ಚಂದ್ರವಳ್ಳಿ ನ್ಯೂಸ್, ಹಿರಿಯೂರು:
ರಾಜ್ಯ ಸರ್ಕಾರ ರಾಸಾಯನಿಕ ಗೊಬ್ಬರ ಖರೀದಿಗೆ ಆನ್ಲೈನ್ ವ್ಯವಸ್ಥೆಯನ್ನು ಕಡ್ಡಾಯಗೊಳಿಸಿ ಹೊರಡಿಸಿರುವ ಆದೇಶ ಸಂಪೂರ್ಣ ಅವೈಜ್ಞಾನಿಕವಾಗಿದ್ದು, ಇದರಿಂದ ರೈತರು ಗೊಬ್ಬರ ಸಿಗದೆ ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಈ ಕೂಡಲೇ ಸರ್ಕಾರ ಈ ಆದೇಶವನ್ನು ಹಿಂಪಡೆದು, ಹಳೆಯ ಪದ್ಧತಿಯಂತೆ ಸುಲಭವಾಗಿ ಗೊಬ್ಬರ ಸಿಗುವಂತೆ ಮಾಡಬೇಕು ಎಂದು ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆಯ ಹಿರಿಯೂರು ತಾಲೂಕು ಗೌರವಾಧ್ಯಕ್ಷ ಆಲೂರು ಸಿ. ಸಿದ್ದರಾಮಣ್ಣ ಒತ್ತಾಯಿಸಿದ್ದಾರೆ.
ಆನ್ಲೈನ್ ನಿಯಮದಿಂದ ಎದುರಾಗಿರುವ ಪ್ರಮುಖ ಸಮಸ್ಯೆಗಳು:
ಪಹಣಿ ಬದಲಾವಣೆಯಾಗದಿರುವುದು: ರಾಜ್ಯದಲ್ಲಿ ಬಹುತೇಕ ರೈತರ ಜಮೀನುಗಳ ಪಹಣಿ ಇನ್ನೂ ಅವರ ತಂದೆ ಅಥವಾ ತಾತಂದಿರ ಹೆಸರಿನಲ್ಲೇ ಇದೆ. ಇದರಿಂದಾಗಿ ಪ್ರಸ್ತುತ ಉಳುಮೆ ಮಾಡುತ್ತಿರುವ ರೈತರಿಗೆ ಆನ್ಲೈನ್ನಲ್ಲಿ ಗೊಬ್ಬರ ಬುಕ್ ಮಾಡಲು ಸಾಧ್ಯವಾಗುತ್ತಿಲ್ಲ.
ಗುತ್ತಿಗೆದಾರರಿಗೆ ಗೊಬ್ಬರ ಸಿಗುತ್ತಿಲ್ಲ: ಜಮೀನನ್ನು ಗುತ್ತಿಗೆ ಪಡೆದು ಕೃಷಿ ಮಾಡುತ್ತಿರುವ ರೈತರಿಗೆ ಸ್ವಂತ ಪಹಣಿ ಇಲ್ಲದಿರುವುದರಿಂದ ಅವರು ಗೊಬ್ಬರದಿಂದ ವಂಚಿತರಾಗುತ್ತಿದ್ದಾರೆ.
ಆಧಾರ್ ಹಾಗೂ ಎಫ್ಐಡಿ ಲಿಂಕ್ ತೊಡಕು: ರೈತರ ಹೆಸರು, ಆಧಾರ್ ಮತ್ತು ಎಫ್ಐಡಿ ಸರಿಯಾಗಿ ಲಿಂಕ್ ಆಗದಿರುವುದರಿಂದ ಸಾಫ್ಟ್ವೇರ್ನಲ್ಲಿ ಸಮಸ್ಯೆ ಎದುರಾಗಿದೆ.
ಬೆಳೆ ನಮೂದಾಗದಿರುವುದು: ಪಹಣಿಯಲ್ಲಿ ಅನೇಕ ರೈತರು ಬೆಳೆದ ಬೆಳೆಯ ವಿವರಗಳು ಸರಿಯಾಗಿ ದಾಖಲಾಗಿಲ್ಲ. ಇದರಿಂದಾಗಿ ರೈತನ ನೈಜ ಬೇಡಿಕೆಗೆ ತಕ್ಕಂತೆ ಗೊಬ್ಬರದ ಪ್ರಮಾಣ ಲಭ್ಯವಾಗುತ್ತಿಲ್ಲ.
ಕೀ-ಪ್ಯಾಡ್ ಮೊಬೈಲ್ ಬಳಕೆದಾರರಿಗೆ ತೊಂದರೆ: ಶೇಕಡಾ 70ಕ್ಕೂ ಹೆಚ್ಚು ಗ್ರಾಮೀಣ ಪ್ರದೇಶದ ರೈತರು ಸಣ್ಣ (ಕೀ-ಪ್ಯಾಡ್) ಮೊಬೈಲ್ ಫೋನ್ಗಳನ್ನು ಬಳಸುತ್ತಿದ್ದು, ಆನ್ಲೈನ್ ಬುಕಿಂಗ್, ಬೆಳೆ ವಿವರ ನಮೂದು ಹಾಗೂ ಓಟಿಪಿ ಪಡೆಯುವುದು ಅವರಿಗೆ ಕಷ್ಟಕರವಾಗಿದೆ.
ಖಾಸಗಿ ಗೊಬ್ಬರ ಅಂಗಡಿ ಮಾಲೀಕರ ಪರದಾಟ:
ಮತ್ತೊಂದೆಡೆ, ಈ ಆನ್ಲೈನ್ ಗೊಂದಲದಿಂದಾಗಿ ಗೊಬ್ಬರ ಮಾರಾಟವಾಗದೆ ಗೋಡೌನ್ಗಳಲ್ಲಿ ಕೊಳೆಯುತ್ತಿದ್ದು, ಅಂಗಡಿ ಮಾಲೀಕರು ಗೋಡೌನ್ ಬಾಡಿಗೆಯನ್ನೂ ಕಟ್ಟಲಾಗದೆ ನಷ್ಟ ಅನುಭವಿಸುತ್ತಿದ್ದಾರೆ. ಹೀಗಾಗಿ ವ್ಯಾಪಾರಿಗಳು ಕೂಡ ಅಂಗಡಿಗಳನ್ನು ಬಂದ್ ಮಾಡಲು ನಿರ್ಧರಿಸಿದ್ದಾರೆ ಎಂದು ತಿಳಿಸಿದರು.
ದೇಶಕ್ಕೆ ಅನ್ನ ನೀಡುವ ರೈತನಿಗೆ ಸಕಾಲದಲ್ಲಿ ಗೊಬ್ಬರ ತಲುಪದಿದ್ದರೆ ಬೆಳೆ ನಾಶವಾಗುವ ಭೀತಿಯಿದೆ. ಸರ್ಕಾರ ತಕ್ಷಣವೇ ಈ ಆದೇಶವನ್ನು ರದ್ದುಗೊಳಿಸಿ, ಸರಳ ಹಾಗೂ ಸುಗಮ ರೀತಿಯಲ್ಲಿ ಗೊಬ್ಬರ ವಿತರಣೆಗೆ ಕ್ರಮ ಕೈಗೊಳ್ಳಬೇಕು ಎಂದು ರೈತ ಸಂಘದ ಮುಖಂಡರು ಮನವಿ ಮಾಡಿದ್ದಾರೆ.
