ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಸಚಿವ ಬಸವರಾಜ ರಾಯರೆಡ್ಡಿ ಅವರ ಇತ್ತೀಚಿನ ಹೇಳಿಕೆ ಹಾಗೂ ಕಾಂಗ್ರೆಸ್ ಪಕ್ಷದ ನಿಲುವನ್ನು ಕಟುವಾಗಿ ಟೀಕಿಸಿರುವ ಬಿಜೆಪಿ ನಾಯಕ ಸಿ.ಟಿ. ರವಿ, ಕಾಂಗ್ರೆಸ್ ನಾಯಕರು ತಮ್ಮ ಹಿಂದೂ ವಿರೋಧಿ ಮನಸ್ಥಿತಿಗೆ ಪದೇ ಪದೇ ಪುರಾವೆ ಒದಗಿಸುತ್ತಿದ್ದಾರೆ ಎಂದು ವಾಗ್ದಾಳಿ ನಡೆಸಿದ್ದಾರೆ.
ಸರ್ಟಿಫಿಕೇಶನ್ ಸಮಿತಿ ಇದೆಯೇ?: "ಇಸ್ಲಾಂ ಧರ್ಮ ಶ್ರೇಷ್ಠ ಎನ್ನಲು ಸರ್ಟಿಫಿಕೇಶನ್ ಸಮಿತಿ ಇದೆಯೇ, ನೀವು ಅದರ ಮುಖ್ಯಸ್ಥರೇ?" ಎಂದು ರಾಯರೆಡ್ಡಿ ಅವರನ್ನು ಪ್ರಶ್ನಿಸಿದ ಸಿ.ಟಿ. ರವಿ, ಜಗತ್ತಿಗೆ ಶ್ರೇಷ್ಠ ದರ್ಶನಗಳನ್ನು ನೀಡಿದ ಸನಾತನ ಹಿಂದೂ ಧರ್ಮವನ್ನು ತುಚ್ಛೀಕರಿಸುವುದು ಅವರ ಆಲೋಚನಾ ದೋಷವೇ ಹೊರತು ಧರ್ಮದ್ದಲ್ಲ ಎಂದು ಕಿಡಿಕಾರಿದ್ದಾರೆ.
'ಇಲೆಕ್ಷನ್ ಹಿಂದು' ಟೀಕೆ: ಸಿಎಂ ಡಿ.ಕೆ. ಶಿವಕುಮಾರ್ ಅವರು ಶ್ರದ್ಧಾವಂತ ಹಿಂದುವಿನಂತೆ ಶ್ಲೋಕ ಹೇಳುತ್ತಾರೆ, ಆದರೆ ತಮ್ಮ ಸಂಪುಟದ ಸಹೋದ್ಯೋಗಿಯೇ ಹಿಂದೂ ಧರ್ಮ ಹಾಗೂ ದೇವಾಲಯಗಳ ಕುರಿತು ಋಣಾತ್ಮಕವಾಗಿ ಮಾತನಾಡುವಾಗ ಮೌನ ವಹಿಸಿರುವುದು ಅವರು 'ಇಲೆಕ್ಷನ್ ಹಿಂದು'ವೇ ಎಂಬ ಸಂಶಯ ಹುಟ್ಟಿಸುತ್ತದೆ ಎಂದಿದ್ದಾರೆ.
ಧರ್ಮ ಸ್ವೀಕಾರಕ್ಕೆ ಸಿ.ಟಿ. ರವಿ ತಿರುಗೇಟು: ಬಸವರಾಜ ರಾಯರೆಡ್ಡಿಯವರಿಗೆ ಇಸ್ಲಾಂ ಅಷ್ಟೊಂದು ಶ್ರೇಷ್ಠ ಎನಿಸಿದರೆ ಅವರು ಸುನ್ನತ್ ಮಾಡಿಕೊಂಡು ಇಸ್ಲಾಂ ಸ್ವೀಕರಿಸಲು ಯಾರ ಅಡ್ಡಿಯೂ ಇಲ್ಲ, ಆದರೆ ಕೋಟ್ಯಂತರ ಶ್ರದ್ಧಾವಂತ ಹಿಂದೂಗಳ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತರುವುದನ್ನು ನಿಲ್ಲಿಸಬೇಕು ಎಂದು ಆಗ್ರಹಿಸಿದ್ದಾರೆ.
ಕಾಂಗ್ರೆಸ್ನ ಈ ತುಷ್ಟೀಕರಣದ ರಾಜಕಾರಣ ಮತ್ತು ನಾಟಕವನ್ನು ರಾಜ್ಯದ ಜನತೆ ಗಮನಿಸುತ್ತಿದ್ದು, ಮುಂದಿನ ದಿನಗಳಲ್ಲಿ ತಕ್ಕ ಉತ್ತರ ನೀಡಲಿದ್ದಾರೆ ಎಂದು ಅವರು ಎಚ್ಚರಿಸಿದ್ದಾರೆ.
