ಚಂದ್ರವಳ್ಳಿ ನ್ಯೂಸ್, ಕೊಟ್ಟೂರು:
ವಿಜಯನಗರ ಜಿಲ್ಲೆಯ ಕೊಟ್ಟೂರು ಮಾರ್ಗವಾಗಿ ಹೊಸಪೇಟೆ–ಅರಸೀಕೆರೆ ನಡುವೆ ನೂತನ ರೈಲು ಸಂಚಾರ ಆರಂಭಗೊಂಡ ವಾರದ ಬೆನ್ನಲ್ಲೇ, ನೈಋತ್ಯ ರೈಲ್ವೆಯ ಹುಬ್ಬಳ್ಳಿ ವಿಭಾಗವು ಮೈಸೂರು ಮತ್ತು ರಾಜಸ್ಥಾನದ ಅಜ್ಮೀರ್‌ನಡುವೆ ಹೊಸ ರೈಲು ಸೇವೆಯನ್ನು ಅಧಿಕೃತವಾಗಿ ಘೋಷಿಸುವ ಮೂಲಕ ಸ್ಥಳೀಯರಿಗೆ ಮತ್ತೊಂದು ಸಿಹಿ ಸುದ್ದಿ ನೀಡಿದೆ.
ವೇಳಾಪಟ್ಟಿ ಹಾಗೂ ಪ್ರಯಾಣದ ವಿವರ:
ಮೈಸೂರು – ಅಜ್ಮೀರ್ (ರೈಲು ಸಂಖ್ಯೆ 16281): ಸೆಪ್ಟೆಂಬರ್ 5 ರಿಂದ ಪ್ರತಿ ಶನಿವಾರ ಬೆಳಿಗ್ಗೆ 8:00 ಗಂಟೆಗೆ ಮೈಸೂರಿನಿಂದ ಹೊರಡಲಿರುವ ರೈಲು, ಸೆಪ್ಟೆಂಬರ್ 7ರ ಬೆಳಿಗ್ಗೆ 4:35ಕ್ಕೆ ಅಜ್ಮೀರ್‌ತಲುಪಲಿದೆ.
ಅಜ್ಮೀರ್ – ಮೈಸೂರು (ರೈಲು ಸಂಖ್ಯೆ 16282): ಸೆಪ್ಟೆಂಬರ್ 7 ರಂದು ಅಜ್ಮೀರ್‌ನಿಂದ ಸೋಮವಾರ ಸಂಜೆ 6:50ಕ್ಕೆ ಹೊರಟು, ಸೆಪ್ಟೆಂಬರ್ 9 ರ ರಾತ್ರಿ 7:00 ಗಂಟೆಗೆ ಮೈಸೂರು ತಲುಪಲಿದೆ.
ವಾರಕ್ಕೊಮ್ಮೆ ಸಂಚರಿಸಲಿರುವ ಈ ವಿಶೇಷ ರೈಲು ಸಂಪೂರ್ಣ ಪ್ರಯಾಣಕ್ಕೆ 44 ಗಂಟೆ 35 ನಿಮಿಷಗಳ ಸಮಯ ತೆಗೆದುಕೊಳ್ಳಲಿದೆ. ಕೊಟ್ಟೂರು ಮಾರ್ಗವಾಗಿ ಸಂಚರಿಸುತ್ತಿರುವ ಪ್ರಥಮ ಅಂತಾರಾಜ್ಯ ರೈಲು ಇದಾಗಿದ್ದು, ಮೂರು ತಿಂಗಳ ಹಿಂದಷ್ಟೇ ಇಲಾಖೆ ಈ ಕುರಿತು ಪ್ರಕಟಣೆ ಹೊರಡಿಸಿತ್ತು.
38 ಪ್ರಮುಖ ನಗರಗಳ ಸಂಪರ್ಕ:
ಕರ್ನಾಟಕ, ಮಹಾರಾಷ್ಟ್ರ, ಗುಜರಾತ್‌ಮತ್ತು ರಾಜಸ್ಥಾನ ರಾಜ್ಯಗಳ ಒಟ್ಟು 38 ಪ್ರಮುಖ ನಗರಗಳನ್ನು ಈ ರೈಲು ಸಂಪರ್ಕಿಸಲಿದೆ. ಮೈಸೂರಿನಿಂದ ಹೊರಟು ಕೆ.ಆರ್. ನಗರ, ಹೊಳೆನರಸೀಪುರ, ಹಾಸನ, ಅರಸೀಕೆರೆ, ಕಡೂರು, ಚಿಕ್ಕಜಾಜೂರು, ದಾವಣಗೆರೆ ಮಾರ್ಗವಾಗಿ ಶನಿವಾರ ಮಧ್ಯಾಹ್ನ 2:53ಕ್ಕೆ ಕೊಟ್ಟೂರಿಗೆ ಆಗಮಿಸಲಿದೆ. ಬಳಿಕ ಟಿ.ಬಿ. ಡ್ಯಾಂ, ಕೊಪ್ಪಳ, ಗದಗ, ಹುಬ್ಬಳ್ಳಿ, ಧಾರವಾಡ, ಲೋಂಡಾ ಹಾಗೂ ಬೆಳಗಾವಿ ಮಾರ್ಗವಾಗಿ ಮಹಾರಾಷ್ಟ್ರ ಪ್ರವೇಶಿಸಲಿದೆ.
ರೈಲಿನ ಬೋಗಿಗಳ ಸಂರಚನೆ:
ಒಟ್ಟು 18 ಬೋಗಿಗಳನ್ನು ಹೊಂದಿರುವ ಈ ರೈಲಿನಲ್ಲಿ: ಸಾಮಾನ್ಯ ಬೋಗಿಗಳು, ಜನರಲ್ ಸ್ಲೀಪರ್ ಕೋಚ್‌ಗಳು.
ತ್ರಿ-ಟೈಯರ್ ಎಸಿ (3-Tier AC), ಟೂ-ಟೈಯರ್ ಎಸಿ (2-Tier AC), ಕೋಚ್ (First AC).
ಪ್ರಯಾಣಿಕರಲ್ಲಿ ಉಂಟಾದ ಅಸಮಾಧಾನ:
ಇದು ಸೀಮಿತ ನಿಲ್ದಾಣಗಳನ್ನು ಹೊಂದಿರುವ ಎಕ್ಸ್‌ಪ್ರೆಸ್ ರೈಲಾಗಿರುವುದರಿಂದ ಹರಪನಹಳ್ಳಿ, ಹಗರಿಬೊಮ್ಮನಹಳ್ಳಿ ಹಾಗೂ ಹೊಸಪೇಟೆ ಭಾಗದ ಮುಖ್ಯ ನಿಲ್ದಾಣಗಳಲ್ಲಿ ನಿಲುಗಡೆ ನೀಡದಿರುವುದು ಅಲ್ಲಿನ ಸ್ಥಳೀಯ ಪ್ರಯಾಣಿಕರಲ್ಲಿ ಕೊಂಚ ನಿರಾಸೆ ಮೂಡಿಸಿದೆ.
ಆದಾಗ್ಯೂ, ಈ ಮಾರ್ಗದಲ್ಲಿ ವಿದ್ಯುದ್ದೀಕರಣ ಕಾಮಗಾರಿ ಸಂಪೂರ್ಣಗೊಂಡ ನಂತರ ಇನ್ನು ಹೆಚ್ಚಿನ ದೂರದೂರಿನ ರೈಲುಗಳು ಸಂಚರಿಸಲಿವೆ ಎಂಬ ಭರವಸೆಯಲ್ಲಿ ಕೊಟ್ಟೂರು ಭಾಗದ ರೈಲು ಪ್ರಯಾಣಿಕರಿದ್ದಾರೆ.
