ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
“ಅರಣ್ಯವು ಕೇವಲ ಮರಗಳ ಗುಂಪಲ್ಲ, ಅದು ಜೀವಸಂಕುಲದ ಉಳಿವು ಮತ್ತು ವಿಕಸನದ ಆಧಾರಸ್ತಂಭ,” ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ವಿಶ್ವ ಅರಣ್ಯ ದಿನದಂದು ಪರಿಸರ ಸಂರಕ್ಷಣೆಯ ಮಹತ್ವ ಸಾರಿದ್ದಾರೆ.
ಈ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿರುವ ಅವರು, ಪ್ರಕೃತಿ ಮತ್ತು ಮಾನವನ ಅವಿನಾಭಾವ ಸಂಬಂಧವನ್ನು ಅವರು ಬಿಚ್ಚಿಟ್ಟಿದ್ದಾರೆ.
ಬದುಕಿನ ಮೂಲ ಅರಣ್ಯ:
ಕಾಡಿದ್ದರೆ ಮಾತ್ರ ನಮಗೆ ಶುದ್ಧವಾದ ಗಾಳಿ, ಉಣ್ಣಲು ಅನ್ನ ಮತ್ತು ಕುಡಿಯಲು ನೀರು ಲಭ್ಯವಾಗುತ್ತದೆ. ಅರಣ್ಯ ನಾಶವಾದರೆ ಮನುಕುಲದ ಅಸ್ತಿತ್ವಕ್ಕೇ ಸಂಚಕಾರ ಬರಲಿದೆ ಎಂಬ ಎಚ್ಚರಿಕೆಯನ್ನು ಸಿದ್ದರಾಮಯ್ಯ ನೀಡಿದ್ದಾರೆ.
ಭವಿಷ್ಯದ ಹೂಡಿಕೆ:
ನಾವು ಇಂದು ನೆಡುವ ಪ್ರತಿಯೊಂದು ಗಿಡ ಮತ್ತು ಅದಕ್ಕೆ ಎರೆವ ನೀರು ಕೇವಲ ಇಂದಿನ ಕೆಲಸವಲ್ಲ, ಅದು ನಮ್ಮ ಭವಿಷ್ಯದ ಮೇಲಿನ ಹೂಡಿಕೆ. ಗಿಡ-ಮರಗಳನ್ನು ಬೆಳೆಸುವ ಮೂಲಕ ಪರಿಸರ ಮಾಲಿನ್ಯವನ್ನು ತಡೆಗಟ್ಟುವುದು ನಮ್ಮ ಆದ್ಯ ಕರ್ತವ್ಯವಾಗಲಿ ಎಂದು ಆಶಿಸಿದ್ದಾರೆ.
ಮುಂದಿನ ಪೀಳಿಗೆಗಾಗಿ ಸಂಕಲ್ಪ:
ಪ್ರಕೃತಿಯ ಋಣ: ಗಿಡಗಳನ್ನು ಬೆಳೆಸುವ ಮೂಲಕ ನಾವು ಪರಿಸರಕ್ಕೆ ನೀಡಬೇಕಾದ ಋಣವನ್ನು ತೀರಿಸೋಣ.
ಕೊಡುಗೆ: ನಾವು ಸುಂದರವಾಗಿ ಬದುಕುವುದರ ಜೊತೆಗೆ, ಮುಂದಿನ ತಲೆಮಾರಿಗೂ ಒಂದು ಸ್ವಸ್ಥ ಮತ್ತು ಹಸಿರು ಪರಿಸರವನ್ನು ಉಡುಗೊರೆಯಾಗಿ ನೀಡೋಣ.
ನಿತ್ಯದ ಅಭ್ಯಾಸ: ಪರಿಸರ ಕಾಳಜಿಯು ಕೇವಲ ಒಂದು ದಿನದ ಆಚರಣೆಯಾಗದೆ, ನಮ್ಮ ದಿನನಿತ್ಯದ ಬದುಕಿನ ಭಾಗವಾಗಬೇಕು.
”ಹಸಿರಾಗಲಿ ಧರೆ, ಹಸನಾಗಲಿ ಬದುಕು” ಎನ್ನುವ ಘೋಷವಾಕ್ಯದೊಂದಿಗೆ ಮುಖ್ಯಮಂತ್ರಿಗಳು ಜನರಲ್ಲಿ ಹಸಿರು ಕ್ರಾಂತಿಯ ಕಿಚ್ಚು ಹಚ್ಚಿದ್ದಾರೆ.
