ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಕರ್ನಾಟಕ ಮತ್ತು ಸ್ವಿಟ್ಜರ್‌ಲ್ಯಾಂಡ್ ನಡುವಿನ ವ್ಯಾಪಾರ, ಹೂಡಿಕೆ ಹಾಗೂ ಪ್ರವಾಸೋದ್ಯಮ ಬಾಂಧವ್ಯವನ್ನು ಮತ್ತಷ್ಟು ಬಲಪಡಿಸುವ ನಿಟ್ಟಿನಲ್ಲಿ ಸ್ಮಿಸ್ ಇಂಟರ್ನ್ಯಾಷನಲ್ ಏರ್ ಲೈನ್ಸ್ ಜ್ಯೂರಿಚ್ ಹಾಗೂ ಬೆಂಗಳೂರು ನಡುವೆ ಪ್ರಥಮ ನೇರ ವಿಮಾನ ಸೇವೆಯನ್ನು ಕಲ್ಪಿಸಿದೆ.
ಈ ಐತಿಹಾಸಿಕ ಸಂದರ್ಭವನ್ನು ಗುರುತಿಸಲು ಆಯೋಜಿಸಲಾಗಿದ್ದ ಮಧ್ಯಾಹ್ನದ ಭೋಜನಕೂಟದಲ್ಲಿ ಬೃಹತ್ ಮತ್ತು ಮಧ್ಯಮ ಕೈಗಾರಿಕಾ ಸಚಿವ ಎಂ. ಬಿ. ಪಾಟೀಲ್ ಅವರು ಭಾರತ ಮತ್ತು ಭೂತಾನ್ ದೇಶಗಳಿಗಾಗಿರುವ ಸ್ವಿಟ್ಜರ್‌ಲ್ಯಾಂಡ್ ರಾಯಭಾರಿ ಹೆಚ್.ಇ. ಮಾಯಾ ತಿಸ್ಸಾಫಿ ಅವರೊಂದಿಗೆ ಭಾಗವಹಿಸಿ ಚರ್ಚಿಸಿದರು.
ಜಾಗತಿಕ ಸಂಪರ್ಕ ಹೆಚ್ಚಳ: ಜ್ಯೂರಿಚ್ ಮತ್ತು ಬೆಂಗಳೂರು ನಡುವಿನ ಈ ಹೊಸ ನೇರ ವಿಮಾನ ಸಂಪರ್ಕವು ಕರ್ನಾಟಕದ ಜಾಗತಿಕ ಸಂಪರ್ಕವನ್ನು ಮತ್ತಷ್ಟು ವಿಸ್ತರಿಸಲಿದ್ದು, ವ್ಯಾಪಾರ, ಹೂಡಿಕೆ, ಪ್ರವಾಸೋದ್ಯಮ ಹಾಗೂ ತಂತ್ರಜ್ಞಾನ ವಲಯಗಳ ಸಹಯೋಗಕ್ಕೆ ಹೊಸ ಬಾಗಿಲುಗಳನ್ನು ತೆರೆಯಲಿದೆ.
ಸುಧಾರಿತ ವಲಯಗಳಲ್ಲಿ ಹೂಡಿಕೆಗೆ ಆಹ್ವಾನ: ಹೈ-ಪ್ರಿಸಿಷನ್ ಮಷಿನ್ ಟೂಲ್ಸ್ (ಉನ್ನತ ನಿಖರತೆಯ ಯಂತ್ರೋಪಕರಣಗಳು), ಕೃತಕ ಬುದ್ಧಿಮತ್ತೆ ಹಾಗೂ ಇತರ ಅತ್ಯಾಧುನಿಕ ತಂತ್ರಜ್ಞಾನ ವಲಯಗಳಲ್ಲಿ ಕರ್ನಾಟಕ ಹೊಂದಿರುವ ಅಗಾಧ ಅವಕಾಶಗಳನ್ನು ಸಚಿವರು ರಾಯಭಾರಿಯವರ ಮುಂದೆ ಪ್ರಸ್ತಾಪಿಸಿದರು.
ಕ್ವಿನ್ ಸಿಟಿ ಯೋಜನೆ ಪ್ರದರ್ಶನ: ರಾಜ್ಯದ ಪ್ರತಿಷ್ಠಿತ 'ಕ್ವಿನ್ ಸಿಟಿ' ಯೋಜನೆಯ ದೃಷ್ಟಿಕೋನವನ್ನು ಹಂಚಿಕೊಂಡ ಸಚಿವರು, 2027ರ ಜಾಗತಿಕ ಹೂಡಿಕೆದಾರರ ಸಮಾವೇಶಕ್ಕೆ ಭಾಗವಹಿಸುವಂತೆ ಸ್ವಿಟ್ಜರ್‌ಲ್ಯಾಂಡ್ ಸಂಸ್ಥೆಗಳಿಗೆ ಅಧಿಕೃತ ಆಹ್ವಾನ ನೀಡಿದರು.
ಕರ್ನಾಟಕ ಮತ್ತು ಸ್ವಿಟ್ಜರ್‌ಲ್ಯಾಂಡ್ ನಡುವಿನ ಸುದೀರ್ಘ ಸಂಬಂಧವನ್ನು ಇನ್ನಷ್ಟು ಗಟ್ಟಿಗೊಳಿಸಿ, ಈ ಸಹಭಾಗಿತ್ವವನ್ನು ರಾಜ್ಯಕ್ಕೆ ಬರುವ ಗುಣಮಟ್ಟದ ಹೂಡಿಕೆಗಳು ಹಾಗೂ ಉನ್ನತ ಮಟ್ಟದ ಉದ್ಯೋಗಾವಕಾಶಗಳಾಗಿ ಪರಿವರ್ತಿಸುವ ಭರವಸೆಯನ್ನು ಸಚಿವರು ಈ ಸಂದರ್ಭದಲ್ಲಿ ವ್ಯಕ್ತಪಡಿಸಿದರು.
