ಚಂದ್ರವಳ್ಳಿ ನ್ಯೂಸ್, ದೊಡ್ಡಬಳ್ಳಾಪುರ:
ದೊಡ್ಡಬೆಳವಂಗಲ ಹೋಬಳಿ ಚಿಗರೇನಹಳ್ಳಿಯಲ್ಲಿನ ಎಂಎಸ್‌ಜಿಪಿ ಕಸ ವಿಲೇವಾರಿ ಘಟಕದಲ್ಲಿ ಕಸ ವಿಂಗಡಣೆ ಕೆಲಸ ಮಾಡುತ್ತಿದ್ದ ವೇಳೆ ಶುಕ್ರವಾರ ಬೆಳಗ್ಗೆ 11ಗಂಟೆ ಸುಮಾರಿಗೆ ಯಂತ್ರಕ್ಕೆ ಸಿಕ್ಕಿ ಅರಸಮ್ಮ(45) ಮೃತಪಟ್ಟಿರುವ ಘಟನೆ ನಡೆದಿದೆ.
ಕಸ ವಿಲೇವಾರಿ ಘಟಕದ ಸಮೀಪದಲ್ಲಿನ ಕಾಡುತಿಪ್ಪೂರು ಗ್ರಾಮದ ಅರಸಮ್ಮ ಎಂ.ಎಸ್.ಜಿ.ಪಿ ಕಸವಿಲೇವಾರಿ ಘಟಕದಲ್ಲಿ ಗ್ರೇಟ‌ರ್ ಬೆಂಗಳೂರು ವ್ಯಾಪ್ತಿಯಿಂದ ಬರುವ ಕಸದಲ್ಲಿನ ಪ್ಲಾಸ್ಟಿಕ್ ಅನ್ನು ಯಂತ್ರಗಳಿಂದ ವಿಂಗಡಿಸುವ ಕೆಲಸ ಮಾಡುತ್ತಿದ್ದರು.
ಅಕ್ಟೋಬರ್ 2 ಗಾಂಧಿ ಜಯಂತಿ, ಸರ್ಕಾರಿ ರಜೆ ಇದ್ದರು. ರಜೆ ದಿನ ಅರಸಮ್ಮ ಎಂಬಾಕೆಗೆ ದೂರವಾಣಿ ಕರೆ ಮಾಡಿ ಕೆಲಸವಿದೆ ಬನ್ನಿ ಎಂದು ಎಂ.ಎಸ್.ಜಿ.ಪಿ. ಘಟಕದ ಅಧಿಕಾರಿಗಳು ಕರೆ ಮಾಡಿದ್ದರು. ಆಕೆ ಕೂಡ ಎಂದಿನಂತೆ ಬೆಳಗ್ಗೆಯೇ ಕೆಲಸಕ್ಕೆ ಹಾಜರಿದ್ದಳು.
ಆದರೆ ದಿನವಿಡೀ ಕಸ ಆಯುತ್ತಿದ್ದ ಅರಸಮ್ಮ, ಇಂದು ಮಾತ್ರ ಕಸ ವಿಂಗಡನೆ ಮಾಡುವ ಯಂತ್ರದ ಬಳಿ ಕೆಲಸಕ್ಕೆ ಮುಂದಾಗಿದ್ದಾಳೆ. ಯಾವುದೇ ಮುಂಜಾಗ್ರತಾ ಸಲಕರಣೆಗಳು, ಸುರಕ್ಷತಾ ಕವಚಗಳಿಲ್ಲದೆ ಕೆಲಸ ಮಾಡುತ್ತಿರುವ ವೇಳೆಯೇ ದುರದೃಷ್ಟವಶಾತ್ ವೇಗವಾಗಿ ತಿರುಗುವ ಯಂತ್ರದ ರಭಸಕ್ಕೆ ಸಿಕ್ಕಿ ದೇಹ ತುಂಡು ತುಂಡುಗಳಾಗಿದೆ. ಅರಸಮ್ಮ ಅವರು ವಿವಾಹದ ಎರಡೇ ವರ್ಷಗಳಲ್ಲಿ ಇವರ ಪತಿಯು ಅಪಘಾತದಲ್ಲಿ ಮೃತಪಟ್ಟಿದ್ದರು.
ಇವರಿಗೆ ಇದ್ದ ಒಬ್ಬಳೆ ಮಗಳನ್ನು ಕಷ್ಟಪಟ್ಟು ಬೆಳೆಸಿ, ವಿವಾಹವನ್ನು ಮಾಡಿಕೊಟ್ಟಿದ್ದರು. ಅರಸಮ್ಮ ಅವರ ಸಹೋದರ ಸಹ ಅಪಘಾತದಲ್ಲಿ ಗಾಯಗೊಂಡಿದದರಿಂದ ವಯಸ್ಸಾಗಿದ್ದ ತಾಯಿಯನ್ನು ಅವರೇ ಪೋಷಣೆ ಮಾಡುತ್ತಿದ್ದರು. ಈಗ ಅರಸಮ್ಮ ಅವರ ಸಾವಿನಿಂದ ಇವರನ್ನು ಪೋಷಣೆ ಮಾಡುವವರು ಯಾರು ಎಂದು ಸ್ದಳೀಯರು ನೋವು ತೋಡಿಕೊಂಡಿದ್ದಾರೆ.
ಮೃತ ಅರಸಮ್ಮ ಅವರ ಪುತ್ರಿಗೆ ಕಸ ವಿಲೇವಾರಿ ಘಟಕದ ಮಾಲೀಕರಿಂದ 35 ಲಕ್ಷ ಪರಿಹಾರವನ್ನು ಸ್ಥಳೀಯರು ಕೊಡಿಸಿದ್ದಾರೆ. ಘಟನೆ ಸಂಬಂದಿಸಿದಂತೆ ದೊಡ್ಡಬೆಳವಂಗಲ ಈ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರೆದಿದೆ.
