"ನಮಗೂ ಪ್ರಧಾನಿಗೂ ಹೆಂಡತಿ ಸಮಸ್ಯೆ ಇಲ್ಲ": ಸಂಸತ್ತಿನಲ್ಲಿ ರಾಹುಲ್ ಗಾಂಧಿ ಲಘು ಧಾಟಿಯ ವಾಗ್ದಾಳಿ

ಚಂದ್ರವಳ್ಳಿ ನ್ಯೂಸ್, ​ನವದೆಹಲಿ:
ಸಂಸತ್ತಿನ ವಿಶೇಷ ಅಧಿವೇಶನದಲ್ಲಿ ಮಹಿಳಾ ಮೀಸಲಾತಿ ಮತ್ತು ಕ್ಷೇತ್ರ ಪುನರ್ವಿಂಗಡಣೆ (Delimitation) ಕುರಿತ ಗಂಭೀರ ಚರ್ಚೆಯ ನಡುವೆ, ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರು ನೀಡಿದ ಒಂದು ಹೇಳಿಕೆ ಸದನದ ಗಮನ ಸೆಳೆದಿದೆ. ಪ್ರಧಾನಿ ಮೋದಿ ಮತ್ತು ತಮ್ಮ ವೈಯಕ್ತಿಕ ಜೀವನವನ್ನು ಉಲ್ಲೇಖಿಸಿ ಮಾತನಾಡಿದ ಅವರು, "ನನಗೆ ಹಾಗೂ ಪ್ರಧಾನಿ ಮೋದಿ ಇಬ್ಬರಿಗೂ ಹೆಂಡತಿ ಕಾಟ ಇಲ್ಲ," ಎಂದು ಲಘು ದಾಟಿಯಲ್ಲಿ ಹೇಳುವ ಮೂಲಕ ಚರ್ಚೆಗೆ ಹೊಸ ಆಯಾಮ ನೀಡಿದರು.

​ಮಹಿಳೆಯರೇ ನಮ್ಮ ಶಕ್ತಿ-
​ಮಹಿಳಾ ಮೀಸಲಾತಿ ಮಸೂದೆಯ ಮೇಲಿನ ಸುದೀರ್ಘ ಚರ್ಚೆಯಲ್ಲಿ ಭಾಗವಹಿಸಿ ಮಾತನಾಡಿದ ರಾಹುಲ್ ಗಾಂಧಿ, ಮಹಿಳೆಯರನ್ನು ರಾಷ್ಟ್ರೀಯ ಕಲ್ಪನೆಯ ಕೇಂದ್ರ ಶಕ್ತಿ ಎಂದು ಬಣ್ಣಿಸಿದರು.

​"ಮಹಿಳೆಯರು ನಮ್ಮ ಪ್ರೇರಕ ಶಕ್ತಿ. ನಾವೆಲ್ಲರೂ ಮಹಿಳೆಯರಿಂದ ಪ್ರಭಾವಿತರಾಗಿದ್ದೇವೆ ಮತ್ತು ಜೀವನದಲ್ಲಿ ಅವರಿಂದ ಬಹಳಷ್ಟು ಕಲಿತಿದ್ದೇವೆ. ನಮಗೆ ಹೆಂಡತಿ ಸಮಸ್ಯೆ ಇಲ್ಲದಿದ್ದರೂ, ತಾಯಿ ಮತ್ತು ಸಹೋದರಿಯರಿದ್ದಾರೆ," ಎಂದು ಮಾರ್ಮಿಕವಾಗಿ ನುಡಿದರು.

​ಸರ್ಕಾರದ ವಿರುದ್ಧ ರಾಜಕೀಯ ವಾಗ್ದಾಳಿ-
​ವೈಯಕ್ತಿಕ ಟೀಕೆಗಳ ಬೆನ್ನಲ್ಲೇ ಸರ್ಕಾರದ ನೀತಿಗಳ ಮೇಲೆ ರಾಹುಲ್ ಕಟುವಾದ ಟೀಕೆಗಳನ್ನು ಮಾಡಿದರು.

​ರಾಜಕೀಯ ಲಾಭ: ಬಿಜೆಪಿ ಸರ್ಕಾರವು ಮಹಿಳೆಯರ ಅಭಿವೃದ್ಧಿಯ ಹೆಸರಿನಲ್ಲಿ ಕೇವಲ ರಾಜಕೀಯ ಲಾಭ ಪಡೆಯಲು ಯತ್ನಿಸುತ್ತಿದೆ.
​ಕ್ಷೇತ್ರ ಪುನರ್ವಿಂಗಡಣೆ ತಂತ್ರ: ಮಹಿಳೆಯರ ಬೆನ್ನ ಹಿಂದೆ ಅಡಗಿ ಬಿಜೆಪಿ ಸರ್ಕಾರವು ಭಾರತದ ಚುನಾವಣಾ ನಕ್ಷೆಯನ್ನು ತನಗೆ ಬೇಕಾದಂತೆ ಬದಲಿಸಲು ಹೊರಟಿದೆ.

​ದಕ್ಷಿಣ ಭಾರತಕ್ಕೆ ಅನ್ಯಾಯ: ಕ್ಷೇತ್ರ ಪುನರ್ವಿಂಗಡಣೆಯ ಮೂಲಕ ದಕ್ಷಿಣ ಭಾರತದ ರಾಜ್ಯಗಳ ರಾಜಕೀಯ ಶಕ್ತಿಯನ್ನು ಕುಂದಿಸುವುದು ಸರ್ಕಾರದ ಅಸಲಿ ಉದ್ದೇಶ ಎಂದು ರಾಹುಲ್ ಆರೋಪಿಸಿದರು.

​ಒಬಿಸಿ ಕಡೆಗಣನೆ: ಮಹಿಳಾ ಮೀಸಲಾತಿಯಲ್ಲಿ ಒಬಿಸಿ (OBC) ಸಮುದಾಯದ ಮಹಿಳೆಯರನ್ನು ಕಡೆಗಣಿಸಲಾಗಿದೆ ಎಂಬ ಗಂಭೀರ ಆರೋಪವನ್ನು ಅವರು ಪುನರುಚ್ಚರಿಸಿದರು.

​ಸದನದಲ್ಲಿ ಕುತೂಹಲ-
​ಗಂಭೀರ ರಾಜಕೀಯ ಆರೋಪ-ಪ್ರತ್ಯಾರೋಪಗಳ ನಡುವೆ ರಾಹುಲ್ ಗಾಂಧಿ ಅವರ "ಹೆಂಡತಿ ಸಮಸ್ಯೆ ಇಲ್ಲ" ಎಂಬ ಹೇಳಿಕೆಯು ಸದನದಲ್ಲಿ ಕೆಲಕಾಲ ನಗೆಪಾಟಲಿಗೂ ಮತ್ತು ಅಚ್ಚರಿಗೂ ಕಾರಣವಾಯಿತು. ಒಟ್ಟಾರೆಯಾಗಿ, ಮಹಿಳಾ ಮೀಸಲಾತಿ ಮಸೂದೆಯು ಕೇವಲ ಅಂಕಿ-ಅಂಶಗಳ ಆಟವಾಗದೆ, ಸಾಮಾಜಿಕ ನ್ಯಾಯದ ಭಾಗವಾಗಬೇಕು ಎಂಬುದು ವಿರೋಧ ಪಕ್ಷದ ನಾಯಕರ ವಾದವಾಗಿತ್ತು.