ಬೇಸಿಗೆಯ ಬಿಸಿಲಿಗೆ 'ಬಡವರ ಫ್ರಿಡ್ಜ್' ಮಣ್ಣಿನ ಮಡಕೆಯೇ ಸಂಜೀವಿನಿ!

ಎಂ.ಎಲ್ ಗಿರಿಧರ, ಮಲ್ಲಪ್ಪನಹಳ್ಳಿ
ಚಂದ್ರವಳ್ಳಿ ನ್ಯೂಸ್, ಹಿರಿಯೂರು:
ಹಿರಿಯೂರು ನಗರದ ರಸ್ತೆ ಬದಿಗಳಲ್ಲಿ ಈಗ ಸಾಲು ಸಾಲು ಮಣ್ಣಿನ ಮಡಕೆಗಳ ದರ್ಶನ. ಸೂರ್ಯನ ತಾಪ ದಿನದಿಂದ ದಿನಕ್ಕೆ ಏರುತ್ತಿದ್ದಂತೆ, ಜನತೆ ತಂಪು ಪಾನೀಯಗಳಿಗಿಂತ ಹೆಚ್ಚಾಗಿ ನೈಸರ್ಗಿಕ ತಂಪು ನೀಡುವ 'ಮಣ್ಣಿನ ಮಡಕೆ'ಗಳತ್ತ ಮುಖ ಮಾಡುತ್ತಿದ್ದಾರೆ.

ಆಧುನಿಕ ಯುಗದಲ್ಲಿ ಫ್ರಿಡ್ಜ್‌ಗಳು ಮನೆಮನ ಬೆಳಗುತ್ತಿದ್ದರೂ, ಮಣ್ಣಿನ ಮಡಕೆಯ ತನ್ನತನ ಮತ್ತು ಆರೋಗ್ಯಕರ ಗುಣಗಳು ಇಂದಿಗೂ ಅಜರಾಮರ.

ಮಾರುಕಟ್ಟೆಯಲ್ಲಿ ಮಡಕೆಗಳ ಅಬ್ಬರ:
ಕುಂಬಾರಿಕೆ ಕಷ್ಟಕರವಾಗುತ್ತಿರುವ ಈ ಕಾಲದಲ್ಲೂ, ಮಡಕೆಗಳು ಹೊಸ ರೂಪ ಪಡೆದು ಗ್ರಾಹಕರನ್ನು ಸೆಳೆಯುತ್ತಿವೆ.

ವೈವಿಧ್ಯಮಯ ವಿನ್ಯಾಸ: ಕೇವಲ ಸಾಂಪ್ರದಾಯಿಕ ಮಡಕೆಗಳಷ್ಟೇ ಅಲ್ಲದೆ, ಈಗ ಬಣ್ಣಬಣ್ಣದ ಚಿತ್ರ ಬಿಡಿಸಿದ, ನಲ್ಲಿ (Tap) ಅಳವಡಿಸಿದ ಆಕರ್ಷಕ ಹೂಜಿಗಳು ಮಾರುಕಟ್ಟೆಗೆ ಲಗ್ಗೆ ಇಟ್ಟಿವೆ.

ದರ ಮತ್ತು ಲಭ್ಯತೆ: 10 ಲೀಟರ್ ಸಾಮರ್ಥ್ಯದ ದಪ್ಪನೆಯ ಕೆಂಪು ಮಣ್ಣಿನ ಮಡಕೆಗಳು ₹400 ರಿಂದ ಆರಂಭವಾಗುತ್ತವೆ. ಇನ್ನು ಸಾಮಾನ್ಯ ತೆಳ್ಳನೆಯ ಮಡಕೆಗಳು ₹150 ರಿಂದ ₹300 ರವರೆಗೆ ಲಭ್ಯವಿದ್ದು, ಜನರ ಶಕ್ತಿಯನುಸಾರವಾಗಿ ಮಾರಾಟವಾಗುತ್ತಿವೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ದರದಲ್ಲಿ ಶೇ. 10ರಷ್ಟು ಏರಿಕೆಯಾಗಿದ್ದರೂ, ಬೇಡಿಕೆಯಲ್ಲಿ ಮಾತ್ರ ಯಾವುದೇ ಇಳಿಮುಖವಾಗಿಲ್ಲ.

ಮಡಕೆ ನೀರು ತಂಪಾಗುವುದು ಹೇಗೆ?:
ಇದು ಪ್ರಕೃತಿಯ ಅದ್ಭುತ ವಿಜ್ಞಾನ. ಮಣ್ಣಿನ ಮಡಕೆಯ ಮೇಲ್ಮೈಯಲ್ಲಿ ಕಣ್ಣಿಗೆ ಕಾಣದ ಸಾವಿರಾರು ಸೂಕ್ಷ್ಮ ರಂಧ್ರಗಳಿರುತ್ತವೆ. ಈ ರಂಧ್ರಗಳ ಮೂಲಕ ನೀರು ಜಿನುಗಿ ಆವಿಯಾದಾಗ, ಮಡಕೆಯೊಳಗಿನ ನೀರಿನ ಶಾಖ ಕಡಿಮೆಯಾಗುತ್ತದೆ. ಈ ನೈಸರ್ಗಿಕ ಆವಿಯಾಗುವಿಕೆ (Evaporation) ಪ್ರಕ್ರಿಯೆಯಿಂದಾಗಿ ನೀರು ಯಾವಾಗಲೂ ಹಿತವಾದ ತಂಪು ಹೊಂದಿರುತ್ತದೆ. 

ಆರೋಗ್ಯದ ದೃಷ್ಟಿಯಿಂದ ಮಡಕೆ ನೀರೇ ಬೆಸ್ಟ್ ಏಕೆ?:
"ಪ್ಲಾಸ್ಟಿಕ್ ಬಾಟಲಿಗಿಂತ ಮಣ್ಣಿನ ಮಡಕೆ ಮೇಲು; ಇದು ಕೇವಲ ನೀರಲ್ಲ, ಆರೋಗ್ಯದ ಮಧುರ ಹಾಲು!".

ನೈಸರ್ಗಿಕ ಶುದ್ಧೀಕರಣ: ಮಣ್ಣಿನ ಪಾತ್ರೆಯು ನೀರಿನಲ್ಲಿರುವ ಕಲ್ಮಶಗಳನ್ನು ಹೀರಿಕೊಂಡು ನೀರಿನ ಗುಣಮಟ್ಟವನ್ನು ಸುಧಾರಿಸುತ್ತದೆ. ಇದು ಸಂಪೂರ್ಣವಾಗಿ ರಾಸಾಯನಿಕ ಮುಕ್ತ.

ಗಂಟಲಿಗೆ ಹಿತಕಾರಿ: ಫ್ರಿಡ್ಜ್ ನೀರು ಕುಡಿದರೆ ತಕ್ಷಣ ಶೀತ ಅಥವಾ ಗಂಟಲು ನೋವು ಕಾಣಿಸಿಕೊಳ್ಳಬಹುದು. ಆದರೆ ಮಡಕೆ ನೀರು ಗಂಟಲನ್ನು ಶುದ್ಧಗೊಳಿಸುವುದಲ್ಲದೆ, ಯಾವುದೇ ಅಡ್ಡಪರಿಣಾಮ ಬೀರದೆ ದೇಹಕ್ಕೆ ತಂಪು ನೀಡುತ್ತದೆ.

ದೇಹದ ವಿಷಹಾರಿ: ಮಡಕೆ ನೀರು ದೇಹದಿಂದ ವಿಷಕಾರಿ ಅಂಶಗಳನ್ನು (Toxins) ಹೊರಹಾಕಲು ಸಹಾಯ ಮಾಡುತ್ತದೆ ಮತ್ತು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ.

ಪೋಷಕಾಂಶಗಳ ಆಗರ: ಮಣ್ಣಿನಲ್ಲಿರುವ ನೈಸರ್ಗಿಕ ಖನಿಜಾಂಶಗಳು ನೀರಿನೊಂದಿಗೆ ಬೆರೆತು ನಮ್ಮ ದೇಹವನ್ನು ಸೇರುತ್ತವೆ. ಇದು ಬಿಸಿಲಿನ ಝಳದಿಂದ ಉಂಟಾಗುವ ತಲೆಸುತ್ತು ಮತ್ತು ಸುಸ್ತನ್ನು ಕಡಿಮೆ ಮಾಡಿ ದೇಹವನ್ನು ಫಿಟ್ ಆಗಿಡುತ್ತದೆ. 

ಕುಂಬಾರರ ಮೊಗದಲ್ಲಿ ಮಂದಹಾಸ:
ಹಿಂದಿನ ಕಾಲದ ವಸ್ತುಗಳು ಮೂಲೆಗುಂಪಾಗುತ್ತಿರುವ ಈ ಕಾಲಘಟ್ಟದಲ್ಲಿ, ಈ ವರ್ಷದ ಬೇಸಿಗೆ ಕುಂಬಾರರಿಗೆ ಸಿಹಿ ಸುದ್ದಿ ತಂದಿದೆ. ಹಿಂದೆಂದಿಗಿಂತಲೂ ಹೆಚ್ಚಿನ ಪ್ರಮಾಣದಲ್ಲಿ ಮಡಕೆಗಳು ಮಾರಾಟವಾಗುತ್ತಿರುವುದು ಈ ಕಲೆಗೆ ಮರುಜೀವ ನೀಡಿದಂತಾಗಿದೆ.

ಪ್ಲಾಸ್ಟಿಕ್ ಹಾಗೂ ವಿದ್ಯುತ್ ಉಪಕರಣಗಳ ಮೊರೆ ಹೋಗುವ ಬದಲು, ನಮ್ಮ ಮಣ್ಣಿನ ಸೊಗಡಿನ ಮಡಕೆ ಬಳಸುವುದು ಆರೋಗ್ಯಕ್ಕೂ ಒಳ್ಳೆಯದು, ಪರಿಸರಕ್ಕೂ ಹಿತ. ಈ ಬೇಸಿಗೆಯಲ್ಲಿ ನೀವು ಒಂದು ಸುಂದರ ಮಡಕೆಯನ್ನು ಮನೆಗೆ ತರುತ್ತೀರಲ್ಲವೇ?.