ಚಂದ್ರವಳ್ಳಿ ನ್ಯೂಸ್, ಗಂಗಾವತಿ:
ಭಾರತೀಯ ಕ್ರಿಕೆಟ್ ತಂಡದ ಮಾಜಿ ಮುಖ್ಯ ತರಬೇತುದಾರ ಹಾಗೂ ಕ್ರಿಕೆಟ್ ದಂತಕಥೆ ರಾಹುಲ್ ದ್ರಾವಿಡ್ ಅವರು ಶುಕ್ರವಾರ ಹನುಮನ ಜನ್ಮಸ್ಥಳ ಎಂದೇ ಪ್ರಸಿದ್ಧಿಯಾಗಿರುವ ತಾಲ್ಲೂಕಿನ ಚಿಕ್ಕರಾಂಪೂರದ ಅಂಜನಾದ್ರಿ ಬೆಟ್ಟಕ್ಕೆ ಭೇಟಿ ನೀಡಿ ಆಂಜನೇಯ ಸ್ವಾಮಿಯ ದರ್ಶನ ಪಡೆದರು.
ಗುರುವಾರ ಸಂಜೆಯೇ ಆಗಮಿಸಿದ್ದ ರಾಹುಲ್ ದ್ರಾವಿಡ್, ಹೊಸಪೇಟೆ ತಾಲ್ಲೂಕಿನ ಕಮಲಾಪುರದ ಖಾಸಗಿ ರೆಸಾರ್ಟ್ನಲ್ಲಿ ತಂಗಿದ್ದರು. ಶುಕ್ರವಾರ ಮುಂಜಾನೆ ಪತ್ನಿ ವಿಜೇತಾ ಪೆಂಡಾಲ್ಕರ್ ಅವರೊಂದಿಗೆ ಅಂಜನಾದ್ರಿಗೆ ಭೇಟಿ ನೀಡಿದರು.
575 ಮೆಟ್ಟಿಲು ಹತ್ತಿದ ದ್ರಾವಿಡ್; ಸೆಲ್ಫಿಗಾಗಿ ಮುಗಿಬಿದ್ದ ಜಗತ್ತು!:
ಮೊದಲಿಗೆ ಬೆಟ್ಟದ ಕೆಳಗಿರುವ ಹನುಮಪ್ಪನ ಪಾದಗಟ್ಟೆಯಲ್ಲಿ ವಿಶೇಷ ಪೂಜೆ ಸಲ್ಲಿಸಿದ ದ್ರಾವಿಡ್ ದಂಪತಿ, ಬಳಿಕ ಯಾವುದೇ ವಿಶೇಷ ವಾಹನದ ನೆರವಿಲ್ಲದೆ ಸಾಮಾನ್ಯ ಭಕ್ತರಂತೆ 575 ಮೆಟ್ಟಿಲುಗಳನ್ನು ನಡೆದುಕೊಂಡೇ ಹತ್ತಿದರು. ಕ್ರಿಕೆಟ್ ಮೈದಾನದಲ್ಲಿ 'ದಿ ವಾಲ್' ಖ್ಯಾತಿಯ ದ್ರಾವಿಡ್ ಅವರನ್ನು ಅಂಜನಾದ್ರಿ ಬೆಟ್ಟದ ಮೇಲೆ ಕಂಡ ಭಕ್ತರು ಹಾಗೂ ಅಭಿಮಾನಿಗಳು ಅವರೊಂದಿಗೆ ಸೆಲ್ಫಿ ತೆಗೆದುಕೊಳ್ಳಲು ಮುಗಿಬಿದ್ದರು. ದ್ರಾವಿಡ್ ಕೂಡ ನಗುಮುಖದಿಂದಲೇ ಅಭಿಮಾನಿಗಳಿಗೆ ಸ್ಪಂದಿಸಿದರು.
ಗರ್ಭಗುಡಿಯಲ್ಲಿ ವಿಶೇಷ ಸಂಕಲ್ಪ ಪೂಜೆ:
ದೇವಸ್ಥಾನದ ಆಡಳಿತ ಮಂಡಳಿಯು ದ್ರಾವಿಡ್ ದಂಪತಿಯನ್ನು ಗೌರವಪೂರ್ವಕವಾಗಿ ಬರಮಾಡಿಕೊಂಡು, ಗರ್ಭಗುಡಿಯವರೆಗೆ ಹೋಗಲು ಅವಕಾಶ ಮಾಡಿಕೊಟ್ಟಿತು. ಅಲ್ಲಿನ ಪ್ರಧಾನ ಅರ್ಚಕರ ನೇತೃತ್ವದಲ್ಲಿ ದ್ರಾವಿಡ್ ಹಾಗೂ ವಿಜೇತಾ ದಂಪತಿಗೆ ವಿಶೇಷ ಸಂಕಲ್ಪ ಮಾಡಿಸಿ, ಪೂಜಾ ಕೈಂಕರ್ಯಗಳನ್ನು ನೆರವೇರಿಸಲಾಯಿತು.
ಪೂಜೆಯ ಬಳಿಕ ದೇವಸ್ಥಾನದ ಮಂಡಳಿಯಿಂದ ದ್ರಾವಿಡ್ ದಂಪತಿಗೆ ಶಾಲು ಹೊದಿಸಿ, ಅಂಜನಾದ್ರಿ ಹನುಮಪ್ಪನ ಭವ್ಯ ಭಾವಚಿತ್ರವನ್ನು ನೀಡಿ ಸನ್ಮಾನಿಸಲಾಯಿತು. ಬೆಟ್ಟದ ಮೇಲಿನಿಂದ ಕಾಣುವ ಹಂಪೆಯ ಐತಿಹಾಸಿಕ ತಾಣಗಳು ಹಾಗೂ ತುಂಗಭದ್ರಾ ನದಿಯ ವಿಹಂಗಮ ನೋಟವನ್ನು ಕಂಡು ದ್ರಾವಿಡ್ ದಂಪತಿ ರೋಮಾಂಚನಗೊಂಡರು.
