ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಅಕ್ರಮವಾಗಿ ಇ-ಖಾತಾ ವಿತರಿಸಿ 'ಸರ್ಫೇಸಿ' ಕಾಯ್ದೆಯನ್ನು ಉಲ್ಲಂಘಿಸಿದ ಆರೋಪದ ಮೇಲೆ, ಪ್ರಭಾರ ಕಂದಾಯ ಅಧಿಕಾರಿ ಬಸವರಾಜ್ ಮಾಗಿ ಸೇರಿದಂತೆ 31 ಜನರ ವಿರುದ್ಧ ಹಲಸೂರು ಗೇಟ್ ಪೊಲೀಸ್ ಠಾಣೆಯಲ್ಲಿ ಎಫ್‌ಐಆರ್ ದಾಖಲಾಗಿದೆ.
ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ (ಜಿಬಿಎ) ವಿಶೇಷ ಆಯುಕ್ತ ಮೌನೀಶ್ ಮೌದ್ಗಿಲ್ ಅವರು ನವೆಂಬರ್ 9ರಂದು ಈ ಸಂಬಂಧ ದೂರು ನೀಡಿದ್ದರು. ದೂರಿನನ್ವಯ ಬಸವರಾಜ್ ಮಾಗಿ (ಕೆಆರ್ ಪುರಂ ಸಹಾಯಕ ಆಯುಕ್ತ) ಅವರನ್ನು ಪ್ರಕರಣದ ಮೊದಲ ಆರೋಪಿಯನ್ನಾಗಿ ಹೆಸರಿಸಲಾಗಿದೆ. ಇದೇ ಪ್ರಕರಣದಲ್ಲಿ ಅಮಾನತು ಶಿಫಾರಸಿಗೆ ಒಳಗಾಗಿದ್ದ ಕೆಂಗೇರಿ ವಿಭಾಗದ ಪ್ರಭಾರ ಕಂದಾಯ ಅಧಿಕಾರಿ ಡಿ.ಎಸ್. ಲೋಕಮಾತ ಅವರ ವಿರುದ್ಧದ ಎಫ್‌ಐಆರ್ ವಿವರಗಳು ಇನ್ನಷ್ಟೇ ದೃಢಪಡಬೇಕಿದೆ ಎಂದು ಜಿಬಿಎ ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.
ಪ್ರಕರಣದ ಹಿನ್ನೆಲೆ: ನಿಯಮಗಳ ಪ್ರಕಾರ, ದೀರ್ಘಾವಧಿ ಬಾಕಿ ಉಳಿಸಿಕೊಂಡ ಆಸ್ತಿಗಳನ್ನು ಸ್ವಾಧೀನಪಡಿಸಿಕೊಳ್ಳಲು ಬ್ಯಾಂಕ್‌ಗಳಿಗೆ ಮಾತ್ರ 'ಸರ್ಫೇಸಿ' ಕಾಯ್ದೆಯಡಿ ಇ-ಖಾತಾ ನೀಡಲು ಅವಕಾಶವಿದೆ. ಆದರೆ, ಈ ಅಧಿಕಾರಿಗಳು ಬಿಲ್ಡರ್‌ಗಳು ಹಾಗೂ ಡೆವಲಪರ್‌ಗಳೊಂದಿಗೆ ಶಾಮೀಲಾಗಿ ಕಾನೂನುಬಾಹಿರವಾಗಿ ಇ-ಖಾತಾ ನೀಡಿದ್ದಾರೆ. ಅಲ್ಲದೆ, ಕಂದಾಯ ಭೂಮಿಯಲ್ಲಿ ಬಿ-ಖಾತಾ ವ್ಯಾಪ್ತಿಗೆ ಬರುವ ಆಸ್ತಿಗಳಿಗೂ ಅಕ್ರಮವಾಗಿ ಇ-ಖಾತಾ ವಿತರಿಸಿರುವುದು ತನಿಖೆಯಿಂದ ತಿಳಿದುಬಂದಿದೆ.
ಈ ಇಬ್ಬರು ಅಧಿಕಾರಿಗಳ ಅಮಾನತು ಶಿಫಾರಸನ್ನು ವಿರೋಧಿಸಿ ಗ್ರೇಟರ್ ಬೆಂಗಳೂರು ಅಧಿಕಾರಿಗಳು ಮತ್ತು ನೌಕರರ ಸಂಘ ಪ್ರತಿಭಟನೆ ನಡೆಸಲು ಸಜ್ಜಾಗುತ್ತಿರುವ ಬೆನ್ನಲ್ಲೇ, ವಿಶೇಷ ಆಯುಕ್ತರು ಪೊಲೀಸ್ ದೂರು ದಾಖಲಿಸುವ ಮೂಲಕ ಕಠಿಣ ಕ್ರಮ ಕೈಗೊಂಡಿದ್ದಾರೆ.
