ಚಂದ್ರವಳ್ಳಿ ನ್ಯೂಸ್, ಐಚಿ-ನಗೋಯಾ (ಜಪಾನ್‌):
ಜಪಾನ್‌ನ ಐಚಿ-ನಗೋಯಾದಲ್ಲಿ ನಡೆದ 2026ರ ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ ಭಾರತೀಯ ಪ್ಯಾರಾ ಅಥ್ಲೀಟ್‌ಗಳು ಸರ್ವಶ್ರೇಷ್ಠ ಪ್ರದರ್ಶನ ನೀಡುವ ಮೂಲಕ ಸಾರ್ವಕಾಲಿಕ ದಾಖಲೆಯ 114 ಪದಕಗಳನ್ನು ಗೆದ್ದು ಇತಿಹಾಸ ನಿರ್ಮಿಸಿದ್ದಾರೆ. ಕೇವಲ 168 ಸ್ಪರ್ಧಿಗಳ ಸಣ್ಣ ತಂಡದೊಂದಿಗೆ ಕಣಕ್ಕಿಳಿದಿದ್ದ ಭಾರತ, ಪದಕ ಪಟ್ಟಿಯಲ್ಲಿ 4ನೇ ಸ್ಥಾನ ಪಡೆಯುವ ಮೂಲಕ ಜಾಗತಿಕ ಕ್ರೀಡಾಂಗಣದಲ್ಲಿ ತನ್ನ ಪ್ರಾಬಲ್ಯವನ್ನು ಮೆರೆದಿದೆ. ಭಾರತದ ಪದಕಗಳ ಹಬ್ಬ: ಚೀನಾದ ಹ್ಯಾಂಗ್‌ಝೌನಲ್ಲಿ ನಡೆದಿದ್ದ ಕಳೆದ ಆವೃತ್ತಿಯ 108 ಪದಕಗಳ ಸಾಧನೆಯನ್ನು ಮೀರಿ ನಿಂತಿರುವ ಭಾರತ, ಈ ಬಾರಿ ಜಪಾನ್‌ನಲ್ಲಿ ಬಂಗಾರದ ಬೇಟೆಯಾಡಿದೆ.
ಚಿನ್ನ: 30 ಬೆಳ್ಳಿ: 35 ಕಂಚು: 49 ಒಟ್ಟು ಪದಕಗಳು: 114 ಟೂರ್ನಿಯ ಪ್ರಮುಖ ಐತಿಹಾಸಿಕ ಮೈಲಿಗಲ್ಲುಗಳು.
ಧ್ವಜಧಾರಿಗಳಾದ ದ್ವಿಪದಕ ವೀರರು: ಟ್ರ್ಯಾಕ್ ತಾರೆ ನಿಶಾದ್ ಕುಮಾರ್ (ಪುರುಷರ ಹೈಜಂಪ್ ಮತ್ತು ಲಾಂಗ್ ಜಂಪ್ T47) ಹಾಗೂ ಶೂಟಿಂಗ್ ಪಟು ಮೋನಾ ಅಗರ್ವಾಲ್ ತಲಾ 2 ಚಿನ್ನದ ಪದಕಗಳನ್ನು ಮುಡಿಗೇರಿಸಿಕೊಂಡು ಸಮಾರೋಪ ಸಮಾರಂಭದಲ್ಲಿ ಭಾರತದ ಧ್ವಜಧಾರಿಗಳಾಗಿ ಮುನ್ನಡೆಸಿದರು.
ವಿಶ್ವ ದಾಖಲೆಯ ಶೂಟಿಂಗ್: ಮಹಿಳೆಯರ 50 ಮೀಟರ್ ರೈಫಲ್ 3 ಪೊಸಿಷನ್ಸ್ SH1 ವಿಭಾಗದಲ್ಲಿ ಮೋನಾ ಅಗರ್ವಾಲ್ 357.5 ಸ್ಕೋರ್ ಕಲೆಹಾಕುವ ಮೂಲಕ ಹೊಸ ವಿಶ್ವ ದಾಖಲೆಯೊಂದಿಗೆ ಬಂಗಾರಕ್ಕೆ ಮುತ್ತಿಕ್ಕಿದರು.
ಭಾರತದ 'ಪೋಡಿಯಂ ಸ್ವೀಪ್': ಪುರುಷರ ಜಾವೆಲಿನ್ ಥ್ರೋ (F42-F44/F61-F64) ಫೈನಲ್‌ನಲ್ಲಿ ಒಲಿಂಪಿಕ್ ಚಾಂಪಿಯನ್ ಸುಮಿತ್ ಅಂಟಿಲ್ 72.46 ಮೀಟರ್ ಎಸೆದು ನೂತನ ದಾಖಲೆಯೊಂದಿಗೆ ಚಿನ್ನ ಗೆದ್ದರೆ, ಮಹೇಂದ್ರ ಗುರ್ಜರ್ ಬೆಳ್ಳಿ ಹಾಗೂ ಸಂದೀಪ್ ಸಂಜಯ್ ಕಾಂಸ್ಯ ಪದಕ ಪಡೆದು ಇಡೀ ಪೋಡಿಯಂ ಅನ್ನು ಭಾರತದ ಮಯವಾಗಿಸಿದರು.
ಕ್ಲಬ್ ಥ್ರೋನಲ್ಲಿ ಏಷ್ಯನ್ ದಾಖಲೆ: ಪುರುಷರ ಕ್ಲಬ್ ಥ್ರೋ F51 ವಿಭಾಗದಲ್ಲಿ ಪ್ರಣವ್ ಸೂರ್ಮಾ 32.87 ಮೀಟರ್ ಎಸೆಯುವ ಮೂಲಕ ಹೊಸ ಏಷ್ಯನ್ ಪ್ಯಾರಾ ಗೇಮ್ಸ್ ದಾಖಲೆಯೊಂದಿಗೆ ಚಿನ್ನದ ಪದಕ ತಮ್ಮದಾಗಿಸಿಕೊಂಡರು.
ಬ್ಯಾಡ್ಮಿಂಟನ್‌ನಲ್ಲಿ ಸ್ವರ್ಣ ಕ್ರಾಂತಿ: ಪುರುಷರ ಸಿಂಗಲ್ಸ್ SL3 ನಲ್ಲಿ ನಿತೇಶ್ ಕುಮಾರ್ ಚಿನ್ನ ಗೆದ್ದರೆ, ಪ್ರಮೋದ್ ಭಗತ್ ಬೆಳ್ಳಿಗೆ ತೃಪ್ತಿಪಟ್ಟುಕೊಂಡರು. ಇನ್ನು ಮಹಿಳೆಯರ ಡಬಲ್ಸ್‌ನಲ್ಲಿ ತುಳಸಿಮತಿ ಮುರುಗೇಸನ್ ಮತ್ತು ಮಾನಸಿ ಜೋಡಿ ಚೀನಾ ತಂಡವನ್ನು ಮಣಿಸಿ ಐತಿಹಾಸಿಕ ಚಿನ್ನ ಮುಡಿಗೇರಿಸಿಕೊಂಡಿತು.
ಪ್ಯಾರಾ ಅಥ್ಲೆಟಿಕ್ಸ್‌ನ ಸಿಂಹಪಾಲು:ಭಾರತ ಗೆದ್ದ ಒಟ್ಟು ಪದಕಗಳಲ್ಲಿ ಗರಿಷ್ಠ ಕೊಡುಗೆಯನ್ನು ಪ್ಯಾರಾ ಅಥ್ಲೆಟಿಕ್ಸ್ ವಿಭಾಗ ನೀಡಿದ್ದು, ಒಟ್ಟು 65 ಪದಕಗಳನ್ನು (22 ಚಿನ್ನ, 19 ಬೆಳ್ಳಿ, 24 ಕಂಚು) ತಂದುಕೊಟ್ಟಿದೆ. ಇದರ ಜೊತೆಗೆ ಈ ಬಾರಿ ಬ್ಯಾಡ್ಮಿಂಟನ್, ಬಿಲ್ಲುಗಾರಿಕೆ (ಆರ್ಚರಿ) ಮತ್ತು ಶೂಟಿಂಗ್ ವಿಭಾಗಗಳಲ್ಲೂ ಭಾರತೀಯ ಕ್ರೀಡಾಪಟುಗಳು ದಾಖಲೆ ಮಟ್ಟದ ಚಿನ್ನದ ಪದಕಗಳನ್ನು ಬಾಚಿಕೊಂಡಿದ್ದಾರೆ.
ಕೊನೆಯ ದಿನದವರೆಗೂ ಭಾರತದ 4ನೇ ಸ್ಥಾನಕ್ಕೆ ದಕ್ಷಿಣ ಕೊರಿಯಾ ತೀವ್ರ ಪೈಪೋಟಿ ನೀಡಿತಾದರೂ, ಕೇವಲ 29 ಚಿನ್ನ ಗೆದ್ದು 5ನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತು. ಈ ಮೂಲಕ ಭಾರತವು ಏಷ್ಯನ್ ಪ್ಯಾರಾ ಕ್ರೀಡಾಕೂಟದ ಇತಿಹಾಸದಲ್ಲೇ ತನ್ನ ಅತ್ಯುತ್ತಮ ಸಾಧನೆಯನ್ನು ದಾಖಲಿಸಿ ಹೊಸ ಇತಿಹಾಸ ಬರೆದಿದೆ.
