ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಇಂದು ದೀಪಾವಳಿ. ಒಂದು ದೊಡ್ಡ ಸಂಭ್ರಮ. ಜೇಬಲ್ಲಿ ಇರಲಿ, ಇಲ್ಲದಿರಲಿ ಎಲ್ಲರಿಗೂ ಹಬ್ಬ. ಸೊರಗಿರುವ ರೈತರು, ಕೂಲಿಗಳು, ಎಲ್ಲಾ ಜಾತಿಯ ಬಡವರು ಖರ್ಚು ಮಾಡಲೇ ಬೇಕಾದ ಹಬ್ಬ. ಹೇಗೋ ಹೊಂದಿಸಿಕೊಂಡು ಹೊಸ ಬಟ್ಟೆ ತರಬೇಕು. ಕಜ್ಜಾಯ ಮಾಡಬೇಕು. ಪಟಾಕಿ ಸಿಡಿಸಬೇಕು. ಇದು ಶತಮಾನಗಳ ಕಷ್ಟ ಮತ್ತು ಸಂಭ್ರಮ.
ಈ ಹಬ್ಬಕ್ಕೆ ಇನ್ನೊಂದು ಮುಖವೂ ಇದೆ. ಜಾತಿಯ ಅಹಮಿಕೆ ಮತ್ತು ಅಸ್ಪೃಶ್ಯರನ್ನು ಅವಮಾನಿಸುವ ಮುಖ. ನಾನಂತು ನಾಲ್ಕೈದು ದಶಕಗಳಿಂದ ಗಮನಿಸಿಯೇ ಹೇಳುತ್ತಿರುವ ಮಾತು. ಬಹುತೇಕ ಹಳ್ಳಿಗಳ ದೇವಾಲಯದಲ್ಲಿ ಈ ಹಬ್ಬದ ಪ್ರಯುಕ್ತ ನೋಮು ಪೂಜೆ ನಡೆಸಿ ಶಿವ ಪಾರ್ವತಿಯ ಕೇದಾರೇಶ್ವರ ಕಥೆ ಕೇಳಿಸುವುದು ಸಂಪ್ರದಾಯ. ಈ ಸಂದರ್ಭದಲ್ಲಿ ಜಾತಿಯ ಅಹಮಿಕೆ ಮತ್ತು ಅಸ್ಪೃಶ್ಯತೆ ಆಚರಣೆ ಎರಡನ್ನೂ ಒಟ್ಟಿಗೆ ಕಾಣಬಹುದು.
ಮೇಲ್ಜಾತಿಗಳು ಶಿಕ್ಷಣದಿಂದ ಹೆಚ್ಚು ಕಲಿತಿಲ್ಲ ಅನ್ನುವುದಕ್ಕೆ ಸಾಕ್ಷಿ ಏನೆಂದರೆ ಈ ಹಬ್ಬದಲ್ಲಿ ಪ್ರದರ್ಶನಗೊಳ್ಳುವ ಅಸ್ಪೃಶ್ಯತೆ. ಹಳ್ಳಿಯ ದೇವಾಲಯದಲ್ಲಿ ಮೇಲ್ಜಾತಿ ಸ್ಪೃಶ್ಯರು ಗುಡಿಯ ಒಳಗೆ ಮತ್ತು ತಳಸಮುದಾಯ ಅಸ್ಪೃಶ್ಯರು ಹೊರಗೆ ಕೂರುತ್ತಾರೆ. ಪ್ರತಿ ಹಳ್ಳಿಯಲ್ಲೂ ವಿದ್ಯಾವಂತರು ಇದ್ದಾರೆ. ಏನು ಪ್ರಯೋಜನ?ಪ್ರಶ್ನಿಸುವ ಧೈರ್ಯ ಬಂದಿಲ್ಲವಲ್ಲ.
ನಾವು, ಅರಿವು ಭಾರತ ತಂಡದವರು ದೇವಾಲಯಗಳಲ್ಲಿ ನಡೆಯುವ ಈ ಅಮಾನವೀಯ, ಮೂಢ, ಅಸ್ಪೃಶ್ಯ ಸಂಪ್ರದಾಯವನ್ನು ತಿದ್ದಲು ಪ್ರಯತ್ನಿಸುತ್ತಿದ್ದೇವೆ. ಪ್ರತಿ ಮುಜರಾಯಿ ದೇವಾಲಯ ಮುಂದೆ ಎಲ್ಲರಿಗೂ ಪ್ರವೇಶವಿದೆ ಎಂಬ ಬೋರ್ಡ್ ಹಾಕಿಸಿದ್ದೇವೆ. ಇದರಿಂದ ಅಲ್ಲಲ್ಲಿ ಸಣ್ಣ ಬದಲಾವಣೆಗಳು ಬಂದಿವೆ. ಆದರೆ ಅದು ಸಾಲದು. ಎಲ್ಲ ಗುಡಿಗಳಲ್ಲಿ ಸಂಪೂರ್ಣವಾಗಿ ಬದಲಾವಣೆ ಬರಬೇಕು.
ಈ ದಿನ ಹಬ್ಬ ನಡೆಯುತ್ತಿದೆ. ಇಂದೇ ತಮ್ಮ ಹಳ್ಳಿಗಳಲ್ಲಿ ಕಾಣುವ ಅಸ್ಪೃಶ್ಯತೆಯನ್ನು ಪ್ರಶ್ನಿಸಿ. ಒಳಗೆ- ಹೊರಗೆ ವ್ಯತ್ಯಾಸ ಇದ್ದರೆ ಫೋಟೋ ತೆಗೆದು ನಮಗೆ ಕಳುಹಿಸಿ. ಜಿಲ್ಲಾಡಳಿತ ಮತ್ತು ಪ್ರಜ್ಞಾವಂತ ಜನರನ್ನು ಕೂಡಿಸಿ ಪ್ರೀತಿಯಿಂದಲೇ ಬದಲಾವಣೆಗೆ ಪ್ರಯತ್ನಿಸುತ್ತೇವೆ. ಫೋಟೋ ಜೋತಿಗೆ ವಿಳಾಸ ಮತ್ತು ನಿಮ್ಮ ಮೊಬೈಲ್ ನಂಬರ್ ಕೊಡಿ. ಸಂಪರ್ಕಕ್ಕೆ: 93806 93353 / 7760415263
ವರದಿ:ಡಾ.ಶಿವಪ್ಪ ಅರಿವು.
