ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಗ್ರಾಮೀಣ ಭಾಗದ ಆಸ್ತಿಗಳಿಗೆ ಇ-ಸ್ವತ್ತು ನೀಡುವಲ್ಲಿನ ವಿಳಂಬವನ್ನು ತಪ್ಪಿಸಲು ರಾಜ್ಯ ಸರ್ಕಾರ ನಿಯಮಗಳಿಗೆ ತಿದ್ದುಪಡಿ ತಂದಿದ್ದು, ಈ ವರ್ಷದ ಅಂತ್ಯದೊಳಗೆ 8 ಲಕ್ಷ ಗ್ರಾಮಠಾಣಾ ಆಸ್ತಿಗಳಿಗೆ ಇ-ಸ್ವತ್ತು ವಿತರಿಸಲಾಗುವುದು ಎಂದು ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಸಚಿವ ಈಶ್ವರ ಖಂಡ್ರೆ ಪ್ರಕಟಿಸಿದ್ದಾರೆ.
ವಿಕಾಸಸೌಧದಲ್ಲಿ ಬುಧವಾರ 'ಭೂ-ಗ್ಯಾರಂಟಿ ಇ-ಸ್ವತ್ತು ಅಭಿಯಾನ'ಕ್ಕೆ ಚಾಲನೆ ನೀಡಿ ಮಾತನಾಡಿದ ಅವರು, ಇದು ಸರ್ಕಾರದ 6ನೇ ಗ್ಯಾರಂಟಿಯಾಗಿದೆ ಎಂದರು.
ರಾಜ್ಯದ ಸುಮಾರು 1.50 ಕೋಟಿ ಗ್ರಾಮೀಣ ಆಸ್ತಿಗಳ ಪೈಕಿ ಬಾಕಿ ಇರುವ 80 ಲಕ್ಷ ವ್ಯಾಜ್ಯರಹಿತ ಆಸ್ತಿಗಳಿಗೆ 2027ರ ಅಂತ್ಯದೊಳಗೆ ಇ-ಸ್ವತ್ತು ನೀಡಲು ಎಲ್ಲಾ 5,927 ಗ್ರಾಮ ಪಂಚಾಯಿತಿಗಳಿಗೆ ಗುರಿ ನಿಗದಿಪಡಿಸಲಾಗಿದೆ.
ದಾಖಲೆ ಇಲ್ಲದವರಿಗೂ ಅವಕಾಶ: ಪ್ರವಾಹ, ಬೆಂಕಿ ಅಥವಾ ಗೆದ್ದಲು ಹಿಡಿದು ಆಸ್ತಿ ದಾಖಲೆಗಳು ನಾಶವಾಗಿದ್ದರೆ, 07.04.2025ರ ಪೂರ್ವದ ವಿದ್ಯುತ್ ಬಿಲ್ ಹಾಗೂ ಸ್ಥಳ ಮಹಜರು ಆಧರಿಸಿ (21 ದಿನಗಳ ಆಕ್ಷೇಪಣೆ ಅವಧಿ ನಂತರ) ಇ-ಸ್ವತ್ತು ನೀಡಲಾಗುವುದು.
ಕಣಮನೆ, ಮನೆದಳಕ್ಕೂ ಅನ್ವಯ: ಮಲೆನಾಡು ಭಾಗದ ಕಣಮನೆ, ಮನೆದಳ ಹಾಗೂ ಕೃಷಿ ಜಮೀನಿನಲ್ಲಿರುವ 4,000 ಚದರಡಿಯವರೆಗಿನ ವಾಸದ/ಕೃಷಿ ಕಟ್ಟಡಗಳಿಗೂ ನಿಯಮಾನುಸಾರ ಇ-ಸ್ವತ್ತು ಸಿಗಲಿದೆ.
ಕಂದಾಯ ಭೂಮಿ ಆಸ್ತಿ: ಮೊದಲ ಹಂತದಲ್ಲಿ ಭೂಪರಿವರ್ತನೆ ಆದ (ಬಿ-ಖರಾಬು ಇಲ್ಲದ) ಆಸ್ತಿಗಳಿಗೆ, ಹಾಗೂ ಮುಂದಿನ ದಿನಗಳಲ್ಲಿ ನಿಯಮ ಮಾರ್ಪಾಡು ಮಾಡಿ ಭೂಪರಿವರ್ತನೆ ಆಗದ ಆಸ್ತಿಗಳಿಗೂ ಇ-ಸ್ವತ್ತು ನೀಡಲು ಕ್ರಮ ವಹಿಸಲಾಗುವುದು.
ತಂತ್ರಜ್ಞಾನ ಮತ್ತು ಸರ್ವೇ: ಸರ್ಕಾರಿ ಜಾಗ ದುರ್ಬಳಕೆ ತಡೆಯಲು 'ಇ-ಸ್ವತ್ತು 3.0' ತಂತ್ರಾಂಶ ಅಭಿವೃದ್ಧಿಪಡಿಸಲಾಗುತ್ತಿದ್ದು, ಇಲಾಖೆಯಲ್ಲೇ ಪ್ರತ್ಯೇಕ ಸರ್ವೇ (ಮೋಜಣಿ) ವಿಭಾಗ ಆರಂಭಿಸಲು ಚಿಂತನೆ ನಡೆದಿದೆ.
ಅಧಿಕಾರಿಗಳು ಪ್ರಾಮಾಣಿಕತೆಯಿಂದ ಕಾರ್ಯನಿರ್ವಹಿಸುವಂತೆ ಸೂಚಿಸಿದ ಸಚಿವರು, ಇ-ಸ್ವತ್ತು ಪಡೆಯುವಲ್ಲಿ ಸಾರ್ವಜನಿಕರಿಗೆ ಯಾವುದೇ ಸಮಸ್ಯೆ ಎದುರಾದರೆ ಸಹಾಯವಾಣಿ: 9483476000 ಸಂಪರ್ಕಿಸಲು ತಿಳಿಸಿದ್ದಾರೆ.




