ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ರಾಜ್ಯ ರಾಜಕಾರಣದಲ್ಲಿ ಸ್ಟಿಂಗ್‌ಆಪರೇಷನ್‌ಕೋಲಾಹಲ ತೀವ್ರಗೊಳ್ಳುತ್ತಿರುವ ಬೆನ್ನಲ್ಲೇ, ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್‌ಸ್ಫೋಟಕ ಹೇಳಿಕೆಯೊಂದನ್ನು ನೀಡಿದ್ದಾರೆ. ಮೆಟಾ ಎಐ ಕನ್ನಡಕ ಧರಿಸಿದ್ದ ಉದ್ಯಮಿಯೊಬ್ಬರು ತಮ್ಮನ್ನು ಭೇಟಿಯಾಗಿದ್ದು, ಇದು ತಮ್ಮ ಮೇಲೆ ಕಣ್ಣಿಡುವ ಮೂಲಕ ಸ್ಟಿಂಗ್‌ಆಪರೇಷನ್‌ನಡೆಸಲು ಮಾಡಿದ ಸಂಚಿರಬಹುದು ಎಂದು ಅವರು ತೀವ್ರ ಶಂಕೆ ವ್ಯಕ್ತಪಡಿಸಿದ್ದಾರೆ.
ಖಾಸಗಿ ಸುದ್ದಿವಾಹಿನಿಯೊಂದರ ಸಂದರ್ಶನದಲ್ಲಿ ಮಾತನಾಡಿರುವ ಡಿ.ಕೆ. ಶಿವಕುಮಾರ್, "ದೇವರು ನನಗೆ ಮುಖಗಳನ್ನು ಓದುವ ಶಕ್ತಿಯನ್ನು ನೀಡಿದ್ದಾನೆ. ಪ್ರತಿದಿನ ಸಾವಿರಾರು ಜನರು ನನ್ನನ್ನು ಭೇಟಿಯಾಗುತ್ತಾರೆ. ನನ್ನ ಅನುಭವದ ಆಧಾರದ ಮೇಲೆ ಯಾರಾದರೂ ಯಾವ ಉದ್ದೇಶಕ್ಕಾಗಿ ಬಂದಿದ್ದಾರೆ ಎಂಬುದನ್ನು ಅವರ ಮುಖಚರ್ಯೆಯಿಂದಲೇ ನಾನು ಗ್ರಹಿಸಬಲ್ಲೆ" ಎಂದಿದ್ದಾರೆ.
ಡಿಕೆಶಿ ವಿರುದ್ಧ ಮೆಟಾ ಗ್ಲಾಸ್‌ಬಳಸಿ ಸ್ಟಿಂಗ್‌ಆಪರೇಷನ್‌ಗೆ ಯತ್ನ!..
ಘಟನೆಯ ವಿವರ ಹಂಚಿಕೊಂಡಿರುವ ಡಿ.ಕೆ ಶಿವಕುಮಾರ್ ಅವರು, "ಒಮ್ಮೆ ಮೆಟಾ ಸ್ಮಾರ್ಟ್‌ಕನ್ನಡಕ ಧರಿಸಿದ್ದ ಉದ್ಯಮಿಯೊಬ್ಬರು ಅಧಿಕಾರಿಗಳ ಮೂಲಕ ಅಪಾಯಿಂಟ್ಮೆಂಟ್ ಪಡೆದು ನನ್ನನ್ನು ಭೇಟಿಯಾಗಲು ಬಂದಿದ್ದರು. ಮುಂಭಾಗದ ಕೋಣೆಗೆ ತೆರಳಿ ಲ್ಯಾಪ್‌ಟಾಪ್‌ತೆರೆದ ಆ ವ್ಯಕ್ತಿ, ಆರಂಭದಲ್ಲಿ ಉದ್ಯಮದ ಕುರಿತು ಮಾತನಾಡಿದರು. ಆದರೆ, ಕ್ರಮೇಣ ಆ ಮಾತನ್ನು ನಿಲ್ಲಿಸಿ, ರಾಜಕೀಯ ಹಾಗೂ ಬೂತ್‌ಮಟ್ಟದಲ್ಲಿ ಯಾವ ತಂತ್ರಗಳನ್ನು ಮಾಡಬಹುದು ಎಂಬ ಬಗ್ಗೆ ಚರ್ಚಿಸಲು ಶುರು ಮಾಡಿದರು. ಇದು ನನಗೆ ಅನುಮಾನ ಮೂಡಿಸಿತು" ಎಂದು ತಿಳಿಸಿದ್ದಾರೆ.
ಮುಂದುವರೆದು, "ಆ ವ್ಯಕ್ತಿ ಮೆಟಾ ಸ್ಮಾರ್ಟ್‌ಎಐ ಗ್ಲಾಸ್‌ಬಳಸಿರುವುದನ್ನು ನಾನು ಗಮನಿಸಿದ್ದೆ. ತನಿಖೆ ನಡೆಸಿದಾಗ, ಈ ಉದ್ಯಮಿ ನನ್ನನ್ನು ಮತ್ತು ಕೇರಳ ಸಿಎಂ ವಿ.ಡಿ. ಸತೀಶನ್‌ಅವರನ್ನು ಭೇಟಿಯಾದಾಗ ಮಾತ್ರ ಈ ಕನ್ನಡಕ ಧರಿಸಿದ್ದರು ಎಂಬುದು ತಿಳಿದುಬಂದಿದೆ. ಆದರೆ, ಇದೇ ವ್ಯಕ್ತಿ ಆಂಧ್ರಪ್ರದೇಶದ ಮುಖ್ಯಮಂತ್ರಿ ಎನ್. ಚಂದ್ರಬಾಬು ನಾಯ್ಡು ಮತ್ತು ಕೇಂದ್ರ ಸಚಿವರು ಸೇರಿದಂತೆ ಇತರೆ ಪ್ರಮುಖ ರಾಜಕೀಯ ವ್ಯಕ್ತಿಗಳನ್ನು ಭೇಟಿಯಾದಾಗ ಈ ಗ್ಲಾಸ್‌ಧರಿಸಿರಲಿಲ್ಲ" ಎಂದು ಆರೋಪಿಸಿದ್ದಾರೆ.
ಸಚಿವರಿಗೂ ಎಚ್ಚರಿಕೆ ನೀಡಿದ್ದೆ: ಡಿ.ಕೆ. ಶಿವಕುಮಾರ್
ತಮ್ಮ ಹಾಗೂ ತಮ್ಮ ಸಚಿವರ ಮೇಲೆ ಸ್ಟಿಂಗ್ ಆಪರೇಷನ್ ನಡೆಸುವ ಪ್ರಯತ್ನಗಳು ನಡೆಯುತ್ತಿವೆ ಎಂಬ ವಿಶ್ವಾಸಾರ್ಹ ಮಾಹಿತಿ ತಮಗೆ ಲಭಿಸಿದೆ ಎಂದಿರುವ ಡಿ.ಕೆ. ಶಿವಕುಮಾರ್, "ಕುಟುಂಬದ ಮುಖ್ಯಸ್ಥನಾಗಿ ಸಚಿವ ಸಂಪುಟ ಸಭೆಯಲ್ಲಿ ನನ್ನ ಸಚಿವರಿಗೆ ಜಾಗರೂಕರಾಗಿರಲು ಸಲಹೆ ನೀಡಿದ್ದೆ. ಬಲೆಗೆ ಬೀಳದಂತೆ ಎಚ್ಚರಿಸಿದ್ದೆ. ಇದರಲ್ಲಿ ತಪ್ಪೇನಿದೆ? ನನ್ನ ಬಳಿ ಸೂಕ್ತ ದಾಖಲೆಗಳಿವೆ" ಎಂದಿದ್ದಾರೆ. ಅಲ್ಲದೆ, "ಈ ಪ್ರಕರಣದಲ್ಲಿ ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ಯಾರು ಹೇಳಿದ್ದು? ಎಲ್ಲವನ್ನೂ ಸಾರ್ವಜನಿಕವಾಗಿ ಬಹಿರಂಗಪಡಿಸಲು ಸಾಧ್ಯವಿಲ್ಲ, ಸೂಕ್ತ ಸಮಯ ಬಂದಾಗ ಎಲ್ಲಾ ಮಾಹಿತಿ ನೀಡುತ್ತೇನೆ" ಎಂದು ಸ್ಪಷ್ಟಪಡಿಸಿದ್ದಾರೆ.
ಮೆಟಾ ಎಐ ಸ್ಮಾರ್ಟ್ಗ್ಲಾಸ್ ಕಾರ್ಯನಿರ್ವಹಣೆ ಮತ್ತು ಸವಾಲುಗಳು ಏನು?
ಡಿ.ಕೆ. ಶಿವಕುಮಾರ್‌ಅವರ ಈ ಹೇಳಿಕೆಯು 'ಮೆಟಾ ಎಐ ಸ್ಮಾರ್ಟ್ಗ್ಲಾಸ್' ತಂತ್ರಜ್ಞಾನ ಹಾಗೂ ಅದು ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬ ಬಗ್ಗೆ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
ಮೆಟಾ ಸ್ಮಾರ್ಟ್‌ಗ್ಲಾಸ್‌ನ ಉಪಯೋಗಗಳು:
ಕೈಗಳ ಬಳಕೆಯಿಲ್ಲದೆ ಸೆರೆಹಿಡಿಯುವಿಕೆ: ಇದು ಯಾವುದೇ ಹಸ್ತಕ್ಷೇಪವಿಲ್ಲದೆ ಕನ್ನಡಕದ ಮೂಲಕವೇ ಸುತ್ತಲಿನ ದೃಶ್ಯಗಳನ್ನು ಕ್ಯಾಮೆರಾ ಕಣ್ಣಿನಲ್ಲಿ ಸೆರೆಹಿಡಿಯಲು ನೆರವಾಗುತ್ತದೆ.
ಎಚ್‌ಡಿ ಫೋಟೋ ಹಾಗೂ ವೀಡಿಯೊ: ಬಿಲ್ಟ್-ಇನ್ ಕ್ಯಾಮೆರಾಗಳ ಮೂಲಕ ಹೈ-ಡೆಫಿನಿಷನ್ ಫೋಟೋಗಳು ಮತ್ತು ಪಾಯಿಂಟ್ ಆಫ್ ವ್ಯೂ ವೀಡಿಯೊಗಳನ್ನು ಸೆರೆಹಿಡಿಯಬಹುದು ಹಾಗೂ ಸೋಶಿಯಲ್ ಮೀಡಿಯಾಗೆ ನೇರವಾಗಿ ಲೈವ್‌ಸ್ಟ್ರೀಮ್ ಮಾಡಬಹುದು.
ನೈಜ ಸಮಯದ ವಿಶ್ಲೇಷಣೆ: ಧ್ವನಿ ಆಜ್ಞೆಗಳ ಮೂಲಕ ಪಠ್ಯವನ್ನು ಅನುವಾದಿಸಲು, ಸುತ್ತಲಿನ ವಸ್ತುಗಳನ್ನು ಗುರುತಿಸಲು ಮತ್ತು ಪ್ರಶ್ನೆಗಳಿಗೆ ಉತ್ತರಿಸಲು ಇದು ಸಹಾಯ ಮಾಡುತ್ತದೆ.
ಆಡಿಯೋ ಫೀಚರ್‌: ಬಿಲ್ಟ್-ಇನ್ ಆಡಿಯೋ ಮೂಲಕ ಫೋನ್ ಕರೆಗಳನ್ನು ಸ್ವೀಕರಿಸಲು, ವಾಯ್ಸ್ ಕಮಾಂಡ್ ನೀಡಲು ಮತ್ತು ಸಂಗೀತ ಕೇಳಿಸಿಕೊಳ್ಳಲು ಅವಕಾಶವಿದೆ.
ಮೆಟಾ ಸ್ಮಾರ್ಟ್ಗ್ಲಾಸ್ ಎದುರಿಸುವ ಸವಾಲುಗಳು:
ಸ್ಮಾರ್ಟ್‌ಫೋನ್ ಅವಲಂಬನೆ: ಇಂಟರ್ನೆಟ್ ಸಂಪರ್ಕ, ಎಐ ಸಂಸ್ಕರಣೆ ಮತ್ತು ಮಾಧ್ಯಮಗಳ ಸಿಂಕಿಂಗ್‌ಗಾಗಿ ಇದು ಸಂಪೂರ್ಣವಾಗಿ ಜೋಡಿಯಾದ ಸ್ಮಾರ್ಟ್‌ಫೋನ್‌ನ ಮೇಲೆ ಅವಲಂಬಿತವಾಗಿರುತ್ತದೆ. ಫೋನ್ ಸಂಪರ್ಕವಿಲ್ಲದೆ ಇದರ ಕಾರ್ಯನಿರ್ವಹಣೆ ಕಷ್ಟಕರ.
ಬ್ಯಾಟರಿ ಮತ್ತು ಸ್ಟೋರೆಜ್ ಮಿತಿ: ನಿರಂತರ ವೀಡಿಯೊ ರೆಕಾರ್ಡಿಂಗ್ ಅಥವಾ ಎಐ ಬಳಕೆಯ ಸಮಯದಲ್ಲಿ ಬ್ಯಾಟರಿ ಬೇಗನೆ ಖಾಲಿಯಾಗುತ್ತದೆ ಮತ್ತು ಸೀಮಿತ ಅಂತರ್ನಿರ್ಮಿತ ಸ್ಟೋರೆಜ್ ಹೊಂದಿರುತ್ತದೆ.
ಗೌಪ್ಯತೆ ನಿಯಂತ್ರಣ: ಕ್ಯಾಮೆರಾ ಆನ್ ಇದ್ದಾಗ ಹೊರಭಾಗದಲ್ಲಿರುವ ಕಡ್ಡಾಯ LED ರೆಕಾರ್ಡಿಂಗ್ ಸೂಚಕವು ಬೆಳಕನ್ನು ಬೀರುವುದರಿಂದ, ರಹಸ್ಯವಾಗಿ ಚಿತ್ರೀಕರಿಸುವುದನ್ನು ಗುರುತಿಸಲು ಇದು ಸಹಾಯ ಮಾಡುತ್ತದೆ.
