ಚಂದ್ರವಳ್ಳಿ ನ್ಯೂಸ್, ದಾವಣಗೆರೆ:
ಆತಿಥೇಯ ದಾವಣಗೆರೆ ವಿಶ್ವವಿದ್ಯಾನಿಲಯ ಸೇರಿದಂತೆ ಮಂಗಳೂರು, ಬೆಂಗಳೂರು ಉತ್ತರ ಮತ್ತು ಕ್ಯಾಲಿಕತ್ ವಿಶ್ವವಿದ್ಯಾಲಯಗಳು ಅಖಿಲ ಭಾರತ ಅಂತರ ವಿಶ್ವವಿದ್ಯಾಲಯ ಖೋಖೋ ಟೂರ್ನಿಗೆ ಅರ್ಹತೆ ಪಡೆದಿವೆ.
ದಾವಣಗೆರೆ ವಿಶ್ವವಿದ್ಯಾನಿಲಯ ಆವರಣದಲ್ಲಿ ಶನಿವಾರ ನಡೆದ ಅರ್ಹತಾ ಸುತ್ತಿನ ಪಂದ್ಯದಲ್ಲಿ ದಾವಣಗೆರೆ ವಿಶ್ವವಿದ್ಯಾನಿಲಯ ತಂಡವು ಮದ್ರಾಸ್ ವಿಶ್ವವಿದ್ಯಾಲಯವನ್ನು ೧೩-೧೧ರಿಂದ ಮಣಿಸಿತು. ವಿಜೇತ ತಂಡದ ಟಿ. ಹುಲಗಪ್ಪ (೩.೧೦ ನಿಮಿಷ ಡಾಜಿಂಗ್ ಮತ್ತು ೨ ಅಂಕಗಳು) ಮತ್ತು ಜೆ.ಜಿ.ಶರತ್ (೨.೪೦ ನಿಮಿಷ ಡಾಜಿಂಗ್) ಅವರ ಉತ್ತಮ ಆಟ ಗೆಲುವಿಗೆ ನೆರವಾಯಿತು. ಮದ್ರಾಸ್ ತಂಡದ ತರುಣ್ ವಿಘ್ನೇಶ್ವರನ್ (೨.೧೦ ನಿಮಿಷ ಡಾಜಿಂಗ್ ಮತ್ತು ೩ ಅಂಕಗಳು) ಉತ್ತಮ ಪ್ರದರ್ಶನ ನೀಡಿದರು.
ಇನ್ನೊಂದು ತೀವ್ರ ಸೆಣಸಾಟದ ಪಂದ್ಯದಲ್ಲಿ ಬೆಂಗಳೂರು ಉತ್ತರ ವಿಶ್ವವಿದ್ಯಾಲಯವು ೧೬-೧೫ರಿಂದ ಭಾರತೀದಾಸನ್ ವಿಶ್ವವಿದ್ಯಾಲಯವನ್ನು ಸೋಲಿಸಿತು. ಬೆಂಗಳೂರು ತಂಡದ ಐವಾನ್ ಪಾಷಾ ೭ ನಿಮಿಷ ಡಾಜಿಂಗ್ ಮಾಡಿ, ೬ ಅಂಕ ಗಳಿಸಿ ಗೆಲುವಿನ ರೂವಾರಿಯಾದರು. ಎದುರಾಳಿ ತಂಡದ ಹರಿಪ್ರಶಾಂತ್ (೩.೪೦ ನಿ. ಡಾಜಿಂಗ್ ಮತ್ತು ೩ ಅಂಕಗಳು) ಉತ್ತಮ ಆಟವಾಡಿದರು.
ಮಂಗಳೂರು ವಿಶ್ವವಿದ್ಯಾಲಯವು ಮತ್ತೊಂದು ಪಂದ್ಯದಲ್ಲಿ ೧೪-೪ ರಿಂದ ಏಕಪಕ್ಷೀಯವಾಗಿ ಮೈಸೂರು ವಿಶ್ವವಿದ್ಯಾಲಯ ತಂಡವನ್ನು ಸುಲಭವಾಗಿ ಸೋಲಿಸಿ ರಾಷ್ಟ್ರೀಯ ಟೂರ್ನಿಗೆ ಅರ್ಹತೆ ಪಡೆಯಿತು. ವಿಜಯೀ ತಂಡದ ಅಭಿಜಿತ್ (೬ ನಿಮಿಷ ಡಾಜಿಂಗ್) ಮತ್ತು ನಿಖಿಲ್ (೪ ನಿಮಿಷ ಡಾಜಿಂಗ್ ಮತ್ತು ೨ ಅಂಕಗಳು) ಉತ್ತಮ ಆಟ ಪ್ರದರ್ಶಿಸಿದರು.
ಕ್ಯಾಲಿಕತ್ ವಿಶ್ವವಿದ್ಯಾಲಯವು ೧೮-೧೬ರಿಂದ ಕೇರಳ ವಿಶ್ವವಿದ್ಯಾಲಯ ತಂಡವನ್ನು ಸೋಲಿಸಿ ಲೀಗ್ ಹಂತಕ್ಕೆ ಪ್ರವೇಶಿಸಿತು. ಕ್ಯಾಲಿಕತ್ ತಂಡದ ಅತುಲ್ ವೇಣು ಅತ್ಯುತ್ತಮ ಆಟವಾಡಿದರು.
