ಚಂದ್ರವಳ್ಳಿ ನ್ಯೂಸ್, ಚಿತ್ರದುರ್ಗ:
ಹಿರಿಯೂರು ತಾಲ್ಲೂಕಿನ ಹರಿಯಬ್ಬೆ ಗ್ರಾಮದವರಾದ ಹಿರಿಯ ರಂಗಭೂಮಿ ಕಲಾವಿದ, ಸಾಹಿತಿ ಹಾಗೂ ನಿರ್ದೇಶಕರಾದ ಜಿ.ಡಿ. ತಿಮ್ಮಯ್ಯ (ತೋಟದ ದೊಡ್ಡ ತಿಮ್ಮಯ್ಯ) ಅವರು ಕಲಾಕ್ಷೇತ್ರದಲ್ಲಿ ದೀರ್ಘಕಾಲದಿಂದ ಸೇವೆ ಸಲ್ಲಿಸುತ್ತಿದ್ದಾರೆ. 1936ರ ಆಗಸ್ಟ್ 13ರಂದು ಜನಿಸಿದ ಇವರಿಗೆ ಈಗ 87 ವರ್ಷ ವಯಸ್ಸು. ತಂದೆ ಗಿರೇ ತಿಮ್ಮಯ್ಯ ಹಾಗೂ ತಾಯಿ ತಿಮ್ಮಕ್ಕ.
ರಂಗಭೂಮಿ ಮತ್ತು ಕಲಾ ಸೇವೆ:
ಜಿ.ಡಿ. ತಿಮ್ಮಯ್ಯ ಅವರು ಅಭಿನಯ, ಗಾಯನ, ಜಾನಪದ ಗೀತೆ ಗಾಯನ, ಹಾರ್ಮೋನಿಯಂ ವಾದನ, ನಾಟಕ ನಿರ್ದೇಶನ, ಸಾಹಿತ್ಯ ರಚನೆ ಮತ್ತು ರಾಗ ಸಂಯೋಜನೆಯಲ್ಲಿ ಪರಿಣತಿ ಹೊಂದಿದ್ದಾರೆ.
ಟಿ. ತಿಪ್ಪೇಸ್ವಾಮಿ (ಪರಶುರಾಪುರ), ಎಂ. ರಾಮಸ್ವಾಮಿ (ಹಿರಿಯೂರು) ಮತ್ತು ಹಿರಿಯೂರಿನ ಏಕನಾಥೇಶ್ವರಿ ಸಂಗೀತ ಶಾಲೆಯಲ್ಲಿ ಕಲಾ ಶಿಕ್ಷಣ ಪಡೆದಿದ್ದಾರೆ.
1986ರಲ್ಲಿ ಹರಿಯಬ್ಬೆಯಲ್ಲಿ 'ಶ್ರೀ ಶಾಂತಲಾ ಕನ್ನಡ ಲಲಿತ ಕಲಾ ಸಂಘ'ವನ್ನು ಸ್ಥಾಪಿಸಿ, ಬಯಲು ರಂಗಮಂದಿರ ನಿರ್ಮಾಣಕ್ಕೆ ಕಾರಣಕರ್ತರಾಗಿದ್ದಾರೆ. ಅಲ್ಲದೆ, ಚಿತ್ರದುರ್ಗ ಜಿಲ್ಲಾ ನಾಟಕ ಕಲಾವಿದರ ಒಕ್ಕೂಟದ ಗೌರವಾಧ್ಯಕ್ಷರಾಗಿಯೂ ಸೇವೆ ಸಲ್ಲಿಸುತ್ತಿದ್ದಾರೆ.
'ಮಾನವತಿ', 'ವಿಜಯನಗರ ಪತನ', 'ರಾಜ ವೀರ ಮದಕರಿ ನಾಯಕ', 'ಚಾಣಕ್ಯ ಚಂದ್ರಗುಪ್ತ', 'ಕಲ್ಯಾಣ ಕ್ರಾಂತಿ' ಸೇರಿದಂತೆ ಅನೇಕ ಪೌರಾಣಿಕ, ಸಾಮಾಜಿಕ ಮತ್ತು ಐತಿಹಾಸಿಕ ನಾಟಕಗಳನ್ನು ನಿರ್ದೇಶಿಸಿದ್ದಾರೆ.
ಆಕಾಶವಾಣಿ ಹಾಗೂ ದೂರದರ್ಶನದಲ್ಲಿ ಕಾರ್ಯಕ್ರಮಗಳನ್ನು ನೀಡಿರುವ ಇವರು, 2013ರಲ್ಲಿ 'ಕವನ ಕುಸುಮ' ಕವನ ಸಂಕಲನವನ್ನು ಬಿಡುಗಡೆ ಮಾಡಿದ್ದಾರೆ. ಅನೇಕ ಯುವಕರಿಗೆ ಸಂಗೀತ ಹಾಗೂ ನಾಟಕ ನಿರ್ದೇಶನದಲ್ಲಿ ತರಬೇತಿ ನೀಡಿದ್ದಾರೆ.
ಪ್ರಮುಖ ಪ್ರಶಸ್ತಿ ಹಾಗೂ ಸನ್ಮಾನಗಳು:
ಕರ್ನಾಟಕ ನಾಟಕ ಅಕಾಡಮಿ ಪ್ರಶಸ್ತಿ (ಕಲಬುರ್ಗಿ)
ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ಚಿತ್ರದುರ್ಗ
ಡಾ. ರಾಜ್‌ಕುಮಾರ್‌ರವರಿಂದ ಸವಿ ನೆನಪಿನ ಪತ್ರ (ದಾವಣಗೆರೆ ವೃತ್ತಿ ರಂಗಭೂಮಿ ಕಲಾವಿದರ ಸಮ್ಮೇಳನ)
ಕರ್ನಾಟಕ ಜಾನಪದ ಪರಿಷತ್ತು ಹಾಗೂ ಕನ್ನಡ ಸಾಹಿತ್ಯ ಪರಿಷತ್ತಿನಿಂದ ಅಭಿನಂದನಾ ಪತ್ರಗಳು
ಚಿತ್ರದುರ್ಗ ಆಕಾಶವಾಣಿ ಮತ್ತು ಬೆಂಗಳೂರು ಚಂದನ ದೂರದರ್ಶನದ ಫೆಲೋಷಿಪ್
ಕಲೆಯ ಸೇವೆ ಹಾಗೂ ಸಮಾಜಮುಖಿ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿರುವ ಜಿ.ಡಿ. ತಿಮ್ಮಯ್ಯ ಅವರು ಜಿಲ್ಲೆಯ ಸಾಂಸ್ಕೃತಿಕ ಲೋಕಕ್ಕೆ ಅಪಾರ ಕೊಡುಗೆಯನ್ನು ನೀಡಿದ್ದಾರೆ.
