ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಕರ್ನಾಟಕದ ಸ್ಟಾರ್ಟ್‌ಅಪ್‌ಗಳಿಗೆ ಸರ್ಕಾರಿ ಇಲಾಖೆಗಳ ಅಗತ್ಯಗಳಿಗೆ ನವೀನ ಪರಿಹಾರ ಒದಗಿಸುವ ಸುವರ್ಣ ಅವಕಾಶ ಕಲ್ಪಿಸಲು, ನೈಜ ಪರಿಸರದಲ್ಲಿ ತಂತ್ರಜ್ಞಾನಗಳನ್ನು ಪರೀಕ್ಷಿಸಿ ಮೌಲ್ಯಮಾಪನ ಮಾಡುವ ಮಹತ್ವಾಕಾಂಕ್ಷೆಯ ‘ಗವರ್ನಮೆಂಟ್ ಫಸ್ಟ್’ ಉಪಕ್ರಮ ಜಾರಿಗೆ ಬರಲಿದೆ ಎಂದು ಗೃಹ, ಮಾಹಿತಿ ಮತ್ತು ಜೈವಿಕ ತಂತ್ರಜ್ಞಾನ ಹಾಗೂ ಇ-ಆಡಳಿತ ಸಚಿವ ಪ್ರಿಯಾಂಕ್ ಖರ್ಗೆ ತಿಳಿಸಿದ್ದಾರೆ.
ಸ್ಟಾರ್ಟ್‌ಅಪ್ ನೀತಿ 2025–30ರ ಅಡಿಯಲ್ಲಿ ‘ಎಲಿವೇಟ್’ ಕಾರ್ಯಕ್ರಮದ ಭಾಗವಾಗಿ ಈ ಉಪಕ್ರಮ ಜಾರಿಗೊಳ್ಳಲಿದ್ದು, ರಾಜ್ಯ ಸರ್ಕಾರ ಈಗಾಗಲೇ ಇದಕ್ಕೆ ಅಧಿಕೃತ ಅನುಮೋದನೆ ನೀಡಿದೆ. ಕರ್ನಾಟಕ ಇನ್ನೋವೇಶನ್ ಅಂಡ್ ಟೆಕ್ನಾಲಜಿ ಸೊಸೈಟಿ (ಕೆಐಟಿಎಸ್) ಮೂಲಕ ಅನುಷ್ಠಾನಗೊಳ್ಳಲಿರುವ ಈ ಯೋಜನೆಯಡಿ, ಮುಂಬರುವ ಮೂರು ವರ್ಷಗಳಲ್ಲಿ ಒಟ್ಟು ₹25 ಕೋಟಿ ವೆಚ್ಚದಲ್ಲಿ ಗರಿಷ್ಠ 100 ಸ್ಟಾರ್ಟ್‌ಅಪ್‌ಗಳಿಗೆ ಬೆಂಬಲ ನೀಡಲು ಉದ್ದೇಶಿಸಲಾಗಿದೆ.
ಸರ್ಕಾರವೇ ಮೊದಲ ಗ್ರಾಹಕ: ಹೊಸ ತಂತ್ರಜ್ಞಾನ ಹಾಗೂ ನವೀನ ಪರಿಹಾರಗಳನ್ನು ಅಭಿವೃದ್ಧಿಪಡಿಸುವ ಸ್ಟಾರ್ಟ್‌ಅಪ್‌ಗಳಿಗೆ ಆರಂಭಿಕ ಹಂತದಲ್ಲೇ ಮಾರುಕಟ್ಟೆ ಅವಕಾಶ ಕಲ್ಪಿಸುವುದು ಈ ಉಪಕ್ರಮದ ಪ್ರಮುಖ ಧ್ಯೇಯವಾಗಿದೆ. ಸರ್ಕಾರವು ಕೇವಲ ಖರೀದಿದಾರನಾಗಿರದೆ, ನಾವೀನ್ಯತೆಗಳನ್ನು ಮೊದಲು ಅಳವಡಿಸಿಕೊಳ್ಳುವ 'ಮೊದಲ ಗ್ರಾಹಕ' ಹಾಗೂ ಸಹಭಾಗಿಯಾಗಿ ಕಾರ್ಯನಿರ್ವಹಿಸಲಿದೆ.
ಸಮಸ್ಯೆ ಆಧಾರಿತ ಪ್ರಸ್ತಾವನೆ: ಸರ್ಕಾರದ ವಿವಿಧ ಇಲಾಖೆಗಳು ತಮ್ಮ ಸಮಸ್ಯೆಗಳನ್ನು ಗುರುತಿಸಿ ಪರಿಹಾರಗಳನ್ನು ಆಹ್ವಾನಿಸಬಹುದು.
ಸ್ವಯಂ ಪ್ರಸ್ತಾವನೆ: ಸರ್ಕಾರದ ಅಗತ್ಯಗಳನ್ನು ಗ್ರಹಿಸಿ ಸ್ಟಾರ್ಟ್‌ಅಪ್‌ಗಳೇ ತಮ್ಮ ನವೀನ ಪರಿಹಾರಗಳನ್ನು ನೇರವಾಗಿ ಸರ್ಕಾರಕ್ಕೆ ಪ್ರಸ್ತಾಪಿಸಬಹುದು.
ಪರೀಕ್ಷೆ, ಮೌಲ್ಯಮಾಪನ ಮತ್ತು ಖರೀದಿ ವ್ಯವಸ್ಥೆ: ಈ ಉಪಕ್ರಮದಲ್ಲಿ 'ಪರೀಕ್ಷೆ–ಮೌಲ್ಯಮಾಪನ–ಖರೀದಿ' ಎಂಬ ವ್ಯವಸ್ಥಿತ ವಿಧಾನವನ್ನು ಅನುಸರಿಸಲಾಗುತ್ತದೆ. ಆಯ್ಕೆಯಾದ ಸ್ಟಾರ್ಟ್‌ಅಪ್‌ಗಳ ಪರಿಹಾರಗಳನ್ನು ಸರ್ಕಾರಿ ಇಲಾಖೆಗಳ ನೈಜ ಪರಿಸರದಲ್ಲಿ ಪ್ರಾಯೋಗಿಕವಾಗಿ ಅಳವಡಿಸಲಾಗುತ್ತದೆ.
ಅವುಗಳ ಕಾರ್ಯಕ್ಷಮತೆ, ಪರಿಣಾಮ, ಬಳಕೆದಾರರ ಸ್ವೀಕಾರ, ವೆಚ್ಚದ ಪರಿಣಾಮಕಾರಿತ್ವ ಹಾಗೂ ವಿಸ್ತರಣಾ ಸಾಮರ್ಥ್ಯವನ್ನು ಸೂಕ್ಷ್ಮವಾಗಿ ಪರಿಶೀಲಿಸಲಾಗುತ್ತದೆ. ಪರೀಕ್ಷಾ ಹಂತದಲ್ಲಿ ಯಶಸ್ವಿಯಾಗಿ ನಿರೀಕ್ಷಿತ ಫಲಿತಾಂಶ ನೀಡುವ ಪರಿಹಾರಗಳನ್ನು ಮುಂದಿನ ಹಂತದಲ್ಲಿ ನೇರ ಸರ್ಕಾರಿ ಖರೀದಿ ಹಾಗೂ ಬೃಹತ್ ಪ್ರಮಾಣದ ಅಳವಡಿಕೆಗೆ ಪರಿಗಣಿಸಲಾಗುತ್ತದೆ.
ಪ್ರತಿ ಸ್ಟಾರ್ಟ್‌ಅಪ್‌ಗೆ ಗರಿಷ್ಠ 25 ಲಕ್ಷ ಆರ್ಥಿಕ ನೆರವು: ಅನುದಾನ ಹಂಚಿಕೆ: ಒಟ್ಟು ₹25 ಕೋಟಿ ಅನುದಾನದಲ್ಲಿ ಶೇ. 95ರಷ್ಟು (ಅಂದರೆ ₹23.75 ಕೋಟಿ) ನೇರವಾಗಿ ಸ್ಟಾರ್ಟ್‌ಅಪ್‌ಗಳ ನೆರವಿಗೆ ಮೀಸಲಾಗಿದೆ. ಉಳಿದ ಶೇ. 5ರಷ್ಟು (ಅಂದರೆ ₹1.25 ಕೋಟಿ) ಆಡಳಿತಾತ್ಮಕ ವೆಚ್ಚಗಳಿಗೆ ಬಳಸಲಾಗುತ್ತದೆ.
ಪ್ರತಿ ಸ್ಟಾರ್ಟ್‌ಅಪ್‌ಗೆ ಬೆಂಬಲ: ಪ್ರಾಯೋಗಿಕ ಅಳವಡಿಕೆ ಮತ್ತು ಮೌಲ್ಯಮಾಪನಕ್ಕಾಗಿ ಪ್ರತಿ ಅರ್ಹ ಸ್ಟಾರ್ಟ್‌ಅಪ್‌ಗೆ ಗರಿಷ್ಠ ₹25 ಲಕ್ಷದವರೆಗೆ ಆರ್ಥಿಕ ನೆರವು ದೊರೆಯಲಿದೆ.
ಅರ್ಹತೆಗಳೇನು?:
ಕರ್ನಾಟಕದಲ್ಲಿ ಅಧಿಕೃತವಾಗಿ ನೋಂದಾಯಿತವಾಗಿರಬೇಕು.
ಕಂಪನಿ ಸ್ಥಾಪನೆಯಾಗಿ 10 ವರ್ಷಕ್ಕಿಂತ ಕಡಿಮೆ ಅವಧಿಯಾಗಿರಬೇಕು.
ಯಾವುದೇ ಹಣಕಾಸು ವರ್ಷದಲ್ಲಿ 200 ಕೋಟಿಗಿಂತ ಹೆಚ್ಚಿನ ವಾರ್ಷಿಕ ವಹಿವಾಟು ಹೊಂದಿರಬಾರದು.
ಪರಿಹಾರಗಳು ನವೀನತೆ, ವಿಸ್ತರಣಾ ಸಾಮರ್ಥ್ಯ ಹಾಗೂ ನೈಜ ಪರಿಸರದಲ್ಲಿ ತಕ್ಷಣ ಪರೀಕ್ಷೆಗೆ ಸಿದ್ಧವಿರುವ ತಾಂತ್ರಿಕ ಗುಣಮಟ್ಟವನ್ನು ಹೊಂದಿರಬೇಕು.
ಮಾಹಿತಿ ತಂತ್ರಜ್ಞಾನ, ಕೃತಕ ಬುದ್ಧಿಮತ್ತೆ, ದತ್ತಾಂಶ ವಿಶ್ಲೇಷಣೆ, ಸಲಹಾ ಸೇವೆಗಳು, ವಿನ್ಯಾಸ ಮತ್ತು ಸಾಗಣೆ ವ್ಯವಸ್ಥೆ ಸೇರಿದಂತೆ ವಿವಿಧ ತಂತ್ರಜ್ಞಾನ ಆಧಾರಿತ ನವೀನ ಪರಿಹಾರಗಳಿಗೆ ಈ ಉಪಕ್ರಮದ ಮೂಲಕ ಭಾರಿ ಒತ್ತು ನೀಡಲಾಗುತ್ತಿದೆ.
