ಐಪಿಎಲ್ ಫೈನಲ್ ಸ್ಥಳಾಂತರ ವಿವಾದ: ಕಾಂಗ್ರೆಸ್ ವಿರುದ್ಧ ಜೆಡಿಎಸ್ ಕಿಡಿ

​ ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಐಪಿಎಲ್ ಫೈನಲ್‌ಪಂದ್ಯವನ್ನು ಬೆಂಗಳೂರಿನಿಂದ ಅಹಮದಾಬಾದ್‌ಗೆ ಸ್ಥಳಾಂತರ ಮಾಡಿರುವುದಕ್ಕೆ ಸಂಬಂಧಿಸಿದಂತೆ ರಾಜ್ಯ ಕಾಂಗ್ರೆಸ್‌ಸರ್ಕಾರ ಮತ್ತು ಯೂತ್ ಕಾಂಗ್ರೆಸ್ ಅಧ್ಯಕ್ಷ ಬಿ.ವಿ. ಶ್ರೀನಿವಾಸ್ ವಿರುದ್ಧ ಜೆಡಿಎಸ್ ತೀವ್ರ ವಾಗ್ದಾಳಿ ನಡೆಸಿದೆ. ಸರಣಿ ಟ್ವೀಟ್ ಮಾಡಿರುವ ಜೆಡಿಎಸ್, ಫೈನಲ್ ಪಂದ್ಯ ಕೈತಪ್ಪಲು ಕಾಂಗ್ರೆಸ್ ಸರ್ಕಾರದ "ಉಚಿತ ಟಿಕೆಟ್" ದಾಹವೇ ಕಾರಣ ಎಂದು ಗಂಭೀರವಾಗಿ ಆರೋಪಿಸಿದೆ.

​10,000 ವಿವಿಐಪಿ ಟಿಕೆಟ್‌ಗಳ ಬೇಡಿಕೆ?-
​ಬೆಂಗಳೂರಿನಿಂದ ಪಂದ್ಯ ಸ್ಥಳಾಂತರಗೊಳ್ಳಲು ಬಿಸಿಸಿಐ ಕಾರ್ಯದರ್ಶಿ ದೇವಜಿತ್ ಸೈಕಿಯಾ ನೀಡಿರುವ ಸ್ಪಷ್ಟನೆಯನ್ನು ಉಲ್ಲೇಖಿಸಿರುವ ಜೆಡಿಎಸ್, "ರಾಜ್ಯದ ಕಾಂಗ್ರೆಸ್ ಸರ್ಕಾರ ಬರೋಬ್ಬರಿ 10,000 ಉಚಿತ (VVIP) ಟಿಕೆಟ್‌ಗಳಿಗಾಗಿ ಬೇಡಿಕೆ ಇಟ್ಟಿತ್ತು. ಈ ಲಜ್ಜೆಗೆಟ್ಟ ಬೇಡಿಕೆಯಿಂದಾಗಿಯೇ ಪಂದ್ಯ ಕೈತಪ್ಪಿದೆ," ಎಂದು ದೂರಿದೆ. ಈ ಹಿಂದೆ ಸದನದಲ್ಲೇ ಶಾಸಕರು ಬಿಟ್ಟಿ ಟಿಕೆಟ್‌ಗಾಗಿ ಬೇಡಿಕೆ ಇಟ್ಟಿದ್ದನ್ನು ಜೆಡಿಎಸ್ ನೆನಪಿಸಿದೆ.

​ಗಾಂಧಿ ಕುಟುಂಬದ ವಿರುದ್ಧ ವಾಗ್ದಾಳಿ-
​ಯೂತ್ ಕಾಂಗ್ರೆಸ್ ಅಧ್ಯಕ್ಷ ಬಿ.ವಿ. ಶ್ರೀನಿವಾಸ್ ಅವರಿಗೆ ತಿರುಗೇಟು ನೀಡಿರುವ ಜೆಡಿಎಸ್, "ಇಟಲಿ ಕಾಂಗ್ರೆಸ್‌ನ ಚಮಚಾಗಿರಿಯಲ್ಲಿ ಬದುಕುತ್ತಿರುವ ನಿಮಗೆ ನಕಲಿ ಗಾಂಧಿ ಕುಟುಂಬದ ವಂಶ ರಾಜಕಾರಣದ ಬಗ್ಗೆ ಮಾತನಾಡಲು ನಾಲಿಗೆ ಬಿದ್ದು ಹೋಗಿದೆಯೇ? ಅಹಮದಾಬಾದ್‌ಗೆ ಪಂದ್ಯ ಸ್ಥಳಾಂತರವಾದ ಬಗ್ಗೆ ಮಾತನಾಡುವ ನಿಮಗೆ ಅಸಲಿ ಕಾರಣ ತಿಳಿದಿಲ್ಲದಿರುವುದು ನಿಮ್ಮ ಅವಿವೇಕಿತನಕ್ಕೆ ಹಿಡಿದ ಕನ್ನಡಿ," ಎಂದು ವೀಕ್ಷಿಸಿದೆ.

​ಹಳೆಯ ಘಟನೆಗಳ ನೆನಪು-
​ಕಳೆದ ವರ್ಷ ಬೆಂಗಳೂರಿನಲ್ಲಿ ನಡೆದ ಪಂದ್ಯದ ವೇಳೆ ಸಂಭವಿಸಿದ ದುರಂತವನ್ನು ಪ್ರಸ್ತಾಪಿಸಿರುವ ಜೆಡಿಎಸ್, "ಪಿಆರ್ ಸ್ಟಂಟ್ ಮಾಡುವ ಡಿ.ಕೆ. ಶಿವಕುಮಾರ್ ಅವರ ಪ್ರಚಾರದ ತೆವಲಿಗೆ ಕಳೆದ ವರ್ಷ 11 ಮಂದಿ ಆರ್‌ಸಿಬಿ ಅಭಿಮಾನಿಗಳು ಬಲಿಯಾಗಿದ್ದು ಮರೆತುಹೋಯಿತೇ?" ಎಂದು ಪ್ರಶ್ನಿಸಿದೆ. "ಕ್ರಿಕೆಟ್ ಪ್ರೇಮದ ಬಗ್ಗೆ ಪಾಠ ಮಾಡುವ ನೈತಿಕತೆ ಕಾಂಗ್ರೆಸ್ ಸರ್ಕಾರಕ್ಕಿಲ್ಲ," ಎಂದು ಜೆಡಿಎಸ್ ಆಕ್ರೋಶ ವ್ಯಕ್ತಪಡಿಸಿದೆ.

​ಒಟ್ಟಾರೆಯಾಗಿ, ಐಪಿಎಲ್ ಕ್ರಿಕೆಟ್ ವಿಚಾರ ಈಗ ರಾಜ್ಯ ರಾಜಕೀಯದಲ್ಲಿ ಆಡಳಿತ ಮತ್ತು ವಿರೋಧ ಪಕ್ಷಗಳ ನಡುವೆ ದೊಡ್ಡ ಮಟ್ಟದ ವಾಕ್ಸಮರಕ್ಕೆ ಕಾರಣವಾಗಿದೆ.