ಚಂದ್ರವಳ್ಳಿ ನ್ಯೂಸ್, ನವದೆಹಲಿ:
ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ 'ಆತ್ಮನಿರ್ಭರ ಭಾರತ'ದ ಕನಸನ್ನು ಸಾಕಾರಗೊಳಿಸುವ ನಿಟ್ಟಿನಲ್ಲಿ ಆಟೋಮೊಬೈಲ್ ಮತ್ತು ಆಟೋ ಬಿಡಿಭಾಗಗಳ ಉದ್ದಿಮೆಗಾಗಿ ಜಾರಿಗೆ ತಂದಿರುವ 'ಉತ್ಪಾದನಾ ಆಧಾರಿತ ಪ್ರೋತ್ಸಾಹಕ' (PLI) ಯೋಜನೆ ಅಭೂತಪೂರ್ವ ಯಶಸ್ಸು ಸಾಧಿಸುತ್ತಿದೆ ಎಂದು ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ತಿಳಿಸಿದ್ದಾರೆ.
ಈ ಕುರಿತು ಮಾಹಿತಿ ನೀಡಿರುವ ಅವರು, ದೇಶದ ವಾಹನ ಉತ್ಪಾದನಾ ವಲಯದಲ್ಲಿ ಹೂಡಿಕೆ, ಸುಧಾರಿತ ತಯಾರಿಕೆ ಮತ್ತು ಉದ್ಯೋಗ ಸೃಷ್ಟಿಗೆ ಈ ಯೋಜನೆ ವೇಗವರ್ಧಕವಾಗಿ ಕೆಲಸ ಮಾಡುತ್ತಿದೆ ಎಂದು ಹೇಳಿದ್ದಾರೆ.
ಭಾರಿ ಹೂಡಿಕೆ: ಡಿಸೆಂಬರ್ 31, 2025ರ ಅಂತ್ಯದ ವೇಳೆಗೆ, ಈ ಯೋಜನೆಯಡಿ ಒಟ್ಟು 39,081 ಕೋಟಿ ಹೂಡಿಕೆಯಾಗಿದೆ. ಇದು ಭಾರತದ ಉತ್ಪಾದನಾ ವ್ಯವಸ್ಥೆಯ ಮೇಲೆ ಉದ್ಯಮ ವಲಯಕ್ಕಿರುವ ನಂಬಿಕೆಯನ್ನು ಪ್ರತಿಬಿಂಬಿಸುತ್ತದೆ.
ಹೆಚ್ಚುವರಿ ಮಾರಾಟ: ಈ ಅವಧಿಯಲ್ಲಿ ಯೋಜನೆಯಡಿ ಒಟ್ಟು 41,121 ಕೋಟಿ ಮೌಲ್ಯದ ಹೆಚ್ಚಿನ ಮಾರಾಟ (Incremental Sales) ದಾಖಲಾಗಿದೆ. ಇದು ಮಾರುಕಟ್ಟೆಯ ವಿಸ್ತರಣೆ ಮತ್ತು ದೇಶೀಯ ಮೌಲ್ಯವರ್ಧನೆಗೆ ಸಾಕ್ಷಿಯಾಗಿದೆ.
ಉದ್ಯೋಗ ಸೃಷ್ಟಿ: ಯೋಜನೆಯ ಫಲವಾಗಿ ಡಿಸೆಂಬರ್ 2025ರ ವೇಳೆಗೆ ಒಟ್ಟು 61,241 ಉದ್ಯೋಗಗಳು ಸೃಷ್ಟಿಯಾಗಿದ್ದು, ಕೌಶಲ್ಯಾಭಿವೃದ್ಧಿ ಮತ್ತು ಉದ್ಯೋಗಾವಕಾಶ ನೀಡಿಕೆಯಲ್ಲಿ ದೊಡ್ಡ ಮೈಲಿಗಲ್ಲು ಸ್ಥಾಪಿಸಿದೆ.
ಪ್ರೋತ್ಸಾಹಧನ ವಿತರಣೆ: ಮಾರ್ಚ್ 31, 2026ರವರೆಗೆ ಯೋಜನೆಯಡಿ ಒಟ್ಟು 2,386.36 ಕೋಟಿ ಪ್ರೋತ್ಸಾಹಧನವನ್ನು ವಿತರಿಸಲಾಗಿದ್ದು, ಇದು ವಲಯದ ಸ್ಪರ್ಧಾತ್ಮಕತೆ ಮತ್ತು ನಾವೀನ್ಯತೆಗೆ ಬೆಂಬಲ ನೀಡಿದೆ.
ಸ್ವದೇಶಿ ತಯಾರಿಕೆಗೆ ಒತ್ತು (Indigenization):
'ಆತ್ಮನಿರ್ಭರ ಭಾರತ' ಅಭಿಯಾನದಡಿ ಸ್ವದೇಶಿ ತಯಾರಿಕೆಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿದ್ದು, ಈವರೆಗೆ 18 ಅರ್ಜಿದಾರರು ಶೇ. 50ಕ್ಕಿಂತ ಹೆಚ್ಚು 'ದೇಶೀಯ ಮೌಲ್ಯವರ್ಧನೆ' (DVA) ಪ್ರಮಾಣಪತ್ರವನ್ನು ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.
"ಪಿಎಲ್ಐ ಆಟೋ ಯೋಜನೆಯು ಭಾರತವನ್ನು ಜಾಗತಿಕ ವಾಹನ ಉತ್ಪಾದನಾ ಕೇಂದ್ರವನ್ನಾಗಿ ಮಾಡುವ ಹಾದಿಯಲ್ಲಿ ಮಹತ್ವದ ಪಾತ್ರ ವಹಿಸುತ್ತಿದೆ. ಇದು ವಿಕಸಿತ ಭಾರತದ ಗುರಿಯನ್ನು ತಲುಪಲು ಪೂರಕವಾಗಿದೆ," ಎಂದು ಹೆಚ್.ಡಿ. ಕುಮಾರಸ್ವಾಮಿ ಆಶಯ ವ್ಯಕ್ತಪಡಿಸಿದ್ದಾರೆ.
