ಚಂದ್ರವಳ್ಳಿ ನ್ಯೂಸ್, ಚಿತ್ರದುರ್ಗ:
ದೇಶದ ಮಹಿಳೆಯರಿಗೆ ರಾಜಕೀಯವಾಗಿ ಮಹತ್ತರ ಶಕ್ತಿ ನೀಡಬಲ್ಲ 'ನಾರಿ ಶಕ್ತಿ ವಂದನ ಅಧಿನಿಯಮ'ಕ್ಕೆ ಸಂಬಂಧಿಸಿದ ಸಂವಿಧಾನ ತಿದ್ದುಪಡಿ ಮಸೂದೆಯು ಲೋಕಸಭೆಯಲ್ಲಿ ಅಂಗೀಕಾರಗೊಳ್ಳದೆ ವಿಫಲವಾಗಿದೆ.
ಮಹಿಳಾ ಸಬಲೀಕರಣದ ಹಾದಿಯಲ್ಲಿ ಇದೊಂದು ಐತಿಹಾಸಿಕ ಹೆಜ್ಜೆಯಾಗಬೇಕಿತ್ತು, ಆದರೆ ಕಾಂಗ್ರೆಸ್ ಮತ್ತು ಅದರ 'ಇಂಡಿ' (I.N.D.I.A) ಮೈತ್ರಿಕೂಟದ ವಿರೋಧದಿಂದಾಗಿ ಈ ಮಹತ್ವದ ಅವಕಾಶ ಈಗ ಕೈತಪ್ಪಿದಂತಾಗಿದೆ ಎಂದು ಬಿಜೆಪಿ ಯುವ ನಾಯಕ ಚಿತ್ರದುರ್ಗದ ಬಿ.ಸಿ ಹನುಮಂತೇಗೌಡ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಒಂದೇ ಹೆಜ್ಜೆಯ ಅಂತರದಲ್ಲಿ ವಿಫಲ:
ಲೋಕಸಭೆಯಲ್ಲಿ ಈ ಮಸೂದೆಯ ಮೇಲೆ ನಡೆದ ಮತದಾನದಲ್ಲಿ 298 ಸದಸ್ಯರು ಪರವಾಗಿ ಮತ ಚಲಾಯಿಸಿದರೆ, 230 ಸದಸ್ಯರು ವಿರುದ್ಧವಾಗಿ ಮತ ಹಾಕಿದರು. ಸಂವಿಧಾನ ತಿದ್ದುಪಡಿ ಮಸೂದೆಗೆ ಅಗತ್ಯವಿದ್ದ ಮೂರನೇ ಎರಡರಷ್ಟು (ಅಂದರೆ ಕನಿಷ್ಠ 352) ಬಹುಮತ ಸಿಗದ ಕಾರಣ ಮಸೂದೆಯು ಪತನಗೊಂಡಿತು. ಈ ಮೂಲಕ ದಶಕಗಳ ಕಾಲದ ಮಹಿಳೆಯರ ಮೀಸಲಾತಿ ಕನಸು ನನಸಾಗಲು ಕೇವಲ ಒಂದು ಹೆಜ್ಜೆ ಬಾಕಿ ಇರುವಾಗ ವಿಪಕ್ಷಗಳು ಅದಕ್ಕೆ ತಣ್ಣೀರೆರಚಿವೆ ಎಂದು ಹನುಮಂತೇಗೌಡ ದೂರಿದ್ದಾರೆ.
"ಮಹಿಳೆಯರಿಗೆ ಶಕ್ತಿ ತುಂಬುವ ಐತಿಹಾಸಿಕ ಸಂದರ್ಭ ಬಂದಾಗ ಕಾಂಗ್ರೆಸ್ ಮತ್ತು ಅದರ ಮಿತ್ರಪಕ್ಷಗಳು ತಮ್ಮ ವಿರೋಧಿ ನಿಲುವನ್ನು ಪ್ರದರ್ಶಿಸಿವೆ. ಮಹಿಳೆಯರ ಹಕ್ಕನ್ನು ಕಿತ್ತುಕೊಳ್ಳುವ ಮೂಲಕ ದೇಶದ ಮಾತೃಶಕ್ತಿಗೆ ದ್ರೋಹ ಎಸಗಲಾಗಿದೆ," ಎಂದು ಅವರು ಟೀಕಿಸಿದ್ದಲ್ಲದೆ ಈ ದಿನವನ್ನು ಪ್ರಜಾಪ್ರಭುತ್ವದ ಇತಿಹಾಸದಲ್ಲಿ 'ಕಪ್ಪು ದಿನ' ಎಂದು ಹನುಮಂತೇಗೌಡರು ಬಣ್ಣಿಸಿದರು.
ಮುಂದಿನ ದಿನಗಳಲ್ಲಿ ಜಯ ನಿಶ್ಚಿತ:
ಸದ್ಯಕ್ಕೆ ತಾಂತ್ರಿಕ ಕಾರಣಗಳಿಂದಾಗಿ ಹಿನ್ನಡೆಯಾಗಿದ್ದರೂ, ಮುಂಬರುವ ದಿನಗಳಲ್ಲಿ ನಾರಿ ಶಕ್ತಿಗೆ ಸೂಕ್ತ ಸ್ಥಾನಮಾನ ಮತ್ತು ಅಧಿಕಾರ ಸಿಕ್ಕೇ ಸಿಗುತ್ತದೆ ಎಂಬ ಭರವಸೆ ಇದೆ ಎಂದು ಗೌಡರು ವಿಶ್ವಾಸ ವ್ಯಕ್ತಪಡಿಸಿದರು.
ಕಾಂಗ್ರೆಸ್ ಪಕ್ಷ ಮಾಡಿರುವ ಸಂಚಿನಿಂದಾದ ಈ ಸೋಲನ್ನು ದೇಶದ ಮಹಿಳೆಯರು ಮರೆಯುವುದಿಲ್ಲ ಮತ್ತು ಮುಂಬರುವ ದಿನಗಳಲ್ಲಿ ಇದಕ್ಕೆ ತಕ್ಕ ಉತ್ತರವನ್ನು ಮಹಿಳೆಯರು ನೀಡಲಿದ್ದಾರೆ ಎಂದು ಬಿ.ಸಿ ಹನುಮಂತೇಗೌಡರು ಎಚ್ಚರಿಸಿದ್ದಾರೆ.
