ಚಂದ್ರವಳ್ಳಿ ನ್ಯೂಸ್, ಮೈಸೂರು (ಟಿ. ನರಸೀಪುರ):
ಕಳೆದ ಆರು ವರ್ಷಗಳಲ್ಲಿ 22 ಸಾವಿರಕ್ಕೂ ಹೆಚ್ಚು ಜಟಿಲ ಪ್ರಕರಣಗಳನ್ನು ಇತ್ಯರ್ಥಪಡಿಸಿ ಹೊಸ ಇತಿಹಾಸ ನಿರ್ಮಿಸಿರುವ ಕರ್ನಾಟಕ ಹೈಕೋರ್ಟ್ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರ ಅಪೂರ್ವ ಸಾಧನೆಯನ್ನು ಗೌರವಿಸಿ, ಮೈಸೂರು ಜಿಲ್ಲೆಯ ಟಿ. ನರಸೀಪುರದಲ್ಲಿ ರಾಜ್ಯ ರೈತ ಸಂಘದ ವತಿಯಿಂದ ಶನಿವಾರ ಅವರ ಪೋಸ್ಟರ್ಗೆ ಕ್ಷೀರಾಭಿಷೇಕ ಮಾಡಿ ಸಂಭ್ರಮಿಸಲಾಯಿತು.
ರೈತ ನಾಯಕರು ನ್ಯಾ. ನಾಗಪ್ರಸನ್ನ ಅವರ ಭಾವಚಿತ್ರಕ್ಕೆ ಹೂವಿನ ಹಾರ ಹಾಕಿ, ಹಾಲು ಮತ್ತು ಜೇನಿನಿಂದ ಅಭಿಷೇಕ ಮಾಡಿದ್ದಲ್ಲದೆ, ದೃಷ್ಟಿ ತೆಗೆದು ಅವರ ಪರವಾಗಿ ಜಯಘೋಷಗಳನ್ನು ಕೂಗಿ ಅಭಿನಂದಿಸಿದರು.
ಬಡವರ ಪಾಲಿನ ಆಶಾಕಿರಣ – ಕಳ್ಳೀಪುರ ಮಹದೇವಸ್ವಾಮಿ:
ಕಾರ್ಯಕ್ರಮದಲ್ಲಿ ಮಾತನಾಡಿದ ಹಸಿರು ಸೇನೆ ಹಾಗೂ ರಾಜ್ಯ ರೈತ ಸಂಘದ ಮೈಸೂರು ಗೌರವಾಧ್ಯಕ್ಷ ಕಳ್ಳೀಪುರ ಮಹದೇವಸ್ವಾಮಿ, "ನ್ಯಾ. ನಾಗಪ್ರಸನ್ನ ಅವರ ತೀರ್ಪುಗಳು ಯಾವಾಗಲೂ ಬಡವರ ಪರ ಹಾಗೂ ಭ್ರಷ್ಟರ ವಿರುದ್ಧವಾಗಿರುತ್ತವೆ. ಸಾಮಾನ್ಯ ಜನರಿಗೆ ನ್ಯಾಯ ಸಿಗುವುದು ಕಷ್ಟವಾಗಿರುವ ಈ ದಿನಗಳಲ್ಲಿ ಅವರು ಸಾರ್ವಜನಿಕರ ಪಾಲಿನ ನಿಜವಾದ ಆಶಾಕಿರಣವಾಗಿದ್ದಾರೆ. ರಾಜಕಾರಣಿಗಳು ಹಾಗೂ ಸರ್ಕಾರಿ ಇಲಾಖೆಗಳಲ್ಲಿ ನಡೆಯುವ ಲೂಟಿಗೆ ತಮ್ಮ ತೀರ್ಪುಗಳ ಮೂಲಕ ಬ್ರೇಕ್ ಹಾಕಿದ್ದಾರೆ" ಎಂದು ಶ್ಲಾಘಿಸಿದರು. ಅಲ್ಲದೆ, ನಾಗಪ್ರಸನ್ನ ಅವರು ಭವಿಷ್ಯದಲ್ಲಿ ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿಗಳಾಗಿ ದೇಶದ ನ್ಯಾಯ ವ್ಯವಸ್ಥೆಯನ್ನು ಎತ್ತಿಹಿಡಿಯಲಿ ಎಂದು ಹಾರೈಸಿದರು.
ಒಂದೇ ದಿನ 550 ಪ್ರಕರಣಗಳ ವಿಚಾರಣೆ – ನೂತನ ದಾಖಲೆ:
ಹೈಕೋರ್ಟ್ನಲ್ಲಿ ಕ್ರಿಮಿನಲ್ಪ್ರಕರಣಗಳ ವಿಚಾರಣೆ ನಡೆಸುತ್ತಿರುವ ನ್ಯಾ. ಎಂ.ನಾಗಪ್ರಸನ್ನ ಅವರು ಇತ್ತೀಚೆಗೆ (ಸೆ. 2 ರಂದು) ಒಂದೇ ದಿನ 550 ಕೇಸುಗಳ ವಿಚಾರಣೆ ನಡೆಸುವ ಮೂಲಕ ದೇಶದ ನ್ಯಾಯಾಂಗ ವ್ಯವಸ್ಥೆಯಲ್ಲಿ ನೂತನ ಇತಿಹಾಸ ಬರೆದಿದ್ದಾರೆ. ಅಂದು ಬೆಳಿಗ್ಗೆಯಿಂದ ರಾತ್ರಿ 8 ಗಂಟೆಯವರೆಗೆ ನಿರಂತರ ಕಲಾಪ ನಡೆಸಿದ್ದ ಅವರು, ಮಧ್ಯಾಹ್ನದ ನಂತರವಷ್ಟೇ 270ಕ್ಕೂ ಅಧಿಕ ಪ್ರಕರಣಗಳ ಮೆಮೋ ವಿಚಾರಣೆ ನಡೆಸಿ, 3 ಮುಖ್ಯ ಪ್ರಕರಣಗಳ ತೀರ್ಪು ಪ್ರಕಟಿಸಿದ್ದರು. ಜೊತೆಗೆ, ಪಟ್ಟಿಯಲ್ಲಿದ್ದ ಉಳಿದ 300ಕ್ಕೂ ಹೆಚ್ಚು ಪ್ರಕರಣಗಳನ್ನು ವಿಚಾರಣೆ ನಡೆಸಿ, ಹಲವು ಪ್ರಕರಣಗಳಲ್ಲಿ ಮಧ್ಯಂತರ ಆದೇಶ ಹಾಗೂ ನೋಟಿಸ್ ಜಾರಿಗೊಳಿಸಿದ್ದರು.
ದಿನವೊಂದರಲ್ಲಿ ಸತತ 10 ಗಂಟೆಗಳ ಕಾಲ ಸುದೀರ್ಘ ಕಲಾಪ ನಡೆಸಿ ಇಷ್ಟೊಂದು ದೊಡ್ಡ ಸಂಖ್ಯೆಯ ಪ್ರಕರಣಗಳನ್ನು ನಿರ್ವಹಿಸಿದ ಅವರ ಕಾರ್ಯವೈಖರಿಯನ್ನು ಹಿರಿಯ-ಕಿರಿಯ ವಕೀಲ ವೃಂದ ಹಾಗೂ ದೇಶದ ನ್ಯಾಯಾಂಗ ಕ್ಷೇತ್ರ ಮುಕ್ತಕಂಠದಿಂದ ಶ್ಲಾಘಿಸಿದೆ.
2019 ರಲ್ಲಿ ವಕೀಲ ವೃಂದದಿಂದ ನೇರವಾಗಿ ಹೈಕೋರ್ಟ್ ನ್ಯಾಯಮೂರ್ತಿಯಾಗಿ ನೇಮಕಗೊಂಡ ಎಂ. ನಾಗಪ್ರಸನ್ನ ಅವರು, ಅಂದಿನಿಂದಲೂ ಅತ್ಯಂತ ವೇಗವಾಗಿ ಪ್ರಕರಣಗಳನ್ನು ವಿಲೇವಾರಿ ಮಾಡುವ ಮೂಲಕ ನೂತನ ದಾಖಲೆಗಳನ್ನು ಬರೆಯುತ್ತಾ ಸಾಗಿದ್ದಾರೆ.
