ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಕಾಂಗ್ರೆಸ್ ಸರ್ಕಾರವು ನಾಚಿಕೆ, ಮಾನ-ಮರ್ಯಾದೆಗಳನ್ನು ಬದಿಗಿಟ್ಟು ನೇರವಾಗಿ ಸಾರ್ವಜನಿಕರಿಂದಲೇ ಲಂಚ ಕೇಳುವ ಮಟ್ಟಕ್ಕೆ ಇಳಿದಿದೆ ಎಂದು ವಿರೋಧ ಪಕ್ಷದ ನಾಯಕ ಆರ್. ಅಶೋಕ್ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಈ ಕುರಿತು ಆರ್. ಅಶೋಕ್ ಅವರು ವ್ಯಕ್ತಪಡಿಸಿದ ಪ್ರಮುಖ ಆರೋಪಗಳು:ಸಚಿವರ ಬಹಿರಂಗ ಲಂಚದ ಹೇಳಿಕೆ: ಜನರ ಅಹವಾಲು ಆಲಿಸಲು ಸರ್ಕಾರ ಆರಂಭಿಸಿರುವ ಪ್ರಜಾಸೇವೆ ಆಂದೋಲನ ಸಭೆಯಲ್ಲೇ, ಅಬಕಾರಿ ಸಚಿವರು "ಅಧಿಕಾರಿಗಳಿಗೆ ಗೌರವಯುತವಾಗಿ ಕೊಡುವುದು ನಿಮ್ಮ ಧರ್ಮ" ಎಂದು ಹೇಳುವ ಮೂಲಕ ಲಂಚ ಪಡೆಯುವುದನ್ನೇ ಸರ್ಕಾರದ ಅಧಿಕೃತ ಧರ್ಮ ಎಂದು ವ್ಯಾಖ್ಯಾನಿಸಿದ್ದಾರೆ.
ಮುಖ್ಯಮಂತ್ರಿಗಳ ನಾಟಕೀಯ ನಡೆ: 'ಲಂಚ ಕೇಳಿದರೆ ನನಗೆ ಕರೆ ಮಾಡಿ, ಭ್ರಷ್ಟರನ್ನು ಬಡಿದು ಹಾಕುತ್ತೇನೆ' ಎಂದು ನಾಟಕೀಯವಾಗಿ ಮಾತನಾಡುವ ಮುಖ್ಯಮಂತ್ರಿಗಳು, ತಮ್ಮದೇ ಸಂಪುಟದ ಸಚಿವರು ಬಹಿರಂಗವಾಗಿ ಲಂಚಕ್ಕೆ ಪ್ರೋತ್ಸಾಹ ನೀಡುತ್ತಿದ್ದರೂ ಮೌನಕ್ಕೆ ಶರಣಾಗಿದ್ದಾರೆ.
ಅಬಕಾರಿ ಇಲಾಖೆಯ ಭ್ರಷ್ಟಾಚಾರ: ಅಬಕಾರಿ ಇಲಾಖೆಯಲ್ಲಿ ಈ ಹಿಂದಿನ ಸಚಿವರ ಅವಧಿಯಲ್ಲೇ ಕೋಟ್ಯಂತರ ರೂಪಾಯಿ ಭ್ರಷ್ಟಾಚಾರ ನಡೆದಿದ್ದು, ಅದನ್ನು ಹಾಲಿ ಸಚಿವರೂ ಮುಂದುವರಿಸುತ್ತಿದ್ದಾರೆ.
'ಗೌರವದ ಲಂಚ ಶುಲ್ಕ' ಜಾರಿ ಭೀತಿ: ಜನರ ಕಷ್ಟ ಆಲಿಸಬೇಕಾದ ವೇದಿಕೆಯಲ್ಲೇ ಲಂಚವನ್ನು ಅಧಿಕೃತಗೊಳಿಸುವ ಯತ್ನ ನಡೆದಿದ್ದು, ಮುಂದಿನ ದಿನಗಳಲ್ಲಿ 'ಗೌರವದ ಲಂಚ ಶುಲ್ಕ' ಎಂಬ ಹೆಸರಿನಲ್ಲೇ ಹೊಸ ಆದೇಶ ಹೊರಡಿಸಿದರೂ ಅಚ್ಚರಿಯಿಲ್ಲ.
ಹೈಕಮಾಂಡ್ಗೆ ಎಟಿಎಂ: ಕಾಂಗ್ರೆಸ್ ಹೈಕಮಾಂಡ್ಕೈಗೊಂಬೆಯಾಗಿರುವ ಈ ಸರ್ಕಾರ ಕರ್ನಾಟಕವನ್ನು ಎಟಿಎಂ ಮಾಡಿಕೊಂಡಿದೆ. ಈ ನಾಚಿಕೆಗೆಟ್ಟ ಸರ್ಕಾರ ತೊಲಗುವವರೆಗೂ ರಾಜ್ಯದ ಜನತೆಗೆ ನೆಮ್ಮದಿ ಇಲ್ಲ.
ಅಧಿಕಾರಿಗಳ ಲಂಚಕೋರತನಕ್ಕೆ ಬಹಿರಂಗವಾಗಿ ಬೆಂಬಲ ನೀಡುತ್ತಿರುವ ಕಾಂಗ್ರೆಸ್ ಸರ್ಕಾರದ ನಡೆಗೆ ಜನತೆ ತಕ್ಕ ಪಾಠ ಕಲಿಸಲಿದ್ದಾರೆ ಎಂದು ಅವರು ಎಚ್ಚರಿಸಿದ್ದಾರೆ.
