ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಮೈಸೂರಿನ ಸಯ್ಯಾಜಿರಾವ್ ರಸ್ತೆಯ ಸರ್ಕಾರಿ ಆಯುರ್ವೇದ ಆಸ್ಪತ್ರೆಯಲ್ಲಿ “ಅಲ್ಟ್ರಾ ಸೌಂಡ್ ಸ್ಕ್ಯಾನಿಂಗ್” ವಿಭಾಗದಲ್ಲಿ ಪೂರ್ಣಕಾಲಿಕ ಖಾಯಂ ವೈದ್ಯರಿಲ್ಲದೇ, ರೋಗಿಗಳು ವಾರಗಟ್ಟಲೇ ನೋವು ಅನುಭವಿಸುತ್ತಿರುವುದು ಕರ್ನಾಟಕ ಕಾಂಗ್ರೆಸ್ ಸರ್ಕಾರದ ಬೇಜಾವ್ದಾರಿಗೆ ನಿದರ್ಶನ ಎಂದು ಜೆಡಿಎಸ್ ಟೀಕಿಸಿದೆ.
2 ಬಾರಿ ಡಿಸಿಎಂ, 2 ಬಾರಿ ವಿರೋಧ ಪಕ್ಷದ ನಾಯಕರಾಗಿ, 2 ಸಲ ಮುಖ್ಯಮಂತ್ರಿಗಳಾಗಿರುವ ಸಿದ್ದರಾಮಯ್ಯ ನವರ ತವರು ಜಿಲ್ಲೆಯಲ್ಲೇ ಇಂತಹ ಅವ್ಯವಸ್ಥೆ ನಾಚಿಕೆಗೇಡು ಎಂದು ಜೆಡಿಎಸ್ ಟೀಕಾಪ್ರಹಾರ ಮಾಡಿದೆ.
ಆಸ್ಪತ್ರೆಯಲ್ಲಿ ಒಂದು ವಾರದ ಮುಂಚೆ ನೋಂದಣಿ ಮಾಡಿಕೊಂಡ ನಿಗದಿತ ಸಂಖ್ಯೆಯ ರೋಗಿಗಳಿಗೆ ಪ್ರತಿ ಗುರುವಾರ ಬೆಳಿಗ್ಗೆ 9ರಿಂದ 10ರವರೆಗೆ ಮಾತ್ರ ಒಬ್ಬ ವೈದ್ಯರು ಸ್ಕ್ಯಾನಿಂಗ್ ಮಾಡುತ್ತಾರೆ. ರೋಗಿಗಳು ತಡವಾಗಿ ಬಂದರೆ, ವೈದ್ಯರು ರಜೆ ಹಾಕಿದರೇ ಅಥವಾ ಸರ್ಕಾರಿ ರಜೆ ಇದ್ದರೆ, ಮತ್ತೆ 1 ವಾರದವರೆಗೆ ಕಾಯುವ ಶಿಕ್ಷೆ ಸರಿಯೇ ?
ಖಾಸಗಿ ಸ್ಕ್ಯಾನಿಂಗ್ ಸೆಂಟರ್ಗಳಲ್ಲಿ ಸಾವಿರಾರು ರೂ. ನೀಡಲು ಸಾಧ್ಯವಾಗದ ಬಡವರು, ಉಚಿತ ಎಂಬ ಕಾರಣ ದೂರದ ಊರುಗಳಿಂದ ಮುಂಜಾನೆಯೇ ಬಂದಿರುತ್ತಾರೆ.
ಆರೋಗ್ಯ ಇಲಾಖೆಯ ಇಂತಹ ಅವ್ಯವಸ್ಥೆಗಳಿಂದ ತಿಂಗಳುಗಟ್ಟಲೇ ಕಾದುಕೊಂಡಿರುವ ತುರ್ತು ಚಿಕಿತ್ಸೆ ಪಡೆಯಬೇಕಾದ ರೋಗಿಗಳ ಆರೋಗ್ಯ ಸ್ಥಿತಿ ಏನಾಗಬೇಕು ಆರೋಗ್ಯ ಸಚಿವ ದಿನೇಶ್ ಗುಂಡೂರಾವ್ ಅವರೇ ?
ಗ್ರೇಟರ್ ಮೈಸೂರು ಮಾಡುತ್ತೇವೆಂದು ಎಂದು ಬಡಾಯಿ ಕೊಚ್ಚಿಕೊಳ್ಳುವ ಕಾಂಗ್ರೆಸ್ಸರ್ಕಾರ, ತಕ್ಷಣ ಕ್ರಮ ಕೈಗೊಂಡು ಸ್ಕ್ಯಾನಿಂಗ್ ವಿಭಾಗಕ್ಕೆ ಪೂರ್ಣಕಾಲಿಕ ವೈದ್ಯರನ್ನು ನೇಮಿಸಿ, ಬಡರೋಗಿಗಳ ಜೀವ ಉಳಿಸುವ ಕೆಲಸ ಮಾಡಬೇಕು ಎಂದು ಜೆಡಿಎಸ್ ಆಗ್ರಹಿಸಿದೆ.
