ಬಾಮೈದನ ಕೊಲೆ ಮಾಡಿದ ದಂಪತಿಗೆ ಜೀವಾವಧಿ ಶಿಕ್ಷೆ: ಚಿತ್ರದುರ್ಗ ನ್ಯಾಯಾಲಯದಿಂದ ತೀರ್ಪು

ಬಾಮೈದನ ಕೊಲೆ ಮಾಡಿದ ದಂಪತಿಗೆ ಜೀವಾವಧಿ ಶಿಕ್ಷೆ: ಚಿತ್ರದುರ್ಗ ನ್ಯಾಯಾಲಯದಿಂದ ತೀರ್ಪು
ಚಂದ್ರವಳ್ಳಿ ನ್ಯೂಸ್, ಚಿತ್ರದುರ್ಗ:
ಹಣಕಾಸಿನ ವಿಚಾರ ಹಾಗೂ ಕೌಟುಂಬಿಕ ಕಲಹದ ಹಿನ್ನೆಲೆಯಲ್ಲಿ ತನ್ನ ಸ್ವಂತ ಬಾಮೈದನನ್ನೇ ಅಮಾನುಷವಾಗಿ ಕೊಲೆ ಮಾಡಿದ ದಂಪತಿಗೆ ಇಲ್ಲಿನ ಅಪರ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯವು ಜೀವಾವಧಿ ಶಿಕ್ಷೆ ಹಾಗೂ ತಲಾ 50,000/- ರೂಪಾಯಿ ದಂಡ ವಿಧಿಸಿ ತೀರ್ಪು ನೀಡಿದೆ.

ಪ್ರಕರಣದ ಹಿನ್ನೆಲೆ:
ಹಿರಿಯೂರು ತಾಲೂಕಿನ ಪಿಲಾಲಿ ಗ್ರಾಮದ ತಿಮ್ಮರಾಜು (ಆರೋಪಿ-1) ಹಾಗೂ ಆತನ ಪತ್ನಿ ರಾಧಮ್ಮ (ಆರೋಪಿ-2) ಶಿಕ್ಷೆಗೆ ಒಳಗಾದವರು. ಮೃತ ಬಸವರಾಜ ಎಂಬುವವರು ರಾಧಮ್ಮನ ತಮ್ಮನಾಗಿದ್ದು, ಹೊಳಲ್ಕೆರೆ ತಾಲೂಕಿನ ಶಿವಗಂಗಾ ಗ್ರಾಮದ ನಿವಾಸಿಯಾಗಿದ್ದರು.

ಘಟನೆಯ ವಿವರ ಹೀಗಿದೆ:
ಹಣಕಾಸಿನ ವಿವಾದ: ಆರೋಪಿ ತಿಮ್ಮರಾಜು ಮೃತ ಬಸವರಾಜನಿಂದ 40,000 ರೂಪಾಯಿ ಸಾಲ ಪಡೆದಿದ್ದರು.
ಕೌಟುಂಬಿಕ ಕಲಹ: ಕೋವಿಡ್ ಲಾಕ್‌ಡೌನ್ ಸಮಯದಲ್ಲಿ ಬಸವರಾಜನು ತನ್ನ ಅಕ್ಕ ರಾಧಮ್ಮ ಮತ್ತು ಆಕೆಯ ಮಕ್ಕಳನ್ನು ಅಡುಗೆ ಹಾಗೂ ಕೆಲಸಕ್ಕಾಗಿ ತನ್ನ ಮನೆಗೆ ಕರೆತಂದಿದ್ದನು. ನಂತರ ಅವರನ್ನು ವಾಪಸ್ ಕಳುಹಿಸಲು ನಿರಾಕರಿಸಿದ ಬಸವರಾಜ, ಅವರನ್ನು ಸಾಕಿರುವುದಕ್ಕೆ ಪ್ರತಿಯಾಗಿ 5 ಲಕ್ಷ ರೂಪಾಯಿ ನೀಡುವಂತೆ ಪಟ್ಟು ಹಿಡಿದಿದ್ದನು. ಇದರಿಂದ ಆಕ್ರೋಶಗೊಂಡ ಆರೋಪಿಗಳು ಬಸವರಾಜನನ್ನು ಕೊಲೆ ಮಾಡಲು ಸಂಚು ರೂಪಿಸಿದ್ದರು.

ಕೃತ್ಯ ನಡೆದ ಬಗೆ:
ದಿನಾಂಕ 14.01.2023 ರಂದು ಬೆಳಗಿನ ಜಾವ 4:45 ಗಂಟೆ ಸುಮಾರಿಗೆ, ಆರೋಪಿಗಳಿಬ್ಬರು ಬಸವರಾಜನ ಮನೆಗೆ ನುಗ್ಗಿ, ಮಂಚದ ಮೇಲೆ ಮಲಗಿದ್ದ ಆತನ ಮುಖ, ಕುತ್ತಿಗೆ ಹಾಗೂ ತಲೆಗೆ ಮಚ್ಚಿನಿಂದ ಕೊಚ್ಚಿ ಕೊಲೆ ಮಾಡಿದ್ದರು. ಸಾಕ್ಷ್ಯ ನಾಶಪಡಿಸುವ ಉದ್ದೇಶದಿಂದ ರಕ್ತಸಿಕ್ತ ಬಟ್ಟೆಗಳು ಹಾಗೂ ಮೊಬೈಲ್ ಅನ್ನು ಒಲೆಯಲ್ಲಿ ಹಾಕಿ ಸುಟ್ಟು ಹಾಕಿದ್ದರು.

ನ್ಯಾಯಾಲಯದ ತೀರ್ಪು:
ಚಿತ್ರಹಳ್ಳಿ ಗೇಟ್ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿದ್ದ ಈ ಪ್ರಕರಣದ ತನಿಖೆಯನ್ನು ಸಿ.ಪಿ.ಐ. ರವೀಶ್ ಕೆ.ಎನ್. ಹಾಗೂ ದೀಪಕ್ ಎಂ.ಎಸ್. ಅವರು ಪೂರೈಸಿ ನ್ಯಾಯಾಲಯಕ್ಕೆ ದೋಷಾರೋಪಣಾ ಪಟ್ಟಿ ಸಲ್ಲಿಸಿದ್ದರು.

ಪ್ರಕರಣದ ಸುದೀರ್ಘ ವಿಚಾರಣೆ ನಡೆಸಿದ ಅಪರ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶರಾದ ವೀರಣ್ಣ ಸೋಮಶೇಖರ ರವರು, ಆರೋಪಿಗಳ ಮೇಲಿನ ಐಪಿಸಿ ಕಲಂ 302, 201 ಹಾಗೂ 34 ಅಡಿಯಲ್ಲಿನ ಅಪರಾಧ ಸಾಬೀತಾದ ಹಿನ್ನೆಲೆಯಲ್ಲಿ ಈ ಮಹತ್ವದ ತೀರ್ಪು ಪ್ರಕಟಿಸಿದ್ದಾರೆ. ಸರ್ಕಾರದ ಪರವಾಗಿ ಸರ್ಕಾರಿ ಅಭಿಯೋಜಕ ಶಂಶೀರ್ ಅಲಿಖಾನ್ ಅವರು ವಾದ ಮಂಡಿಸಿದ್ದರು.