ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ತಳಮಟ್ಟದ ಕಾರ್ಯಕರ್ತನಾಗಿ ರಾಜಕೀಯ ಜೀವನ ಆರಂಭಿಸಿ, ಇಂದು ರಾಜ್ಯದ ಉಪಮುಖ್ಯಮಂತ್ರಿಯಾಗಿ ಜವಾಬ್ದಾರಿ ನಿಭಾಯಿಸುತ್ತಿರುವ ಡಿ.ಕೆ. ಶಿವಕುಮಾರ್ ಅವರು ತಮ್ಮ ರಾಜಕೀಯ ಬೆಳವಣಿಗೆಯಲ್ಲಿ ಗಾಂಧಿ ಕುಟುಂಬ ನೀಡಿದ ಬೆಂಬಲ ಮತ್ತು ನಂಬಿಕೆಯನ್ನು ಶ್ಲಾಘಿಸಿ ಸಾಮಾಜಿಕ ಜಾಲತಾಣದಲ್ಲಿ ಭಾವನಾತ್ಮಕ ಸಂದೇಶವೊಂದನ್ನು ಹಂಚಿಕೊಂಡಿದ್ದಾರೆ.
ರಾಜೀವ್ ಗಾಂಧಿ ಅವರಿಂದ ಹಿಡಿದು ಪ್ರಿಯಾಂಕಾ ಗಾಂಧಿ ಅವರವರೆಗಿನ ನಾಯಕರೊಂದಿಗಿನ ತಮ್ಮ ಒಡನಾಟ ಹಾಗೂ ಅವರು ತಮಗೆ ಕಲಿಸಿದ ನಾಯಕತ್ವದ ಪಾಠಗಳನ್ನು ಡಿಸಿಎಂ ಈ ಪೋಸ್ಟ್ನಲ್ಲಿ ಮುಕ್ತವಾಗಿ ಹಂಚಿಕೊಂಡಿದ್ದಾರೆ.
ಗಾಂಧಿ ಕುಟುಂಬದ ನಾಯಕರ ಕುರಿತು ಡಿ.ಕೆ. ಶಿವಕುಮಾರ್ ಹೇಳಿದ್ದೇನು?:
ರಾಜೀವ್ ಗಾಂಧಿ: "ನನ್ನಲ್ಲಿ ನನಗೇ ನಂಬಿಕೆ ಇಲ್ಲದಿದ್ದ ಕಾಲದಲ್ಲಿ, ಒಬ್ಬ ಸಾಮಾನ್ಯ ಯುವ ಕಾರ್ಯಕರ್ತನಾಗಿದ್ದ ನನ್ನಲ್ಲಿನ ಸಾಮರ್ಥ್ಯವನ್ನು ರಾಜೀವ್ ಗಾಂಧಿ ಅವರು ಗುರುತಿಸಿದ್ದರು. ಅವರ ಪ್ರೋತ್ಸಾಹವೇ ನಾನು ದೊಡ್ಡ ಕನಸು ಕಾಣಲು ಮತ್ತು ಸಾರ್ವಜನಿಕ ಸೇವೆಗೆ ನನ್ನನ್ನು ಮುಡುಪಾಗಿಡಲು ಆತ್ಮವಿಶ್ವಾಸ ನೀಡಿತು."
ಶ್ರೀಮತಿ ಸೋನಿಯಾ ಗಾಂಧಿ: "ನಿಜವಾದ ನಾಯಕರು ಕೇವಲ ಯಶಸ್ಸಿನ ಸಮಯದಲ್ಲಿ ಮಾತ್ರವಲ್ಲ, ಅತ್ಯಂತ ಕಷ್ಟದ ಸಂದರ್ಭಗಳಲ್ಲಿಯೂ ಜೊತೆಗೆ ನಿಂತು ಧೈರ್ಯ ತುಂಬುತ್ತಾರೆ ಎಂಬುದನ್ನು ಸೋನಿಯಾ ಗಾಂಧಿ ಅವರು ನನಗೆ ಕಲಿಸಿಕೊಟ್ಟರು. ನನ್ನ ಕಠಿಣ ದಿನಗಳಲ್ಲಿ ಅವರು ನನ್ನ ಮೇಲಿಟ್ಟಿದ್ದ ನಂಬಿಕೆಯನ್ನು ನಾನು ಯಾವಾಗಲೂ ನೆನಪಿಸಿಕೊಳ್ಳುತ್ತೇನೆ."
ರಾಹುಲ್ ಗಾಂಧಿ: "ರಾಹುಲ್ ಗಾಂಧಿ ಅವರು ಸದಾ ನನಗೆ ಮಾರ್ಗದರ್ಶನ ಮತ್ತು ಸ್ಫೂರ್ತಿಯಾಗಿದ್ದಾರೆ. ಎಲ್ಲರನ್ನೂ ಒಳಗೊಳ್ಳುವ ಮತ್ತು ಸಹಾನುಭೂತಿಯ ಭಾರತವನ್ನು ನಿರ್ಮಿಸುವ ಅವರ ದೂರದೃಷ್ಟಿ ನಮ್ಮಂತಹ ನಾಯಕರಿಗೆ ಪ್ರೇರಣೆ ನೀಡುತ್ತದೆ. ಅವರು ಸಾರ್ವಜನಿಕ ಜೀವನದಲ್ಲಿ ನನಗೆ ದೊಡ್ಡ ಬೆಂಬಲವಾಗಿ ನಿಂತಿದ್ದಾರೆ."
ಶ್ರೀಮತಿ ಪ್ರಿಯಾಂಕಾ ಗಾಂಧಿ: "ಪ್ರಿಯಾಂಕಾ ಗಾಂಧಿ ಅವರು ಸದಾ ಆತ್ಮೀಯತೆ ಮತ್ತು ಗೌರವದಿಂದ ನಡೆದುಕೊಳ್ಳುತ್ತಾರೆ. ರಾಜಕಾರಣ ಎಂದರೆ ಜನರೊಂದಿಗೆ ಕನೆಕ್ಟ್ ಆಗುವುದು ಮತ್ತು ಅವರ ಆಕಾಂಕ್ಷೆಗಳನ್ನು ಅರ್ಥಮಾಡಿಕೊಳ್ಳುವುದು ಎಂಬುದನ್ನು ಅವರು ನೆನಪಿಸುತ್ತಾರೆ. ಅವರ ಮಾರ್ಗದರ್ಶನ ನನಗೆ ಅತ್ಯಂತ ಮೌಲ್ಯಯುತವಾದುದು."
"ನನ್ನ ಪಾಲಿಗೆ ಗಾಂಧಿ ಕುಟುಂಬ ಎಂದರೆ ನಾಯಕತ್ವದ ವಿಭಿನ್ನ ಆಯಾಮಗಳು. ಸಾಮರ್ಥ್ಯವನ್ನು ಗುರುತಿಸುವುದು, ಕಷ್ಟದ ಕಾಲದಲ್ಲಿ ಬೆಂಬಲವಾಗಿ ನಿಲ್ಲುವುದು, ಸಹಾನುಭೂತಿಯಿಂದ ಆಲಿಸುವುದು ಮತ್ತು ಸೇವಾ ಮನೋಭಾವದಿಂದ ಇತರರಿಗೆ ಸ್ಫೂರ್ತಿ ನೀಡುವುದೇ ಅವರ ನಾಯಕತ್ವ."
ಡಿ.ಕೆ. ಶಿವಕುಮಾರ್, ನಿಯೋಜಿತ ಮುಖ್ಯಮಂತ್ರಿ.
ಪ್ರಗತಿಪರ ಕರ್ನಾಟಕ ನಿರ್ಮಾಣದ ಸಂಕಲ್ಪ:
ಕೊನೆಯಲ್ಲಿ, ತಳಮಟ್ಟದ ಕಾರ್ಯಕರ್ತನಿಗೆ ರಾಜ್ಯವನ್ನು ಮುನ್ನಡೆಸುವ ಇಷ್ಟು ದೊಡ್ಡ ಜವಾಬ್ದಾರಿ ಸಿಗಲು ಗಾಂಧಿ ಕುಟುಂಬದ ನಂಬಿಕೆ ಮತ್ತು ಪ್ರೋತ್ಸಾಹವೇ ಕಾರಣ ಎಂದು ಕೃತಜ್ಞತೆ ಸಲ್ಲಿಸಿರುವ ಡಿ.ಕೆ. ಶಿವಕುಮಾರ್, ಅವರ ಮಾರ್ಗದರ್ಶನ ಹಾಗೂ ಕರ್ನಾಟಕದ ಜನರ ಆಶೀರ್ವಾದದೊಂದಿಗೆ ರಾಜ್ಯವನ್ನು ಪ್ರಗತಿಪರ, ಸಮೃದ್ಧ ಮತ್ತು ಒಳಗೊಳ್ಳುವಿಕೆಯ ನಾಡನ್ನಾಗಿ ಮಾಡಲು ಪ್ರಾಮಾಣಿಕವಾಗಿ ಶ್ರಮಿಸುವುದಾಗಿ ತಮ್ಮ ಸಂಕಲ್ಪವನ್ನು ಪುನರುಚ್ಚರಿಸಿದ್ದಾರೆ.
