಣೆಯನ್ನು ಇನ್ನಷ್ಟು ಚುರುಕುಗೊಳಿಸಲು ಮತ್ತು ಸಿಬ್ಬಂದಿಯ ಮೇಲಿನ ಒತ್ತಡವನ್ನು ತಗ್ಗಿಸಲು ಡಿಜಿಪಿ ಈ ಮಹತ್ವದ ನಿರ್ಧಾರ ಕೈಗೊಂಡಿದ್ದಾರೆ. ಪ್ರತಿಯೊಂದು ಕಾರ್ಯಕಾರಿ ಘಟಕದ ವ್ಯಾಪ್ತಿಯಲ್ಲಿನ ಠಾಣೆಗಳ ಮೇಲಿನ ಕಾರ್ಯದೊತ್ತಡದ ಬಗ್ಗೆ ಆಳವಾದ ಅಧ್ಯಯನ ನಡೆಸುವಂತೆ ಸೂಚಿಸಲಾಗಿದೆ.
ಉತ್ತಮ ಮೇಲ್ವಿಚಾರಣೆ: ಹಿರಿಯ ಅಧಿಕಾರಿಗಳಿಂದ ನಿಗಾ ಹಾಗೂ ನಿರ್ವಹಣೆ ಸುಧಾರಿಸುವುದು.
ಸಮಾನ ಹಂಚಿಕೆ: ಎಲ್ಲಾ ಠಾಣೆಗಳ ನಡುವೆ ಕೆಲಸದೊತ್ತಡವನ್ನು ಸಮಾನವಾಗಿ ಹಂಚುವುದು.
ಸುಧಾರಿತ ಸೇವೆ: ಕಾನೂನು ಮತ್ತು ಸುವ್ಯವಸ್ಥೆ ನಿರ್ವಹಣೆ, ಅಪರಾಧ ಪ್ರಕರಣಗಳ ತನಿಖೆ ಹಾಗೂ ಸಂಚಾರ ನಿರ್ವಹಣೆಯಲ್ಲಿ ದಕ್ಷತೆಯನ್ನು ಗಣನೀಯವಾಗಿ ಹೆಚ್ಚಿಸುವುದು.
ಈ ಎಲ್ಲಾ ಅಂಶಗಳನ್ನು ಗಣನೆಗೆ ತೆಗೆದುಕೊಂಡು, ಠಾಣೆಗಳ ಗಡಿ ಹಾಗೂ ಕಾರ್ಯವ್ಯಾಪ್ತಿಯನ್ನು ವೈಜ್ಞಾನಿಕವಾಗಿ ಮರುಹಂಚಿಕೆ ಮಾಡುವ ಕುರಿತು ಕೂಡಲೇ ಘಟಕವಾರು ಸಮಗ್ರ ವರದಿಯನ್ನು ಸಲ್ಲಿಸುವಂತೆ ಸೂಚಿಸಲಾಗಿದೆ.
